To listen that verse in audio click to Ngawn..
A Paimi Tuu (Mt 18:12-14)
1 Ni khat cu Jesuh i thuhilh ngai tukin siah khontu le misual tin, a lawl haw mite hung haw hi.
2 Farasi le Daan zilhtute cu phu celhculh haw in, “Hi pa in misualte phialin, amu lakah an ngen eihpihta laih,” tin ti haw hi.
3 Mah hangin Jesuh in hi a nuailam a, tehkipnak cu hilh hi.
4 “Nangmu sung pen mi pa khatin tuu za khat nei in, tuu pa khat a pai bang ahin, iti bang bawl tuk heng? Tu sawm kuah le kuah khi a tatnak hawah zamhihin, a paimi tuu pa khat amuhleh laklawh zei het tuk hi.
5 A muhleh ten a lungdam leita in, a ko humah pua in,
6 innah pinpih hi. Mahten ngualcam le a inn nelte samkhawmin, ‘A paimi ka tuuno ka muhleh zo hangin lungdam leita ing. Mah hangin lungdamin puai bawl tuk hung hi,’ tin ti hi.
7 Mahti bang bokin sual sihkik a kul ngawl mipha sawm kuah le kuah sangin sual sikkiktu misual pa khat humah vanhum pen lungdamnak tam saw tuk,” ti hi. A Paimi Tangka
8 Jesuh in, “Mah ahimata, numei pa khatin, tangka cang sawm nei in, mah sung pen cang khat a pai ahin, ihim a bawl tuk? Mei inn vakin, a inn cu buak phiah tuah phiatin, a muhleh laklawh cu ningnawi hempoh phet khawngin zei tuk hi.
9 A muhleh ten a ngualcam le innnel samkhawmin, ‘Ka paihtikmi tangka muleh zo toh ing. Mah hangin lungdamin, puai bawl tuk hung,’ tin ti hi.
10 Mahti bang bokin sual sihkiknak a neimi misual pa khat humah Pathian i vancungmite a lungdamzet haw,” ti hi. A Paimi Capa
11 Jesuh in hi bangin hilh hi: “Mi pa khatin, capa pa nih nei hi.
12 A nauta saw in, a pa i lakah, ‘Pa, ka co tukmi lo le lam atu-in pia in,’ tin ti hi. Mah hangin a pa in, a lo le lam cu khenin, a capa pa nih sem hi.
13 A ngei ngawlin capa nauta saw in, a comi lo le lam cu zuak khawngin, a ngahmi tangka tuah inn pen taitulta hi. Ngam khawlapi ah hawhin, tangka cu deih bangin mang hua huah hi.
14 A neihmi hempoh cu a man khawng limlem ceng ten a tainak ngamah paampi tungin, mahpa cu imah nei lehma toh hi.
15 Mah hangin mahlai ngam a, pa khat pa i lakah a nadehsak tukin hawhin, a vok khaltu tukin a lo ah hawhtik hi.
16 Vok tei eihmi be hawngte khi vonvah ukin, ei bok nuam naven kuamah in eih tuk imah pia haw ma hi.
17 A dawlbel ten a lungcipin, ‘Ka pa i inncengte hei in eih celh ngawlin an nei haw hi. Mahnaven kei cu hilai pen eih tuk hei nei ngawlin a thi tuk toh bekin umthong ing.
18 Ding tung a, ka pa i lakah hawh tung an ka pa i lakah, ‘Pa, nangma mai le Pathian mai ah sual leita zo ing.
19 Ka capa, tin na sam tuk hei in tak lehma toh ing. Mah hangin na nadektu na sal tukin koih zazalin hi, tin ti tung,’ tin ngaisung hi.
20 Mah hangin a pa i lakah hawh tukin tul hi. Lam khawlapi pen a hunlih khi inn pen a pa in mu hi. Hehpih mahtak hangin taitulin, a capa cu kawi in nam hi.
21 A capa in, ‘Pa, nangma mai le Pathian mai ah sual leita zo ing, ka capa tin na sam tuk hei tak lehma toh ing,’ tin ti hi.
22 Mahnaven a pa in, a inncengte samin, ‘Manlangin hung un. Nikcen puansilh phabel la unna, silhtik un. A khutah khutbut bun unna, a ke ah kedam na damtik un hi.
23 Mahten khuino a thaubel khi ngo unna, lungdamnak puai bawl tuk hung hi. 24 Itahim titale ka capa cu thi zo naven nungleh hi. A pai sa hi naven muhlehin um hi,’ tin ti hi. Mahti bangin lungdam puai bawl haw hi.
25 “Mahlai takin a capa upa saw cu lo hawhnak pen lovai a pin tum ten a inn elah lasak aw le lam aw za hi.
26 Mah hangin innceng pa khat samin, ‘Ikaw a bawl lih haw?’ tin dong hi.
27 Innceng pa in, ‘Na naupa himdamno in, a henkikleh zo toh hangin lungdamnakin, na pa in khuino thau ngawh hi,’ tin hilh hi.
28 “A capa upa saw cu a thinuk leita in, innsung hei a tum nuam ngawl hangin a pa taitulin, inn sungah tum tukin leem hi.
29 Mahnaven a capa in, ‘Ngaisung him po tehin, kum hi zong sung pikpek inncengte bangin na nadehsak ing. Na thu vei khatno hei el awng mang hi. Atu-in kei i pia cim? Ka ngualcam tuah ngualnop puai bawlnak tuk keel pa khatno hei pia awng ma ci.
30 Mahnaven hi na capa hi numei pha ngawlte phialin, na neih hempoh theh khek khawng naven na lakah a kihleh ten khui thau ngawh ci,’ tin, a pa cu ti hi. 31 A pa in, ‘Ka capa, nang cu keima lakah um leleng ci, ka neihmi hempoh hi nangmata poh hi.
32 Mahnaven na nau pa hi a thi zo tohmi nungleh hi. Paithong zo toh naven atu-in muleh hung hi. Mah hangin lungdam le thatui in puai bawl tak hihim hi,’ tin ti hi,” tin hilh hi.