To listen that verse in audio click to Ngawn..
Jesuh Cu Pa i Nelah Hennak Lampi
1 Jesuh in, “Thinkham le ngaihsut haksa in, um pahsun un hi. Pathian um unna, keima hei um bok un hi.
2 Ka pa i inn sungah umnak tampi um hi. Mahlai ah nangmu umnak tuk mun bawlham tukin hawh tung. Mahtin ahi ngawl ahin nohtei lakah hilh tuk mang hi.
3 Hawh tung a, nohtei umnak tuk mun ka bawl celh ten hungkikleh tung hi. Nohte cu keima lakah pui tung a, ka umnakah umbok tuk uh ci.
4 Ka hawhnak tuk mun hen theihnak tuk lampi cu thei leng poh uh ci,” tin hilh hi.
5 Thomas in, “Topa, ilai kekah him na hawh tuk tih thei ma si ung. Iti bangin mahlai mun hawhnak lampi cu thei tuk ung kaw?” tin ti hi.
6 Jesuh in, “Kei cu lampi, thutak le nunnak ing. Keimah tawn ngawlin kuamah in ka Pa i lakah heng thei haw tukma hi.
7 Atu-in noh ten keimah thei ngah zo na hih uh hangin ka Pa hei thei bok tuk uh ci. Tu pepanin noh ten amah cu thei in, mu zo uh ci,” ti hi.
8 Filip in, “Topa, na Pa cu keimuh lak tehin,” ti hi.
9 Jesuh in, “Nohtei lakah ngeipi um zo naveng sing, keimah thei ma laih cim, Filip? Keimah a mutu pawpoh ten ka Pa mu bok haw hi. Mah hangin ita na Pa lak tehin tin ti thei cim?
10 Kei cu ka Pa i sungah um ing a, ka Pa vang cu keima sungah umbok hi tih khi umma cim maw, Filip? Nohte ka hilhmi thu cu keima sung pen a tulmi kha ma hi, ka sung a ummi ka Pa i nadehnak hi.
11 Kei cu ka pa i sungah um ing a, ka Pa hei keima sungah umbok hi. Hi thu hi na um poh unna, hi thu ke kek na um thei uh ngawl hei in, ka nadehnak le nalamdang ka bawlte na muh uh bek ten um un hi.
12 Thutakin hilh ing. Keima a umtu ten ka bawl bangin bawlbok haw tuk hi. Hi sangin a ngeng saw deuh hei bawl thei haw tuk hi. Itahim titale ka Pa i lakah ka hawh tuk hangin hi.
13 Pa i minthannak cu Capa i hu le thawm tuah a lang theihnak tukin keima minin, na nget uhmi hempoh cu bawlsak tung hi.
14 Ihempoh keima minin, na ngen uh tale pia tung,” ti hi.
Hawvang Thiangtho Tiam
15 Jesuh in, “Keimah na it uh tale ka thupiakte zui tuk uh ci.
16 Ka pa i lakah ngen tung a, bawmtu dang Hawvang Thiangtho nohte pia tuk hi. Amah cu nohtei lakah kumkhua in um tuk hi.
17 Amah cu Hawvang hi ama Pathian thutak langtiktu hi. Leihumpi in amah pom thei ma hi. Itahim titale a theih haw ngawl hangin le amuh bat haw ngawl hangin hi. Mahnaven noh ten amah khi thei uh ci. Itahim titale nangmu lakah umcih leng a, na sung uhah amah a nun hangin hi.
18 Nangmuh nguakcang zamthong tuk mang hi. Nohtei lakah hungleh tuk laih ing.
19 Imah can um ngawlin leihumpi in, kei cu muleh tukma toh hi. Mahnaven noh ten kei cu mu tuk uh ci. Mahbek sial ngawlin keimah ka nun bang bokin nohte vang nungbok tuk uh ci.
20 Mah ni le hun a hen ten kei cu ka pa i sungah ka um lam thei tuk uh ci. Nangmuh vang keima sungah na um lam uh le nangmu sungah kei ka um lam thei bok tuk hi uh ci.
21 Ka thupiak pomin, a zuitu cu keimah ittu hi. Ama lakah keimah le keimah lang tung hi.
22 Judah Iskariot kha ngawl a dang Judah in, “Topa, leihumpi ah phuanglangdun ngawlin ita keimu lak bekah phuanglangdun tuk cim?” tin dong hi.
23 Jesuh in, “Kei a ittu pawpohin ka thu khi ngai tuk hi. Amah cu ka Pa in, it bok tuk a, keimah le ka Pa cu hungin ama lakah um tuk ung hi.
24 Keimah a it ngawltu ten ka thu ngai haw tukma hi. Ka hilhmi thu na zak lih uhte khi keima thu kha ma hi. Keimah a tiiktu ka Pa i thu hi.
25 Hi thu hempoh nohtei lakah ka umlaihin hilh ing.
26 Mahnaven Ka Pa in keima minin, a tiik tukmi Bawmtu, Hawvang Thiangtho in, nohte cu ihempoh hilh tuk hi. Nangmuh ka hilhmi thu hempoh cinglengtik tuk hi.
27 Lungmuannak nohte zam ing. Keima lungmuannak tatak khi pia ing. Leihum mitei piakmi bangin pia kha mang hi. Lungmu tamin na umta pahsuh un hi. Thinsu li hei in, na umta pahsuh un hi.
28 “Hawh hih tung a, nohtei lakah hungleh tung hi,” tin ka hilhmi thu za zo uh ci. Keimah na it ngangai uh tale ka Pa i lakah ka hawh tuk hi lungdamzet tuk uh ci. Itahim titale amah cu keimah sangin ngeng saw hi.
29 Ka hilhsa bangin a pian ngangai ten na up theihnak tukin a pian laih ngawlin nohtei lakah hilh ing.
30 Hi leihumpi uktu pa hung li toh a hih hangin thu saupi sonpih man lehma toh ing. Keima humah thuneihnak imah nei ma hi.
31 Mahnaven leihumpi in ka Pa ka ihlam a theih theihnak haw tukin ka Pa i tiiknak bangin ihempoh bawl khawng ing. “Hung unna, hilai mun pen hawh nung,” ti hi.