To listen that verse in audio click to Ngawn..
1 “Na upnak uh pen na lup khak sual ngawlnak tukin hi thu nohte hilh ing.
2 A pumkhawm inn haw pen nangmuh hawlvawk haw tuk a, mahbek sial ngawlin nangmuh a thah tuk khi Pathian nadeh pa khat hi tin a ngaihsut hun heng tuk hi.
3 Ka Pa hei hihen, keimah hei hihen a theih haw ngawl hangin hitih bangin nohtei humah bawl haw tuk hi.
4 Hiti bangin nohtei humah a bawl haw hun a hen ten hi thu hi a hilhhamsa khi hi, tin na cin leleng theihnak tuk uhin hilh ing,” ti hi.
Hawvang Thiangtho Nadeh
“Nohtei lakah ka um leleng hangin hi thu hi a tung laihin, hilh mang hi.
5 Mahnaven atu-in keimah a tiiktu Pa i lakah hawh tuk toh ing. Ilai ah hawh tuk nge cim? tin a dongtu umma laih uh ci.
6 Atu-in ka hilh zo hangin na lungmu sung uhah thasiatnak tuah dim uh ci.
7 Mahnaven thutakin hilh ing. Ka hawh hi nohtei ca in pha saw hi. Itahim titale ka hawh ma ahin Bawmtu Hawvang nohtei lakah hung tukma hi. Ka hawh ahi tale amah cu nohtei lakah tiik tung hi.
8 Amah a hun ten, leihum mitei lakah sualnak thu ah a ngaihsut khialhdan haw, thudik thu ah a ngaihsut khialdan haw le Pathian thukhennak thu a ngaihsut khialdan haw khi theiciangtik tuk hi.
9 Keimah a up haw ngawl hangin sualnak thu ah a ngaihsut khialhnak haw hi.
10 Dikcangnak humah a ngaihsut khialdan haw hilhciang tung hi. Itahim titale kei cu ka Pa i lakah hawh tung a, na muhleh tuk uh ngawl toh hangin hi.
11 Thukhennak thu i humah a ngaihsutdan haw khial hi. Itahim titale leihum uktu bawi cu thukhensa zo hangin hi.
12 Thuhilh tuk tampi nei laih ing. Mahnaven atu-in, cing khawng zo tukma uh ci.
13 Mahnaven Hawvang Thiangtho a hen ten Pathian i thutak langtiktu a hih hangin thutak hempoh sungah lamhuai tuk hi. Ama thuno in, awn tukma naven a zakmi cu hilhin, a heng tuk laihmi thu vang hilh tuk hi.
14 Amah in keima cungcang ka hilhsami thu khi la in nangmu lakah hilh tuk a, amah in sunloihnak pia tuk hi.
15 Ka Pa i neihmi hempoh cu keima ta hi. Mah hangin Hawvang Thiangtho in ka piakmi cu la in, nangmu lakah hilh tuk hi, tin ka tihnak cu hi.
Bawlsiatnak le Lungdamnak
16 “Ngeican um ngawlin kei cu mu tukma toh uh ci a, imah can ngei ngawlin keimah muleh tuk uh ci.”
17 A nungzuitu khenkhat ten, “Hi thu sullam i nantim? Imah can um ngawlin keimah muleh tukma toh uh ci a, imah can ngei ngawlin keimah muleh tuk uh ci tin, a tih hi. Mahten ‘Pa i lakah ka hawh tuk hangin,’ tin ti lalaih sih hi.
18 ‘Ngei can um ngawlin,’ a tihmi hi a tih nuammi i nantim? A tihnuam san thei hihim ma si hung mei,” tin pa khat le pa khat tidun li haw hi.
19 Jesuh in, amah thudong nuam haw tih a zak ten, “Imah can um ngawlin keimah muleh tukma toh uh ci. ‘Mahnung ten imah can ngei ngawlin keimah muleh tuk uh ci, ka tihmi thu khi maw nangmuh lala na son ham lih uh?’
20 Thutakin hilh ing. Nohte cu kapin, au li tuk uh ci. Mahnaven leipi cu a lungdam tuk hi; na tha uh sia in, khua ngai tuk naven uhcin na khua ngaihnak hempoh uh cu lungdamnakin suakleh tuk hi.
21 Numei pa khat cu nau a neih tuk ten haksat a thuaknak hun heng a hihnak bangin a thasia hi. Mahnaven nauno a hin ten nauthak pa khat leihumah a piannak hangin a lungdamin, a natnak hempoh phawkngil hi.
22 Mahti bang bokin nohte vang hi bok tuk uh ci. Atu-in, na tha uh sia hi. Mahnaven nohte cu muleh tung a, na lungmu uh cu lungdamnak tuah dim tuk hi. Mah lungdamnak cu kua mah i lonsak thei ngawl tohmi lungdamnak hi tuk hi.
23 Mah ni a hen ten kei cu imah dongleh tukma toh uh ci. Thutakin hilh ing. Ka pa in keima min tuah na nget uhmi hempoh cu nangmuh pia tuk hi.
24 Tuni tian ka min suangin, na nget uhmi imah umma laih hi. Ngen unna, ngah tuk uh ci a, mahten na lungdamnak uh cangkim tuk hi.
Leihum Neh Zo
25 “Tuni tianin santehnak tuah ngehin hilh ing. Mahnaven ka Pa i thu cu santehnak tel ngawlin ciangkohin ka son hun heng tuk hi.
26 Mah hun a hen ten ama lakah ka minin, ngen tuk uh ci, a keimah in ngetsak tung tin ti mang hi.
27 Itahim titale ka Pa amah hihimin nohte it hi. Noh ten keimah it in, keimah hi Pathian lak pen a hungmi hi tih na um uh hangin nohte it hi.
28 Ka Pa i lak pen a hungmi tatak ing a, leihumah hung ing. Atu-in hi leihum pen tulin ka Pa i lakah hawh tung,” ti hi.
29 A nungzuitu ten, “Atu-in santehnak tel ngawlin ciang zetin hilh ci.
30 Nangmah in ihempoh thei khawng ci, kuamah i dotlih na kul ngawllam cu atu-in theiciang ung hi. Hi thu in nangmah cu Pathian lak pen a hungtu pa na hihlam um khotik hi,” tin ti haw hi.
31 Jesuh in, “Atu aw keimah um toh uh cim?
32 Ngai un hi. Na venghawng un taikeh khawngin, nangmu inn tekah zuan tuk uh ci a, keimah nguakcang na zam hun uh heng tuk hi. Mah hun cu atu-in heng zo hi. Mahnaven Pa cu keima lakah a um hangin keimah nguakcang kha ma ing hi.
33 Nohte cu keimah tuah na pehzomnak uh i hu le thawm hangin lungmuannak na ngah theihnak tuk uhin hi thu hi nohte hilh ing. Leihumin nohte cu haksatnak pia tuk hi. Mahnaven lau ngawlin ngalhang zetin um un! Leihumpi cu neh zo ing!” ti hi.