Tihem Theite Ngallin Piaknak (Mt 10:26-27)
1 Mihing cu a thawng tampite cu cil khadun susuihin, a tawhdun lih haw laih takin Jesuh in, a nungzuitu tei lakah hi bangin hilh hi, “Farasi tei naman khi na ngalling un hi. Ka sonnuambelmi cu a ultunnak haw khi hi.
2 Ilam banglam hei hihen khuhmi pawpoh cu hon khawngin um tuk a, thu-ip hempoh phuankehin um tuk hi.
3 Khuathim sung a, na son uhmi thu-ip hempoh khi sun ni cangcai ah mi hempoh zak khawng hi tuk a, inn khahkhupin, na sonkuh uhmi thu vang innkuul hum pen au in um tuk,” ti hi.
Akua Kaw Lau Tuk? (Mk 10:28-31)
4 Jesuh in, “Ka ngualcamte aw, noh tei lakah hilh ing: Taksa pumpi bek that thei amah sangin a nase saw dang a bawl theih ngawl cu laukha viang pahsuh un hi.
5 Akua saw lau tuk him tih hilh tung hi. A thah celh ten Hell khuk sung a, khiak theihnak thuneitu Pathian khi lau saw un. Ka hilhmi hi sang unna, amah hi na lau tuk uhmi hi.
6 “Kawllit pa nga cu pia nih tuah zuak haw ma maw? Mahnaven Pathian in pa khatno hei phawkngil ma hi.
7 Na lu hum uh a, samzangno tianin sial khawng hi. Mah hangin thinnau viang pahsuh un hi. Kawllit tampi sangin sunglawi saw leleng uh ci.
Khrih Phuannak le Nialnak (Mt 10:32-33; 12:32; 10:19-20)
8 “Nohtei lakah hilh ing. Akua abang hei in, keima ta a hihnak mitei mai ah a phuang ngamtu cu mihing Capa vangin Pathian vancungmi tei mai ah keima mi tin sonleh bok tuk hi.
9 Mahnaven mi mai pen kei a nialtu cu mi capa in Pathian i vancungmi tei mai pen niallehbok tung hi.
10 “Kua hei hihen, Mihing Capa a sonsiatu cu ngaihthiam hi tuk naven Hawvang Thiangtho a sonsia tu cu ngaihthiam hi tukma hi.”
11 “Biakinn ah hei hihen, ngamuktu ahimata hotu bawi tei mai ah a pui haw ten iti bangin awn tung him tih thinkham pahsuh un hi.
12 Itahim titale mah hun ten na ot tuk uh cu Hawvang Thiangtho in hilh tuk hi,” ti hi. Mihau Sil Tehkipnak
13 Mi honpi sung pen mi pa khatin Jesuh lakah, “Sazapa, ka pa i lo le lam ka co tukmi keimah sembok tukin ka u lakah hilh sakin,” tin ti hi.
14 Jesuh in, “Unau pa aw, noh laklawh a thukhentu tukin le na lo le lam semsaktu tukin akua in ka humah thupia him?” tin don hi.
15 Mahten mipi lakah, “Hampumnak namkim lak pen ngalling unna, cingcai zetin um un hi. Itahim titale mi pa khat i nunnak tatak cu izahta in mihau hei hihen, a nunnak cu a thil neihmi humah umma,” ti hi.
16 Mah nungten Jesuh in hi tehkipnak hilh hi. “Vei khat laihah mihau pa khat umin, a ngamsung pen an tamzet suak hi.
17 A lungmu sungno in, ‘Ka lo sungsuak an koihnak tuk nei lehma toh ing. I ka bawl ahin, pha tuk him?
18 Hitin bawl tung; Ka an koihnak inn phia tung a, ngeng saw deuhin sa tung hi. Mahlai ah ka an le ka na hempoh koih tung hi.
19 Mahten keimah le keimah cu mi bawngpha pa! kum tampi sung a, na kin tukmi thilpha nei zo ci. Na nuam bangin nung haw huahin, ei in, in inna, nop zetin nungin tin tidun cop tung,’ tin ngaisung hi.
20 Mahnaven Pathian in, a lakah, ‘Misil pa! Tuni tak loli in, na nunnak bo tuk a, nangma ca in, na khawl sami hempoh hi akua in co tuk him?’ ti hi,” tin hilh hi.
21 Jesuh in, “Amu ca tukin vankhong tian hauzet haw naven Pathian i mit muhnak pen a hau ngawl mite cu hi mi pa tuah bangve haw,” ti hi.
Pathian Muang Un (Mt 6:25-34)
22 Mah nungten Jesuh in nungzuitu tei lakah, “Mah hangin na eih tuk uhmi an thu ah hei hihen, na silh tuk uhmi puan thu ah hei hihen, thinkhamin, um li pahsuh un, tin nohte hilh ing.
23 Itahim titale nunnak cu an sangin thupi saw hi
24 Va-ak khi zo un: amuh ten anci cing awng haw ma. An hei cawm awng haw ma. An buk le beem hei nei haw ma naven Pathian in vak hi. Nohte cu vano sangin a let tampi in sunglawi saw uh ci.
25 Nangmu sung pen le eih, silh le cen thu ah thinkhamnak hangin a nunnak sautik theicuangtu akua um him?
26 Hizahta thil neuno nangawn bawl thei ma na hi uh tale ita thil dadang thu ah thinkham li uh cim?
27 Ngamsung a paaknote khi iti bangin khang haw him tih khi zo un hi. Na dek haw ma. Nikcen puansilh zei haw ma naven thungai in hilh ing. Solomon kumpipa nangawn a neih le hauhnak hempoh tuah hi pak mawi pa khat zah van mawi nei ma hi.
28 Tuni in um naven zingten a umleh tuk ngawlmi, mei sung a heng tukmi hampa hempoh hei khi Pathian in mahti bangin a tuam tale noh cu van tuah thuam sesem tukma maw i him? Na muannak uh dem leita hi.
29 “Eihtuk le intuk thu bek ngaisungin, thinkham leleng pahsuh un hi.
30 Itahim titale Pathian thu zui ngawl tei ngaihsut lelengmi thu hi. Na pa uhin, na kul uh mite cu thei hi.
31 Mah sangin na Pa uh i uknak thu khi kinmawhin, zei saw unna, thildang cu amah in pialeh tuk,” ti hi.
32 “Tuuhonno aw, lau pahsuh un hi. Itahim titale noh tei lak a Vancung Uknak piak cu na Pa uh i lungdam mi hi.
33 Na neih uhmi thil hempoh zuak khawng unna, na ngah uhmi tangka cu mi ca-ngah sem khawngta un. A sia thei ngawlmi tangka bawm noh tei ca in ngaisung unna, vancungah na tangka uhte khawl un hi. Mahlai munah nguca ten tok kha thei haw tukma hi. Sal ek hei kai thei tuk ngawl a hih hangin ituk mahten paithong tukma hi.
34 Itahim titale na tangka umnak uhah na lungmu uh vang umbok tuk hi” tin ti hi. Ngallinnak Nei Nadekte
35 “Iti bang thil a heng hei in, a ngallingsa in um unna, na mei-inn uh vakin, a mansa lelengin um un hi.
36 Zihuainak puai pen a hungleh tukmi a bawipa haw a ngaktu inncengte bangin ngalling zetin um un hi. A bawipa cu pinin, kongka a khen ten thakhatin kong hon haw tuk hi.
37 A bawipa haw a kihleh ten a hakmi le ngallinnak neimi innceng cu itizah takin lungdamhuai him? Thungai in hilh ing. Mansa hilhialin, a um nungten an ei tukin khungtik tuk a, amah hihimin tuamlawm tuk hi.
38 Zan laih takin, a kihleh hunah hei hihen, mah sangin khuanu saw a kihleh hunah hei hihen ngalling lelengin a ummi cu itizah takin lungdamhuai him?
39 Mahten hi thu hi phawkngil pahsun un hi. Inn neitu pa in nguca tei hennak tuk khi a thei ham tale, a inn sung a tum theih ngawlnak tukin nase zetin cing tuk hi.
40 Mahti bang bokin nohte vang a ngallingsa in um un hi. Itahim titale hung tuk hi tin, a muan mawh khak haw ngawl laih takin Mihing Capa cu heng tuk,” ti hi.
Muantak le Muantak Ngawl Inncengte (Mt 24:45-51)
41 Peter in, “Topa hi tehkipnak hi keimu ca maw, mi hempoh ca tuk him?” tin dong hi.
42 Topa in, “Muantak le a cipmi innceng pa cu akua him? Muantak le a cipmi innceng pa cu a bawipa in, a innpi cingtu tukin le a dang nadektu a hun le can bangno in amu co tuk an eih tui in semtu tukin a koih tukmi khi hi.
43 A bawipa i henleh hun ten a inn a nadek li in amuh mi innceng pa i humah thupha um hi.
44 Thungai in hilh ing. Hi innceng pa hi a bawipa in, a na hempoh cingtu in koih tuk hi.
45 Mahnaven hi innceng pa in, bawipa cu ngei tuk laih hi, tin innceng dang, numei hei hihen pano hei hihen vat kawkawi in, ei le in, in zukhamin lum kawkawi thong ahi tale,
46 a bawipa hung tuk hi tih a phawhkhak ngawl laih takin a bawipa cu hung tuk hi. A bawipa in hawlvawk tuk a, thu ngai ngawl le muantak ngawl mite tuah bawlsiat thuak tuk hi.
47 A bawipa deihzawng thei leng naven ngalling ham kha cuang sap ngawl le a bawipa i deihzawng a dek ngawltu cu vei tamzet vah tawk tuk hi.
48 Mahnaven a bawipa i deihnak theihngawlnak hangin vah tak tian thil a bawl kha tu cu vei demno bek vah tawk tuk hi. Tampi a ngahtu lak pen tampi ngetleh hi tuk a, tampi a piakmi lak pen tampi ngenleh haw tuk hi.
Khentiktu Jesuh (Mt 10:34-36)
49 “Leihumah mei alhtiktu tukin heng ing a, atu-in alh tohleh tih deih ing.
50 Tuiphumnak lak tuk pa khat nei ing a, mahmi ka laak laih ngawl sung cu ka lungmu cawlzet ing.
51 Leihumah lemdunnak puaksuk hi tin ngaisung uh cim? Mah kha ma, lemdunnak hi saw ngawlin khen kheknak puasuk saw ing.
52 Tu pepan innkua mihing pa nga a umte cu khenkhek haw tuk a, pa thum kop khat, pa nih kop khat tih bangin khen haw tuk hi.
53 Pa le a capate dondun haw tuk a, nu le a canute vang dondun haw tuk, teknu le a mote vangin dodun bok haw tuk hi,” ti hi.
Hun Theihtupnak (Mt 16:2-3)
54 Jesuh in mi honpi tei lakah, “Nitumnak lam pen meingo a thim ten, ‘Nguahzu tuk hi,’ na tih uh bangin zusuk ngangai hi.
55 Hanglam huih a theu ten ‘Khuasa tuk hi,’ na tih uh bangin sa ngangai hi.
56 Noh mi ultungte aw lei le van zo in, hun le can thei zo uh ci. Mah tale ita tulaih khang thu um zia thei zo ngawl uh cim?” tin ti hi.
Na Ngalte Tuah Lemdun Un (Mt 5:25-26)
57 “Ita dikcangnak cu khenkhuai cawm thei ma uh cim?
58 Mi pa khatin nangmah sualthu son tukin, zungah a henpih tale zung a henpih ngah laih ngawlin amah tuah lemnak bawl tukin hantiamin hi. Mah ahi ngawl tale thukhentu tei mai tianah nang henpih tuk hi. Thukhentu pa in palik khutah ap tuk a, thawngah khiakin um tuk ci.
59 Ciang zetin hilh ing. Na kuan tukmi a dawlbel pia khat tian na kuan khawng laklawh mahlai munah um tuk ci,” ti hi.