To listen that verse in audio click to Ngawn..
Jesuh le A Naute
1 Mahceng ten Jesuh cu Galilee ngam lamah zin kawkawi naven Judah ngam lam cu zin nuam ma hi. Itahim titale mahlai mun a um Judah thuneitu ten amah a thah nuam haw hangin hi.
2 Judah tei Deubuk Puai cu naizet toh hangin,
3 Jesuh cu a nau ten, “Hilai pen Judah ngamah hawhta inna, na thil bawlnak le na nadehnakte na nungzuitu ten mu bok haw tahen.
4 Miten keimah mu bok haw nahen a ti nuam ten a nadehnak haw selcip awng haw ma hi. Hi bang dekli na hih ten lei buppi in, na nadehnak thei bok haw tahen,” tin ti haw hi.
5 A suahpihte ngangcang hei in amah um kha haw ma hi.
6 Jesuh in, “Ka hun heng ma laih hi. Nohte cu man hilhial leleng uh ci.
7 Nohte cu leihumpi in, hua thei ma naven kei cu hua hi. Itahim titale na thil bawldan uh pha ma hi tin ka hilh leleng hang hi.
8 Puainakah hawhta un hi. Kei cu hawh tuk mang. Ka huncan kim ma laih,” tin ti in,
9 amah cu Galilee ngamah umhih hi.
Deubuk Puai Ah Jesuh Hawh
10 A nau tei hawh ceng ten Jesuh cu puainakah hawhleh bok hi. Mahnaven langpaangzet hawh ngawlin hawh kuhden hi.
11 Judah upa ten puainakah zei haw in, “Ilai ah um him?” tin dong haw hi.
12 Jesuh i thu cu mipi ten sonkuh li haw hi. Khenkhat ten, “Mipha hi,” tin ti haw naven khenkhat ten, “Pha ma, mizol kawkawi thong hi,” tin ti haw hi.
13 Mahnaven Judah upate a lau haw hangin a thu cu kuamah in tangzal zetin son ngam haw ma hi.
14 Hi puai a celh kuan haw ten Jesuh cu Biakinn ah hawhin thuzilhnak nei pan hi.
15 Judah upa ten lamdangsa in, “Hi pa hi tawng le kai awng ma si; Iti bangin hi zazah thei ceng nantim?” tin ti haw hi.
16 Jesuh in, “Tu a, nohte ka zilhmi hi keima thu hi ngawlin keimah a tiiksuktu Pathian lak pen a hengmi thu hi.
17 Pathian i deihnak a bawl nuam ngangai ten ka zilhmi thu hi Pathian lak pen a heng ngangai mi maw, keima lungmu thong him tih cu khenkhuai thiam haw tuk poh hi.
18 Mai deihdanin mi a zilh theite cu ngual tei sunloih le thangphat tuk zeiduntute haw hi. Mahnaven a tiiktu i minthannak tuk bek a deihtu cu thuman son hi. A sungah zolthu umma hi.
19 Moses in nohte thukham pia hi ma maw? Mahnaven kuamah in zui ma uh ci. Ita keimah lehlam that tukin ngaisung li uh cim?” tin Jesuh in ti hi.
20 Mi hempoh ten, “Na sungah khawhuai um hi tuk hei! Akua in kaw nang that tukin a tumtu?” tin don haw hi.
21 Jesuh in, “Nalamdang pa khat ka bawl ten lamdangsa khawng uh ci.
22 Moses in, na canau uhte a vuncep haw tan tuk uh ci tin, a hilh hangin a hun kim ten Sabbath ni ahi vangin tan memek uh ci. A pan masabeltu cu Moses hi kha ngawlin, na pu le pate haw hi.
23 Moses Daan palcat ngawlnak tukin Sabbath ni-in, na capa uhte vuncep na tan uh tale Sabbath ni-in, mi pa khat ka damtiknak humah ita thinuk uh cim?
24 A pualambek zo in, thukhen paih ngawlin, thuman a hihnak zo in khen saw un,” ti hi.
Hi Pa Khrih A Maw?
25 Jerusalem khua a, mi khenkhat ten, “Thah tukin a zoh lih haw cu hi pa a maw?
26 Zo un! Langtaak zetin mipi mai ah thuson li naven kuamah in langpang po haw ma hi. Lampuitu upa ten hi pa cu Khrih hi tih a theihciang tatak haw hang poh hi nantih maw?
27 Khrih a hen ngangai ten ilai lam pen hung tuk him tih kuamah in thei haw tukma hi. Mahnaven hi pa cu ilai pen heng hum tih cu thei khawng si ung,” ti haw hi.
28 Jesuh in mahtibang thu a zilh lih laih takin, “Keimah hi thei ngangai uh cim? Keima thu in, a hung hi kha mang hi. Keimah a tiiktu cu up tak ngangai mi hi. Noh ten keimah a tiiktu pa cu thei ma uh ci.
29 Mahnaven kei cu thei ing. Itahim titale ama lak pen hung ing a, a tiiksuktu cu amah hi,” tin nging zetin au hi.
30 Mahten amah cu man nuam haw naven kuamah in, a humah khut ha thei haw ma hi. Itahim titale a huncan kim ma laih hi.
31 Mahnaven mi honpi sung pen mi tampi ten amah um haw in, “Khrih i hen ngai ten hi pa sangin nalamdang tam saw bawl thei a ni maw?” tin ti haw hi.
Man Tukin Cial Haw
32 Farasi ten mi honpi tei hi bangin thu a son kuh huhum lih a zak haw ten thiampi upate tuah Jesuh man tukin biakinn cingtu palik khenkhatte cial haw hi.
33 Jesuh in, “Dawmlaih sung cu nangmu lakah um hih tung a, mah nungten keimah tiiktu pa i lakah hawh tung hi.
34 Keimah zei li tuk nave uhcin tawk tukma uh ci. Itahim titale ka umnak tuk munah nohte hawh thei tukma uh ci?” tin ti hi.
35 Mah hangin Judah thuneitute cu pa khat le pa khat, “Tawh theih ngawl tukin ilai mun poh hawh tum nantim? Judah tei umnak khuapi pa kha khatah hawhin, Grik mite zilhnuam hi nantih maw?” tin ti haw hi.
36 “Keimah zei tuk nave uhcin tawk tukma uh ci. Ka umnak tuk munah nohte hawh kha thei tukma uh ci,” ti hi. “A sullam i nantim?” tin ti haw hi.
Nunnak Ciktui
37 Puainak ni dawlbel cu a thupibel ni hi. Mah ni-in, Jesuh cu nging zetin, “Akua hei hihen dang a dum mite ka nelah hungin in un.
38 Lai Thiangtho sungah, ‘Keimah a umtu hempoh tei sung pen nunnak ciktui put tuk hi,’ tin a tihmi bangin hituk hi,’ tin ti hi.”
39 Jesuh i hilhnuammi cu Hawvang Thiangtho thu hi. Mah Hawvang Thiangtho cu amah umtu hempoh tei ngah tukmi hi. Hi hunlaihin Hawvang Thiangtho cu piakin umma laih. Itahim titale Jesuh cu sunloihnak tuah thawhtik hi ma laih hi.
Mipite Khenkhek Haw
40 Hi thu a zak haw ten khenkhat ten, “Hi pa cu profet ngangai hi,” tin ti haw hi.
Judah Upa Ten Um Haw Ma
45 Biakinn cingtu palikte cu kikleh haw in, thiampi upate le Farasi ten, “Ita amah hunpih ma uh cim?” tin dong haw hi.
46 “Hi pa bangin kuamah in thuson awng haw ma hi,” tin don haw hi.
47 Farasi ten, “Nangmuhte vang zol cih ngah zo bang um si!” tin dong haw hi.
48 Farasi ten, “Judah upate le Farasi mite hei hihen, amah a umtu pa khatno bek na theih uh um maw?
49 Mi honpite cu Moses Daan a theih haw ngawl hangin, Pathian i tamsiat thuak haw,” tin ti haw hi.
50 Jesuh a tawk awngtu Farasi mi, Nikodemas in, amuh tei lakah,
51 “Eimu Daan ah, kuamah in ama thu a zak masak laih uh ngawl le a bawlmi amuh uh laih ngawlin khial hi, tin ti thei tukma hung,” ti hi.
52 Amuh ten, “Pha hi, nang hei hi Galilee lam pen cim? Lai Thiangtho sungah sialteh himpo inna, Galilee lam pen profet piang awng hihim tukma, tih thu thei tuk ci,” tin don haw hi.