To listen that verse in audio click to Ngawn..
Jesuh Sabit Ngui Ngangai
1 Jesuh in, “Kei cu sabit nguipi ing a, Sabit huan neitu cu ka Pa hi.
2 Ngah a ngah ngawl a kung hempoh cu talh khawngin, ngah a ngahmi a kungte cu tam sesemin, a ngahnak tuk thiang siuhseuhno in bawl hi.
3 Nohte cu ka hilhmi thu hangin thiang khawng zo uh ci.
4 Keimah tuah pehzom leleng unna, kei vang nangmuh tuah peh leleng tung hi. Sabit kung cu amahno in ngah cawm thei ma hi. Sabit nguipi ah a pehzom bek ten ngah thei hi. Mahti bang bokin nohte vang keima sungah na umma uh tale ngah thei tukma uh ci.
5 Sabit nguipi cu keimah ing a, nohte cu a kangkak hi uh ci. Akua hei hihen keima sungah umin, kei vang a sungah ka um bok tale ngah tampi ngah thei tuk hi. Itahim titale keimah tel ngawlin imah bawl theih ma uh ci.
6 Keima sungah a umngawltu cu sabit kung vawkin, a ko mi bang haw hi. Mahtibang a kangkote cawm khawmin, meipualah vawk haw a, kangtum khawng hi.
7 Keima sungah umin ka thu cu nohtei sungah a kho leng tale na nget uh hempoh cu ngah tuk uh ci.
8 Noh ten ngah tampi na ngahnak uh i hu le thawm hangin ka Pa i sunloihnak na langtik uh hangin ka nungzuitu na hih theihnak uh hi.
9 Ka Pa in, keimah a ih bang bokin nohte it bok ing a, ka ihnak sungah um leleng un hi.
10 Ka Pa i thupiakte khi, zui in, ama itnak sungah ka um bangbok khin ka thukhamte na ngai uh tale ka itnak sungah umbok tuk uh ci.
11 Ka lungdamnak nohtei sungah umin, nohtei lungdamnak a cangkim theihnak tukin hi thu cu nohtei lakah hilh ing.
12 Ka thupiakmi cu hi bangin hi. Keimah in nohte ka ih bang bokin nohte vang pa khat le pa khat na itdun bokta un hi.
13 Mi pa khatin, a ngualcam tei ca a ihnak ngengbel a langtik theihnak cu amuh tei ca a nunnak piak ngamnak khi hi.
14 Mahten ka thupiak bangin na bawl uh tale ka ngualcam hi uh ci.
15 Nohte cu sila tih hei in, samleh tukma toh ing. Itahim titale sila ten a bawipa i bawlmi thei kha awng haw ma hi. ‘Sila,’ ti ngawltohin, ngualcam, tin sam ing: itahim titale ka Pa i lak pen ka zakmi hempoh hilh khawng zo ing hi.
16 Noh ten keimah teng kha ma uh ci. Keimah in nangmuhte teng saw ing hi. Mah hangin ka minin, na nget uhmi hempoh pa in pia tuk hi.
17 Mah hangin ka thupiakmi cu hi bangin hi. Pa khat le pa khat itdun un hi.
Leihum Mitei Huatnak
18 Leihum pi in, nangmuhte a hua tale keimah hua masa hi tih thu phawkngilta pahsuh un hi.
19 Leihum mitei ta, ahi uh bang ahin, hi leimi ten nohte cu it bok tuk hi. Mahnaven nohte cu hi leihum pen teng zo ing. Amata na hihleh uh ngawl toh hangin leihum in hua hi.
20 ‘Sila cu a bawipa sangin ngeng saw awng ma hi,’ tih thu ka hilhmi khi cing leleng un hi. Keimah a bawlsia haw tale nohte vang bawlsia bok haw tuk hi. Ka thuzilhmi a ngai haw tale nangmu zilhmi vang ngaibok haw tuk hi.
21 Mahnaven hi thute hempoh cu keima mihing na hih uh hangin nohtei humah bawl haw tuk hi. Itahim titale keimah a tiiktu Pa khi a theih haw ngawl hangin hi.
22 Amuh tei lakah hawhin thu ka hilh ngawlta ahin a hum hawah sualnak um tukma hi. Mahnaven atu-in, a sualnak haw selcipleh theih ma toh hi.
23 Keimah a huatu pawpohin ka Pa khi hua bok haw hi.
24 Kuamah i bawl awng ngawl ka bawlmite cu bawl ngawlin ka umta ahin, amuh tei humah sualnak um tukma hi. Mahnaven atu tianah ka bawlmi khi mu leng haw naven ka Pa le Keimah hua haw hi.
25 Hi thu cu hi bangin hituk himpo hi. Itahim titale amu Daan sung a, ‘Imah thei ngawlin kei hua haw hi,’ tin, a ngatmi thu a cangkimnak tukin hi.’
26 Ka Pa i lak pen Bawmtu, Hawvang heng tuk a, amah cu Pathian i thutak langtiktu tuk hi. Ka Pa i lak pen tiik tung a, keima cungcang hilh tuk hi.
27 Mahten nohte hei in keima lak pen a pattungin thei zo toh na hih uh hangin ka thu cu hilh tuk uh ci.