To listen that verse in audio click to Ngawn..
Nungzui Salih Tei Nelah Jesuh Lang
1 Mah nungten Jesuh cu a nungzuitu tei lakah Tiberius tuitingpi ah lang lehleu hi. A langnak cu hitih bangin hi.
2 Simon Peter, Caphil tihmi Thomas le Galilee ngam Kanaan khua a, Nathanel le Zebedi i capa le a nungzuitu pa nihte vang munkhatah tawkdun khawm haw hi.
3 Simon Peter in, “Kei cu suuk vawk tung,” ti hi. Midangte vangin, “Kei telbok tung,” tin ti tek haw hi. Mahten hawmkuang pa khat tuah hawh haw naven mah ni tak cu imah man ngah haw ma hi.
4 Nisuak bek ten Jesuh cu tui mawkah dingleng naven a nungzuitu ten Jesuh a hihlam thei haw ma hi.
5 Jesuh in, “Tangvalte matngah poh nei uh cim maw?” tin dong hi. Amuh ten, “Imah man ngah ma ung,” tin don haw hi.
6 Jesuh in, “Na hawmkuang uh i taklam deuhah vawk le uh ci, dawm bek ngah tuk nave uhcin,” ti hi. Amuh ten vawk ngangai haw in, tamzet a vawk ngah haw hangin a suuk haw hei cu dokleh thei haw ma hi.
7 Jesuh i ihbelmi a nungzuitu in Peter i lakah, “Topa pahcuh!” ti hi. Peter in, Topa hi tih a theih ten a vante a duhsa khawng hangin a angki cu nawhkhah mahtak silhin tui sungah dawksuk hi.
8 Nungzuitu dangte hei in ngasa tuah a dimmi a suuk haw cu dokngutin, tuimawkah hen haw hi. Lei pen khawla ngawlin pi za thum hawngah hi.
9 Tui mawkah a kaih suak ngah haw ten meiling lak a, ngasa le cangho emsa khi mu haw hi.
10 Jesuh in amuh tei lakah, “Na matsa uh ngasa cu cawi hem un,” ti hi.
11 Simon Peter cu hawmkuang sungah kaito in ngasa ngengzet a dimmi suuk cu tui mawkah dokto hi. Mah ngasa cu pum za le sawm nga le pa thum hi; mahtizahin tam naven suuk cu balkek ma hi.
12 Jesuh in amu nelah, “Hung unna, zingeih ei un,” ti hi. Nungzuitu tei lak pen, “Nang akua kam,” tih a dong ngamtu kuamah um haw ma hi. Itahim titale Topa hi tih cu thei haw hi.
13 Jesuh cu hawh a, cangho cu la in pia hi, mahten ngasa vang cu pia bok hi.
14 Hihi cu Jesuh thihnak pen a thawhkik nungten a nungzuitu tei nelah a vei thumnak a langnak hi.
Jesuh le Peter
15 Zingeih a eih ceng haw ten Jesuh in Simon Peter cu, “Johan capa Simon, midang tei keimah a ih haw sangin nangin kei itsaw cim?” tin dong hi. Simon in, “Topa, ka ihlam cu thei leng ci,” ti hi. Jesuh in, a lakah, “Ka tuute cingkhawi in,” ti hi.
16 Jesuh in, “Johan capa Simon, Keimah it cim?” tin a vei nihnak dong lehleu hi. Simon in, “Topa ka ihdan cu thei ci,” tin don hi. Jesuh in, “Ka tuute cingkhawi in,” ti hi.
17 Jesuh in, “Johan capa Simon, keimah it cim?” tin, a vei thumnak dong lehleu hi. Mahti bangin vei thum tian Jesuh in, “Keimah it cim?” tin, a dot hangin Peter cu a thasia in Jesuh i lakah, “Topa nangin ihempoh thei khawng ci. It ing hi tihvang cu thei khawng poh sisi,” ti hi. Jesuh in, “Ka tuute cingkhawi in hi.
18 Thutakin hilh ing; na khanno lai in, na tuangtimin, na nuamnak mun pohah hawh hi ci, mahnaven na tek ten na baanzak tuk ci, miten na van silhsakin, na taihet sak haw tuk a, na nuam ngawlnak munah hawhpih haw tuk,” ti hi.
19 Hiti bangin a tih ten Peter in itih bang thuak tuk a, iti bangin Pathian nelah sunloihnak pia tuk him tih khi Jesuh i theihtiknak hi. Jesuh in, “Ka nungzui in,” ti hi.
Jesuh le Nungzuitu Dang
20 Peter cu nunghek lehin, a nunglamah Jesuh i ih zetmi nungzuitu pa khat mu hi. Hi nungzuitu pa in, an a eih haw laihtakin, Jesuh cu nekin, “Topa zuaktu tuk cu akua him? tin a dongtu khi hi.
21 Peter in mahpa khi amuh ten, Topa, hi pa khi iti bang kam ni?” tin Jesuh dong hi.
22 Jesuh in, “Ka hunleh laklawh tian nung tukin ka deih tale nangca i khak kha kaw? Keimah zui pohin hi!” tin ti hi.
23 Mah hangin hi nungzui pa cu thi tukma hi, tin Jesuh i nungzuitu tei lakah thuthang hi. Mahnaven Jesuh in, “Thi tukma hi a tihnak hi kha ma hi. Ka hunleh tian nung tukin ka deihmi ahi tale nangca in, nangca in, ikaw a poi um?” a tihnak hi.
24 Hi nungzuitu pa cu hi thute a hilhtu hi a, a ngantu hei hi bok hi. Mahten a hilhmi cu man hi tih thei hung hi.
Thu Khupnak
25 Jesuh i bawlmi thildang tampi umlaih hi. Pa khat nung pa khatin ngan khawng bang ahin a ngatmi laibute cu leihum buppi hei ah va tukma hi tin ngaisung ing.