To listen that verse in audio click to Ngawn..
Tuiting Mawkah Mi Damtiknak
1 Mah nungten Jerusalem ah Judah biaknak puai pa khat umin mahlai ah Jesuh cu hawh hi.
2 Jerusalem khua ah Tuu Kongka tihmi um a, mah Kongka elah tuiting pa khat um hi. Mah tuiting mawkah deubuk pa nga zakmi na um a, mah tuiting cu Hebru awnin Bethzathaa tin ti haw hi.
3 Mah deubuk zakmi sungah tina tampi zau teptup haw hi. A khenkhat cu mitcaw, a khenkhat cu kebai, a khenkhat cu khut le ke zawngte hi haw hi.
4 Hun kha khat ten Topa i vancungmi tolhsukin, tui cu phiatik mek hi. Mah tui a phia bek ten tuiting sungah a dawk masabeltu cu a natnak haw pen damnak ngah mek haw hi. Mah hangin a dam ngawltu ten mah tui a phia tuk cu ngak haw hi.
5 Mahlai munah mi pa khat kum sawm thum le kum liat sung a na pa um hi.
6 Jesuh in mahlai munah a zau leleng cu mu in, kum ngeipi na zo tihvang thei hi. Mah hangin Jesuh in, “Dam nuam cim?” tin dong hi.
7 Mahpa in, “Topa, tui a phia ten tuiting sungah a nimtu tuk kuamah um haw ma hi. Tuiting sungah tolh tuk ka tih laih takin midang ten makhelh leleng thong haw,” ti hi.
8 Jesuh in, “Tho inna, na zauphah la inna, hawhin,” ti hi.
9 Thakhatin mahpa cu damin; a zauphah la inna, hawh hi. Mah ni cu Sabbath ni hi.
10 Mah hangin Judah thuneitu ten damnak a ngahtu pa cu, “Tu ni hi Sabbath ni hi, na zauphah na hawhpihmi cu a Daan uhin deihma hi,” tin ti haw hi.
11 Amah in, “Keimah a damtiktu pa in, na zauphah la inna, hawhin ti si!” tin don hi.
12 Amuh ten, “Mahti bangin a titu cu akua kaw?” tin dong haw hi.
13 Mahnaven damnak a ngahtu pa in, Jesuh cu akua him tih thei ma hi, itahim titale mahlai ah mi honpi um haw in, a lak haw pen Jesuh cu na hawh zo hi.
14 A nungten mahpa cu Jesuh in biakinn sungah tawkin “Ngai in! Atu cu na dam zo hangin sual toh pahsun. Mahma tale na humah thilpha ngawl heng dedeuh tuk,” ti hi.
15 Mahpa cu hawhin, Judah lampuitu tei lakah, “Kei a damtiktu cu Jesuh hi,” tin hilh hi.
16 Sabbath ni-in, mi a damtik hangin Jesuh cu langpang haw hi.
17 Jesuh in, a lak hawah, “Ka Pa cu nadek leleng a hih hangin kei vang ka deh kul bok,” ti hi.
18 Mahti bangin a tih hangin Judah lampuitute cu thinuk mahtak haw in, amah thah tum dedeuh haw hi. Sabbath dan palcat bek hi ngawlin Pathian cu ka Pa hi, a tih hangin Pathian bangin amah le mah bawlduncop hi tin ngaisung haw hi.
Capa i Thuneihnak
19 Mah hangin Jesuh in, a lak hawah, “Thutakin hilh ing; Capa in, a mahno in imah bawl thei ma hi. A Pa i bawlmi a muhmite bek bawl hi. Pa i bawlmi cu Capa hei in bawlbok hi.
20 Itahim titale Pa in, a Capa cu it in, a bawlmi hempoh lak khawng hi. Hi sangin bawl tuk a nase saw mi lak hih tuk a, lamdang sazet tuk laih uh ci.
21 Pa in mithi thotikin, nunnak a piak bangin Capa hei in nunnak a deihtu lakah pia bok hi.
22 Pa in, a koi hum hei ah thukhennak bawl ma hi. Capa lakah thukhen theihnak pia zo hi.
23 Mah hangin Pa a upattu hempoh ten Capa vang upat bok haw tuk hi. Kua hei hihen Capa a upat ngawltu cu a tiiktu a Pa vang upat bok haw ma hi.
24 Thutakin hilh ing; kua hei hihen ka otmi zain, kei a tiiktu a um tale kumkhua nunnak nei hi. Thukhennak tawk ngawltohin, thihnak pen nunnakah tum zo hi.
25 Thutakin hilh ing hi; mithi ten Pathian Capa i aw a zak haw hun heng tuk bek hi ngawlin, atu-in, a zatu hempoh ten nunnak a ngah haw hun heng li zo hi.
26 Pa amah loli khi nunnak bulpi hi. Mah hangin Capa vang nunnak bulpi in bawl zo hi.
27 Mahten Capa cu Mihing Capa a hih hangin thukhennak thupia hi.
28 Hi bang a hih hangin lamdangsa pahsuh un. Mithi hempoh ten a aw cu zain,
29 a inn khan sung haw pen a tulnak haw hun heng tuk hi; thilpha a bawltute cu khan pen tholehin, nung haw tuk hi; mahten thilpha ngawl a bawltute cu tholeh bok haw tuk naven lawlmi hi haw tuk ti hi.
Jesuh Ca In Theihpihtu
30 Jesuh in, “Keima thu in imah bawl thei mang hi. Thukhennak ka bawl tale Pathian i hilhmi bangin bawl ing; mah hangin ka thukhennak cu dik hi. Itahim titale ka deihmi bawl tuk tum mang. Kei a tiiktu i deihmi bek bawl tum ing.
31 Keimah in keima thu bek ka hilh tale ka thuhilhmi cu a man ngangai hi tih theih tukma hi.
32 Mahnaven keima ai-in keima thu a hilhtu tuk midang pa khat umin, ka thu a hilhmi cu man tih thei ing.
33 Johan lakah na kamtai uhte hah uh ci, amah in thuman hilh hi.
34 Hi bangin ka tih ten theihpihtu mihing neih kul ing ka tihnak kha ma hi. Nunpatnak na ngah theihnak tuk uhin ka hilhmi hi.
35 Johan cu a vakmi mei inn bang hi a, a vaknak cu hun comno sung bek pahcawi uh ci.
36 Mahnaven keima ai-in ka thu la theihpihtu umin, Johan i tettikhanmi sangin ngeng saw hi; mahmi cu Pa i piakmi ka bawl mite hi. Mah ka bawlmi in, Pa i kei a hahnak thu langtik hi.
37 Mahten kei a hahtu ka Pa hei in, ka thu cu mite theitik hi; a aw za awng ma uh ci. A mel vang mu awng ma uh ci;
38 A thuhilhmi vang na lungmu sung uhah koih ma uh ci, itahim titale a tiikmi umma uh ci.
39 Lai Thiangtho sialin cung uh ci; mah bangin na cunnak uh cu hi Lai Thiangtho sungah kumkhua nunnak mu tuk ung tin na ngaihsut uh hang hi. Hi Lai Thiangtho cu a venghawngin keima thu a hilhtu hi.
40 Mahnav en nunnak ngah tukin ka lakah hung nuamcuang ma uh ci.
41 “Mihing tei lak pen pahcoihnak ngah tukin zei mang.
42 Mahnaven iti bang uh cim tih thei ing a, na lungmu sung uhah Pathian na ihnak uh umviang ma hi.
43 Ka Pa i thuneihnak tuah hung naveng sang nuamma uh ci. Mahnaven mi pa khat cu ama thuneihnak tuah hungin amah saw cu pom uh ci.
44 Pa khat le pa khat lak pen pahcoih tuk cu nuamzet uh ci. Mahnaven amah bek Pathian ummi lak pen pahcoihnak tuk hei tum ma uh ci. Mahtin ahi tale itin kaw kei na up theih tuk uh?
45 Mahnaven kei hi Pathian nelah nangmuh mawhsiattu hi tukin ngaisung pahsuh un. A humah muansannak na neihzet uhmi Moses hihim khi nangmuh mawhsiattu na hi tuk hi.
46 Moses khi um ngangai na hi uhta ahin keimah vang hi um bok tuk uh ci. Itahim titale Moses in keima thu ngan hi.
47 Mahnaven ama ngatmi na up uh ngawl hangin ka hilhmi hi itin him na up theih tuk uh?” tin ti hi.