To listen that verse in audio click to Ngawn..
Jesuh In Nungzui Tei Ke Som
1 Atu-in Kaltan Puainak tuk ni khat bek sam toh hi. Leihum zamsanin, Pa i lakah a hawh lehnak tuk hun heng zo tih thei hi. Hi leihum a ummi a mihingte khi it lelengin, amuhte a dawltawpnak tian it hi.
2 Jesuh le a nungzuitute takeih kuangkil haw hi. Dawi ngilo in Simon Iskariot i capa Judah Iskariot i lungmu sungah Jesuh zuak tuk tihmi ngaihsutnak piangtik zo hi.
3 Pa in huham cangkim zetin pia zo hi tih cu Jesuh in theicop leng hi. Pathian lak pen hungin, Pathian nelah hawhleh tung hi tihvang cu thei hi.
4 Mah hangin an a eih haw laihtakin cabuai pen dingto in, a angki cualpi dukin a koih celh ten khut nawtnak puan khi la in, a puan cu a tai ah het hi.
5 Kuang sungah tui leihsuk ceng ten a nungzuitu tei ke cu somsakin, khut nawtnak puan tuah nawt sak hi.
6 Simon Peter el a hen ten Peter in, “Topa, ka ke somsak tuk cim?” tin ti hi.
7 Jesuh in, “Ka bawlmi cu atu-in, a sullam thei ma laih ci. Mahnaven tunung lam ten theileh tuk poh ci,” ti hi.
8 Peter in, “Ka ke somsak hihim tukma ci,” ti hi. Jesuh in, “Na ke ka somsak ma tale ka nungzuitu hi khaleh tukma toh ci,” tin don hi.
9 Simon Peter in, “Topa, mah a hih tale ka ke bek somsak ngawlin ka khut le ka lu vang somsak vanglakin,” ti hi.
10 Jesuh in, “Ti somsami cu a pumpicingin thiang zo toh hi a, a ke tih ngawl somleh kulma toh hi. Pa khat pa bek sial ngawl na venghawng uhin ciang uh ci,” ti hi.
11 Jesuh in, akua in kei zuak tuk him tih a theih hamsa tak cu hi bangin a tihnak hi.
12 A ke haw a somsak celh ten a angki cualpi silhin, cabuai ah khung lehin, “Tu a ka bawlsakmi thu umdante hi a sullam thei uh cim?” tin dong hi.
13 “Noh ten keimah hi Topa le Sazapa, tin sam uh ci. Hi na samdan uh cu ka hih hangin a manmi zuh hi.
14 Kei, na Topa uh le na Sazapa uhin, na ke uh somsak zo ing. Nohte hei pa khat le pa khat na ke uh na somsakdun tuk uhmi hi.
15 Noh tei ca in, zui tuk le na zohteh tuk uh bawlsak zo ing. Nohtei ca ka bawlsaknak bangin, noh ten na bawlbok tuk uhmi hi.
16 Thutakin hilh ing. Sila cu a bawipa sangin ngeng saw awng ma hi. Tiikmi pa hei a tiiktu pa sangin ngeng saw awng bokma hi.
17 Atu-in hi thutak thei ngah zo uh ci. Na bawl ngangai uh bang ahin, izahtak lungnop tuk nan ti uh cim?”
18 “Nohtei thuson li kha mang hi. Ka tensami cu thei ing. ‘Ka an a eitu cu ka ngalin, na cangta hi tin, Lai Thiangtho sung thu a kim tukin sam hi.’
19 Nohtei lakah hi thu a hen laih ngawlin atu-in hilhham ing. Itahim titale hi thute a hen ngangai hun ten noh ten, ‘Kei cu Keimah,’ ka hihlam na up theihnak tukin hi.
20 Thutakin hilh ing. Ka tiikmi tei zintunnak tuk kongka a hontu cu keimah kong hontu hi. Keimah zintunnak kong a hontu pawpoh cu, keimah tiiktu pa kong hon hi,” ti hi.
Jesuh In A Zuaknak Haw Tuk Hilhham
21 Hi thu a son celh ten Jesuh cu thasia zetin hi bangin hilhciang hi. “Thutakin hilh ing. Nangmu sung pen mihing pa kha khatin keimah zuak tuk uh ci,” ti hi.
22 A nungzuitute cu pa khat le pa khat zodunin, akuabel tihsan li nantim tin lamdangsa mahtak haw hi.
23 Jesuh i ihmi nungzuitu pa khat cu Jesuh nekbelin khung hi.
24 Simon Peter in mahpa cu a mit ehkuhin, “Akuabel him a tihsan dong kekin,” ti hi.
25 Mah hangin Jesuh cu a nungzuitu ten nekdeuh haw in, “Akua kaw Topa?” tin dong hi.
26 Jesuh in, “Kuang sungah cangho nimsukin, ka piakmi pa tuk hi,” tin don hi. Jesuh in cangho pa khat cu la in, a nip celh ten Simon Iskariot capa Judah cu pia hi.
27 Judah cu cangho a lak bek ten a sungah Satan tumvut hi. Jesuh in, “Na bawl nuammi cu manlangin bawlvutin,” ti hi.
28 Jesuh in hi thu a hilh ten cabuai a khungmi ten kuamah in, a sullam thei zo haw ma hi.
29 Judah cu sumkemtu a hihnak bangin Jesuh in puainak tukin a kulmi canghote leitik ol hi, tin nungzuitu khenkhat ten ummawh haw hi. Mah ahimata ca-ngahte pa kha khat pia in hi tin, Judah cial hi beltuk tin ngaisung haw hi.
30 Judah cu cangho a lakcelhbek ten manlang zetin pualeu lamah tul hi. Mah hun cu zan laihtak hi.
Thutiam Thak
31 Judah i pualam a tul nung bek ten Jesuh in, “Atu-in Mihing Capa cu minthannak piakin um zo hi. Atu-in keimah hangin Pathian cu thangphatnak co zo hi.
32 Pathian in keima hangin minthannak co ahi tale Pathian hei in Mihing Capa cu minthannak pia bok tuk a, mahmi cu a ngeingawlno in bawl tuk hi.
33 Ka cate aw nohtei lakah ngeipi umleh tukma toh ing. Noh ten kei cu zei li tuk naven uhcin Judah tei lakah ka hilhsa bangin nohte hilh ing hi, ‘Keima hawhnak munah nohte hawh kha thei tukma uh ci,’ ti hi.
34 Thutiam Thak nohte pia ing. Pa khat le pa khat na itdunta un hi. Keimah in nangmuhte ka ih bangbokin, nohte vang pa khat le pa khat na itdun bokta un.
35 Pa khat le pa khat na itdun uh tale mi hempoh ten nohte cu keima nungzuitu na hihlam thei haw tuk hi,” tin don hi.
Peter i Nial Tuk Hilhhamnak
(Mt 26:31-35; Mk 14:27-31; Lk 22:31-34)
36 Simon Peter in, “Topa, ilai ah kaw na hawh tuk?” tin dong hi. Jesuh in, “Ka hawhnak tuk munah atu-in zui thei tukma laih ci. Mahnaven tunung deuh ten zuileh tuk ci,” tin don hi.
37 Peter in, “Topa, atu-in ita zui thei tuk ngawl ing kaw?” Nangma ca in, a thi tukin a ngallingsa in um ing,” ti hi.
38 Jesuh in, “Kei ca in thih cu ngam ngai ni cim maw? Thutak hilh ing. Ak khuang laihngawlin vei thum tian hi pa thei kha mang tin nial tuk lai ci,” tin don hi.