To listen that verse in audio click to Ngawn..
JOHAN
Ngatmi Lungdamnak Thuthangpha
(The Gospel according to John)
Nunnak Thu
1 Amasabelin Thu um zo hi. Mah Thu cu Pathian tuah umkawmin, mah Thu cu Pathian hi.
2 A pattungin mah Thu cu Pathian tuah um zo hi.
3 Ama sung pen Pathian in ihempoh bawl hi; bawlmi na hempoh sung pen amah tel ngawlin bawlmi pa khatno hei umma hi.
4 Mah Thu cu nunnak tawpatnak hi a, mah nunnakin mihing lakah vaknak hengtik hi.
5 Vaknak cu khuathim sungah vakin, khuathimin mittik zo ma hi.
6 Pathian in, a kamtai Johan hahin,
7 Johan cu mitei lakah mah vaknak thu hilh tukin hung hi. A hilhmi hempoh a zak haw tukin le a up haw tukin hung hi.
8 Amah cu mah vaknak cu kha ma hi; vaknak thu hilh tukin a hungmi hi saw hi.
9 Mah vaknak cu vaknak ngangai hi. Mah vaknak cu leihumah hungin mi hempoh a vaktiktu vaknak hi.
10 Mah Thu cu leihumah umin, ama sung pen Pathian in, leihum hi bawl naven leihumin amah cu thei ma hi.
11 Ama ngam sungah hung naven, a mihing ten sang haw ma hi.
12 Mi khenkhat ten sangin a up haw hangin Pathian cate hih theihnak thupia hi.
13 Pathian cate a hihnak haw cu leihum dan, mihing i hinmi hihnak tuah kha ma hi; Pathian amah loli cu a Pa haw hi.
14 Mah Thu cu mihingah cangin, eimu lakah um a; hehpihnak le thutak tuah dim hi. A sunloihnak mu hung a, Pa in, a Capa neihcalam lakah a piakmi sunloihnak hi.
15 Johan in mahpa i thu cu hi bangin hilh hi: “Amah cu keima nungten hung naven amah cu kei sangin ngeng saw hi. Itahim titale amah cu ka suah laih ngawlin um zo hi tin ka hilhmi cu ama thu khi hi,” ti hi.
16 A cangkim zetmi a hehpihnak tuah ohte cu muicu pia zo a, muicu cu pa khat nung pa khat pia hi.
17 Pathian i Daan cu Moses lak pen pia naven hehpihnak le thutak cu Jesuh Khrih sung pen hung hi.
18 Kuamah in, Pathian cu mu awng ma hi. A Pa in, a Capa neihcalam, a angsungah a umtiknakin langtik zo hi.Tuiphum Johan i Thuhilhmi(Mt 3:1-12; Mk 1:1-18; Lk 3:1-18)
19 Jerusalem a, Judah lampuitu ten thiampi khenkhatte le Levi mite cu Johan lakah hah haw in, “Nang hi akua nge cim?” tin dong haw hi.
20 Johan in, a thudot haw mi cu im ngawlin donin, “Kei cu Khrih hi mang hi,” tin ciang zetin mipi zakin hilh hi.
21 Amuh ten, “Mah ahi tale, akua cim? Elijah hi cim maw?” tin dong haw hi. Johan in, “Hi mang,” ti hi. Amuh ten, “Profet hi cim maw?” tin dong leleu haw in, “Hi mang hi,” tin don hi.
22 Amuh ten, “Mah ahi tale, akua cim, hilh hemin, Na thu donmi hi keimuh a hahtu tei lakah ka hilhleh uh kul hi. Akua ing tin tidun nge cim?” tin dong haw hi.
23 Johan in profet Isaiah i hilhmi la lehin: “Kei cu ‘Topa i hawhnak tuk lampi camtik un,’ tin phillawn pen a aumi aw khi ing,” ti hi.
24 Farasi tei hahmi kamtai ten,
25 Johan cu thu dongleh haw in, “Khrih le hi ma ci, Elijah le profet hei na hi ma tale, ita tuiphumnak pia nge cim?” tin ti haw hi.
26 Johan in, “Kei in tui tuah tuiphumnak pia ing, mahnaven na lak uhah na theih uh laih ngawlmi, mi pa khat um hi.
27 Amah cu ka nungah hung laih hi; mahnaven kei cu a kedam khau duktu tuk hei in tak mang,” tin ti hi.
28 Hiti bangin a dotdunnak haw mun cu Johan i a tuiphum a piaknak Jordan ngun pen ni suahnak lam a ummi
Bethani khua ah hi.
Pathian Tuuno
29 A zingten Johan in, Jesuh a lakah a hun lih laih cu mu in, “Leihum sualnak a hawhpihtu Pathian Tuuno khi zo un!
30 ‘Ka nunglamah mi pa khat hung hi, mahnaven kei sangin ngeng saw hi, itahim titale ka suah laih ngawlin amah cu um zo hi,’ tin, a thu le la, ka hilh lihmi pa cu amah hi.
31 Amah hi akua hi tuk him tih thei mang. Mahnaven amah hi Israel tei a theihnak haw tukin tui tuah tuiphumnak ka piak lihnak cu na hi,” ti hi.
32 Johan in tettikhanin, “Hawvang cu vancung pen khulo bangin kumsukin, a humah a kop khi mu ing.
33 Amah cu akua him tih thei ma naveng tui tuah tuiphumnak pia tukin kei a tiiktu Pathian in, ‘A Hawvang heng tuk a, mi pa khat humah a kop khi mu tuk ci; mahpa cu Hawvang Thiangtho tuah tuiphumnak piatu hi tuk hi,’ tin hilh hi.
34 Mahpa cu mu ngah zo ing. “Amah cu Pathian Capa hi,” ti hi.
Jesuh Nungzuitu Masabelte
35 A zingten Johan le a nungzuitu pa nih cu mah laih munah dingleh haw in,
36 Jesuh a hawh khi amuh haw ten, “Pathian Tuuno khi zo un,” tin Johan in ti hi.
37 Mahti bangin a tihmi cu a nungzuitu pa nih ten a zak haw ten Jesuh lakah hawh bok haw hi.
38 Jesuh cu a nunglam heklehin, a nungzui haw tih amuh ten, “Ikaw na zei uh?” tin dong hi.Amuh ten, “Rabbi, ilai ah kaw na um?” tin don haw hi. Rabbi tih cu Sazapa tihnak hi.
39 Jesuh in, “Hung unna, zo un,” ti hi. Mah a tih hun cu taklam nazi pa li hawng hi. Hawh haw in, a umnak cu mu haw a, mah ni cu a lakah caam haw hi.
40 Mahpa nih lak pen pa khat cu Simon Peter i nau Andru hi.
41 Thakhatin, a u Simon cu zei in amuh ten, “Khrih cu mu zo ing,” ti hi.
42 Mahten Simon cu Jesuh lakah hawhpih hi.Jesuh in amah cu zo in, “Na min cu Johan capa Simon hi ci; mahnaven Sefas tin sam hi tuk toh ci,” ti hi. Sefas tih cu Peter tih tuah bangve in, a sullam cu ‘suangpi’ tihnak hi.
Jesuh In Filip le Nathanel Sam
43 A zingten Jesuh cu Galilee ah hawh tukin ngaisung hi. Filip a muh ten, “Keimah zui in,” ti hi.
44 Filip cu Bethsaida khua mi hi a, Andru le Peter tei umnak khua hi.
45 Filip in Nathanel tawkin, a lakah, “Moses Daan laibu sungah a thula a ngatmite le profette vangin a thula a ngat haw mi pa cu tawk zo ung. Amah cu Josef capa Jesuh, Nazareth khua mi tin,” ti hi.
46 Nathanel in, “Nazareth khua pen thilpha tul thei a ni maw?” tin ti hi. Filip in, “Zo inna!” tin ti hi.
47 Jesuh in Nathanel a hun cu amuh ten, “Israel mi cikcek pa hi zo un! A lungmu sungah zolthu hihim umma hi,” ti hi.
48 Nathanel in, “Itin kaw kei na theih?” tin dong hi. Jesuh in, “Filip in, a sam laih ngawlin theikung nuai a, na khun laihin mu ing,” ti hi.
49 Nathanel in, “Sazapa, nang cu Pathian Capa hi ci! Israel Kumpi hi ci,” ti hi.
50 Jesuh in, “Theikung nuai a, na khun laihin mu ing ka tih hangin kei um ci mei? Hi sangin thupi saw tampi mu tuk laih ci,” ti hi.
51 Mahten a venghawng haw lakah, “Thutak hilh ing. Vancung khi hong tuk a, Mihing Capa humah Pathian i vancungmi a tolh le a kai khi mu tuk uh ci,” ti hi.