To listen that verse in audio click to Ngawn..
A Sual Laihtak Matmi Numei
1 Mi hempoh cu innah pin haw naven Jesuh cu Olif Mual humah hawh hi.
2 A zingten zingtungno in Biakinn ah hawhleh in, mi honpi in amah cu kim pimpem haw a, Jesuh cu khungin thuhilh pan hi.
3 Daan zilhtu le Farasi ten numei pa khat cu pano dang tuah a sual lih haw laih takin a mat haw mi nu hunpihin, mi tampi mai ah dingtik haw hi.
4 Jesuh lakah, “Sazapa, hi nu hi pano tuah a sual laihtak haw in matmi hi.
5 Moses i piakmi Daan bang ahi tale himi nu cu suang tuah seh hup tukmi hi. Nang aw, itin ngaisung cim?” tin dong haw hi.
6 Hitih bangin thu a dot hem lih haw cu a humah sual zei nuamin, thangsiah kuhnim haw hi. Mahnaven Jesuh cu khungin, lei ah a khut tuah lai ngan hi.
7 Mahti bangin thu a dotlih haw ten Jesuh cu khungto lehin, “Nangmu sung pen sualnak a bawl awng vingviang ngawlmi in suang tuah sep masabel hen,” ti hi.
8 Mahceng ten kun lehin, lei ah lai ngan lehleu hi.
9 Hi thu a zak haw ten pa khat nung pa khat nungkik pepelin tai leleuh hawta hi. Upa deuh ten tai kuh pan masabel haw hi.
10 Jesuh cu khungto lehin, “Numei nu aw, ilai hawh khawng hawta kaw?” tin dong hi.
11 Numei nu in, “Topa, pa khatno hei um haw ma hi,” tin don hi. Jesuh in, “Kei hei in, na sual thukhen sak tuk mang hi. Hawh inna, sualleh viang toh pahsun,” ti hi.
Jesuh Cu Leihum Vaknak
12 Jesuh in Farasi tei lakah, “Kei cu leihum vaknak ing hi, akua hei hihen keimah a zuitute cu nunnak khuavak nei haw tuk a, khuathim sungah vakvai haw tukma,” ti hi.
13 Farasi ten, “Nangma thu lala son duncop li sisi. Na sonmi cu a sullam nei ma hi,” tin ti haw hi.
14 Jesuh in donlehin, “Mah kha ma hi. Keima thu lala ka son cop li vangin ka sonmi thu cu thuman hi. Itahim titale ilai pen hungin, ilai ah hawh tung kaw tihvang thei zo ing. Nohten ilai pen hung ing a, ilai lamah hawh tung kaw tih hei thei ma uh ci.
15 Noh ten mihingdan zui in thukhen uh ci. Kei in kuamah i humah thukhen mang hi.
16 Mahnaven thu ka khen tuk bang ahin, ka thukhennak cu thuman hi tuk hi. Itahim titale hi thu ah keimah nguakcang kha mang hi. Kei a tiiksuktu ka Pa cu keimah tuah um kawm ung hi.
17 Nangmu Daan sungah mihing tetti pa nih cu a thu haw a cundun tale, a son haw mi cu thuman hi tin ngatin um hi.
18 Tulaih takin kei ca in ka tetti cu keimah hi toh ing. Ka tetti dang cu keimah a tiiktu ka Pa khi,” ti hi.
19 Amuh ten, “Na Pa cu ilai ah kaw a um?” tin dong haw hi. Jesuh in, “Keimah hei thei ma uh ci, ka Pa hei thei ma uh ci. Keimah na thei uh bang ahin ka Pa vang thei bok tuk nave uhcin,” tin don hi.
20 Jesuh i thuhilhnak mun cu, Biakinn sung a, sumpi koihnak mun hi a, ama huncan a kim laih ngawl hangin kuamah in man haw ma hi.
Ka Hawhnakah Hawh Thei Tuk Ma Uh Ci
21 Jesuh in amuh tei lakah, “Kei cu hawhta tung hi; keimah cu zei tuk na naven uhcin na sualnak sung uhah thi tuk uh ci. Ka hawhnakah hawh thei tukma uh ci,” tin ti hi.
22 Mah hangin Judah thuneitu ten, “Ka hawhnakah hawh thei tukma uh ci, a tihmi khi amah le mah poh that duncop nuam hi nantih maw?” tin ti haw hi.
23 Jesuh in, “Nohte cu leihummi hi uh ci. Mahnaven kei cu humlam pen hung ing. Nohte cu hi leihum pen uh ci. Kei cu hi leihummi hi kha mang hi.
24 Mah hangin na sualnak uhah thi tuk uh ci tin ti ing. Mahten ‘Keimah cu Keimah ing hi’ ka tihmi na um uh ma tale na sualnak sung uhah thi ngangai tuk uh ci,” ti hi.
25 Amuh ten, “Akua nge cim?” tin dong haw hi. Jesuh in, “A pattungin ka hilh lelengmi khi ing hi.
26 Nangmu lakah thuson tuk le thuhilh tuk tampi nei ing. Keimah a tiiktu cu thutak muantakzet hi a, leihumah ama lak pen ka zakmi thute bek hilh ing,” tin don hi.
27 Jesuh i a pa i thu a hilhmite cu amuh ten thei zo haw ma hi.
28 Mah hangin Jesuh in amuh tei lakah, “Mihing Capa na khaitoh uhten ‘Keimah cu Keimah ing hi’ tih thei tuk uh ci. Keima thuneihnak tuah imah bawl mang, Pa i hilhnak bangin thuson ka hihlam thei tuk uh ci.
29 Keimah a tiiktu Pa hei cu keima lakah umin; ama deihnak bangin na ka deh hangin keimah nguakcang zamthong ma,” ti hi.
30 A thuzilhmi a zatu mi tampi ten amah cu um haw hi.
Thutakin Suakcatik Tuk
31 Jesuh in, amah a umtu Judah mitei lakah, “Ka thuzilhnak na zui uh tale ka nungzuitu tatak hi tuk uh ci. 32 Thutak thei tuk uh ci a, mah thutakin nohte suakcatik tuk,” ti hi.
33 Amuh ten, “Kohte cu Abraham casuante ung hi. Kuamah i sila in, um awng ma ung, mah hangin suakca tuk hi uh ci, na tihmi sullam cu i hum?” tin dong haw hi.
34 Jesuh in, “Thutakin hilh ing. A sualtu pawpoh cu sualnak i sila hi.
35 Sila ten a umnak tei innkua ah um leleng haw ma hi. Mahnaven capa ngangai cu um leleng hi.
36 Capa in nohte a suakcatik tale a suakca ngangai mi hi tuk toh uh ci.
37 Abraham i casuante na hih uh cu thei leng ing. Mahnaven ka thuzilhnakte na pom nuam uh ngawl hangin keimah that tukin sawm li uh ci.
38 Kei cu ka Pa i laksami thute bek phuang ing. Mahnaven nohten na pa uh i hilhsa bek bawl uh ci,” ti hi.
39 Amuh ten, “Ka pa uh cu Abraham hi,” tin don haw hi. Jesuh in, “Abraham i casuan ngangai na hi uh tale ama bawlmi khi bawlbok tuk uh ci.
40 Hilh tukin ka tuptah lelengmi cu Pathian lak pen ka zakmi thutak khi hi. Mahnaven keimah lehlam thah tum uh ci. Abraham in mahti bangin bawl awng ma hi.
41 Nohte cu na pa uh i bawlmi bangin bawlbok uh ci,” tin don hi. Amuh ten, “Kohte cu casawn hi kha ma si ung. Kohten Pa, pa khat nei ung a, Pathian amah khi hi,” tin don haw hi.
42 Jesuh in, “Pathian cu na pa ngangai uh ahi tale keimah it tuk uh ci. Itahim titale kei cu Pathian lak pen hungin, atu-in hilai ah um ing. Keima thu in hung cawm mang hi. Keimah tiiktu pa i thu tuah hung ing.
43 Ita ka hilhmi thu hi thei zo ma uh cim? Ka thu phuanmi na ngaih uh ngawl hangin hi.
44 Nohte cu na pa uh Satan i ca hi uh ci. Na pa uh i deihnak bangin nungca nuam uh ci. Amah cu a pattung himpo in laithat hi. Thutak khi ituk mahin len awng ma hi. Itahim titale a sungah thutak umma hi. Zolthu a son ten a bawl lih sa mek bawlleh sal cu poh hi. Itahim titale amah cu zolthu son theimi hi a, zolthu hempoh i pa hi.
45 Kei in thutak ka phuan ten keimah um nuam ma uh ci.
46 Nangmu lakah ka sualnak a mutu kua um uh cim? Thutakin hilh ing. Ita keimah um nuam ma uh cim?
47 Pathian lak pen a hungmi in Pathian i thu cu ngai hi. Mahnaven nohte cu Pathian lak pen a hengmi na hih uh ngawl hangin a thu ngai nuamma uh ci,” ti hi.
Jesuh le Abraham
48 Judah miten, “Nang cu Samaria mi hi ci. Na sungah khawhuai tum hi, ka tih uhmi khi thu ngangai si mei?” tin ti haw hi.
49 Jesuh in, “Khawhuai hei nei mang hi. Kei cu ka Pa upat ing. Mahnaven nohten keimah zawnsak uh ci.
50 Keimah le keimah sunloihnak zei kha mang hi. Mahnaven a zeisaktu pa khat um hi. Thu a khen ten keima lamah tang hi.
51 Thutakin hilh ing. Ka thu zuitute cu ituk mahten thi haw tukma,” ti hi.
52 Judah ten, “Atu-in hawvang sia nei ci tih a ciang zetin thei ung hi. Abraham cu thi zo hi. Profet hempoh vang thi khawng zo haw hi. Mahnaven nangin, ‘Ka thu a zuitute cu ituk mahten thi haw tukma hi,’ tin ti ci.
53 Ka pa uh Abraham cu thi zo hi. Mahti bang ahi tale Abraham sangin ngeng saw ing tin maw na ngaihsut? Mahten profet hempoh thi khawng zo haw si. Akua ing tin ngaisungdun kam?” tin ti haw hi.
54 Jesuh in, “Keimah pahcawi duncop tale keimah le keimah pahcoih dunnak cu imah man nei tukma hi. Keimah a pawhcawitu cu ka Pa hi. Mahmi cu ka Pathian hi, tin na tih uhmi khi hi.
55 Nohten amah cu thei awng ma uh ci. Mahnaven kei in thei ing. Thei mang ka ti ahin nangmuh bangin zolthu son hi bok tung hi. Mahnaven amah cu thei ngangai ing a, a thu vang mang ing.
56 Na pu uh Abraham in keima ni le hun amuh tuk khi ngakhelzet hi. Amuh ngangai ten lungdamzet hi,” tin don hi.
57 Judah miten, “Kum sawm nga hei kim laih ngawl ngen iti bangin Abraham cu mu kha thei cim?” tin ti haw hi.
58 Jesuh in, “Thutakin hilh ing. Abraham pian laih ngawlin kei um zo ing hi,” tin don hi.
59 Amah sehnak tukin suang khul haw hi. Mahnaven Jesuh cu Biakinn pen tulin ngelh vawk hi.