To listen that verse in audio click to Ngawn..
Jesuh In A Nungzui Tei Ca Thungen
1 Jesuh in hi thu a hilh ceng ten vanlam zoto in, “Ka Pa, a hun heng zo hi. Capa in nangmah a sunloihnak le huham a piak theihnak tukin na Capa i lakah sunloihnak pia tohin hi.
2 Capa i lakah na piakmi mihing hempoh tei lakah kumkhua nunnak a piak theihnak tukin leihum hinnam hempoh tei humah thuneihnak pia zo ci.
3 Mah kumkhua nunnak tihmi cu Pathian nangmah theih le na tiikmi Jesuh Khrih theih na hi.
4 Nadeh na piakmi dek khawng zo ing a, na sunloihnak cu leihumah langtik zo ing.
5 Pa aw! Leipi bawl laihngawl khin nangmah tuah ka neimi sunloihnak khi atu-in, na mitmuhah pia in hi.
6 Leihum pen na samtulmi tei lakah na min cu langtik zo ing. Mah mite cu nangmata hi haw in, keima lakah na piakmi hi haw a, na thu zui haw hi.
7 Atu-in ihempoh nangma lak pen keimah na piakmi hi tin thei haw hi.
8 Na piakmi na thu cu hilh ing a, amuh ten pom zo haw toh hi. Nangma lak pen a hungmi ing hi, tih thuman hei cu thei haw in, na tiikmi tih hei khi um haw hi.
9 Amuh tei ca in thungen ing. Leihum i ca in ngen mang hi. Mahnaven na piakmi tei ca in ngen ing. Itahim titale nangmata hi haw hi.
10 Ka neihmi hempoh hi nangmata hi, nangma neihmi hempoh hei cu keima ta bok hi in, amu sung pen ka sunloihnak lang hi.
11 Atu-in, na lakah hung tung a, kei cu leihumah umleh tukma toh naven amuhte cu leihumah um haw tuk laih hi. A thiangthomi ka Pa, nangmah le keimah pa khat a hih uh bangin leihumah a umlaih mite cu pa khat a hih theihnak tukin na piakmi na min i huham tuah humhimin hi.
12 Amuh tei lakah ka umlaihin nangma piakmi na min i huham tuah hup ing. Lai Thiangtho sung a, ummi a kimnak tukin a thamthong tukmi pa khat tih sialngawl cu mi pa khat hei thamthong haw ma, humhim khawng ing.
13 Atu-in nangma lakah hung tuk toh ing a; leihumah hi thu ka hilhnak cu ka lungdamnak amu lungmu sungah cangkim zetin, a neih theihnak haw tukin hi.
14 Keimah cu hi leihum ita ka hih ngawl bang bokin, amuhte vang hi leihum ita hi bok haw ma hi, mah hangin na thu cu amuh tei lakah ka hilh ten leihum miten a huatnak cu na hi.
15 Amuhte cu leihum pen latulin, tin ngen kha man naveng mipha ngawlmi pa i lak pen hupin hi bangin ngen ing.
16 Keimah hi leihum ita ka hih ngawl bangin, amuh vang leihum ita hi bok haw ma hi.
17 Amuhte khi na lakah na thutak tuah thiangtikin; na awnkam cu thutak hi.
18 Hi leihumah na tiiksuk bangin amuhte vang tiik bok ing.
19 Amuhte vang thutakin, a thiangtik theihnak tukin keimah vang thiangtik cop zo ing.
20 Amuh tei ca bekin thungen hi kha mang hi; a thuhilh haw mi zain keimah a um tuk laih tei ca tianin thungen ing.
21 A venghawng haw in, pa khat a hih theihnak tukin ngen ing. Pa aw, nangmah cu keima sungah um ci a, kei vang nangma sungah ka um bang bokin amuh vang cu eimu sungah umbok haw hen. Nangmah in kei na tiik cu hi leihumin, a san theihnak haw tukin amuhte cu pumkhatin cang zal haw hen.
22 Nangmah le keimah cu pumkhat a hih uh bangin amuhte vang pumkhat a suah theihnak haw tukin nangma piakmi sunloihnak cu amuhte vang pia bok ing.
23 Leihumin nangma tiikmi ing tih a theihnak haw tukin le keimah na ih bangin amuh vang na ihlam a theih theihnak haw tukin, kei cu amu sungah umin, nang cu keima sungah um ci.
24 Pa aw! Nangma piakmi ka sunloihnak hi amuh theihnak haw tukin nangmah in, amuhte cu ka khut sungah pia zo ci. Keima umnakah umbok tukin deih ing hi; itahim titale leipi a pian laihngawlin it zo ci.
25 A dikcangmi Pa aw! Leihum ten nangmah thei haw ma naven kei in nangmah thei ing a, nangma tiikmi ka hihlam cu thei bok haw hi.
26 Amu lakah na min cu than zo ing a, ka humah itnak na neihmi hi amu sungah a um boknak tukin le keimah vang amu sungah ka umboknak tukin na min cu amu lakah than pepel tuk laih ing hi, tin thungen hi.