Jesuh le Zakia
1 Jesuh cu Jerikho khua a hen ten khua sungah vak pepel hi.
2 Mahlai munah siahkhontu, mihau upa pa khat, Zakia tihmi pa um hi.
3 Jesuh cu akua him tih mu nuamzet naven a dingcom bek sial ngawlin mitam leita haw hangin mu ngah thei hihim ma hi.
4 Mah hangin mi honpi mai ah tai in, mahlai lamah a hawh pepeltu Jesuh a mu nuam leita in, theikung humah kaito hi.
5 Jesuh cu mahlai mun a hen ten a humlam zoto in, “Zakia, manlangin tolhin hi. Tuni na innah caam tung,” ti hi.
6 Zakia cu manlang zetin tolhin, a lungdam zetin Jesuh cu a innah camtik hi.
7 Mahmi a mutu hempoh ten phu celhculhin, “Hi pa hi, misual pa i innah caam si,” tin ti haw hi.
8 Zakia cu dingin, Topa i lakah, “Topa, ngai hihin! Ka neihmi a lang cu mi ca-ngah pia tung a, ka zolmi a um haw tale, a letli in lohleh tung,” ti hi.
9 Jesuh in, “Tuni in, hi pa i innah nunpatnak heng zo hi. Itahim titale hi pa vang hi Abraham i casuan hi bok hi.
10 Mihing Capa cu a paimi zei tukin le nunpan tukin hung,” ti hi.
Sui Tangka Tehkipnak (Mt 25:14-30)
11 Mahti bangin a hilhmi a ngaitu mipi tei lakah Jesuh in tehkipnak tangthu pa khat hilh hi. Amah cu Jerusalem a heng awn toh hangin mipi ten Pathian Uknak vang heng awndiak toh hi tin ngaisung haw hi.
12 Jesuh in, “Vei khat cu bawi upa pa khat um a, ngam khawlapi ah hawhin, kumpi ah a deh nungten pinkik tum hi.
13 Mahten a hawh laih ngawlin a nadektu sawm khat sam a, sui tangka cang khat ten pia in, ‘Hi tuah sumbawl un hi. Izah ngah thei na uh cim? Zo teh hih nung,’ ti hi.
14 A ngamsung mihing ten mah a bawipa cu huazet haw hi. Mah hangin, ‘Hi pa hi kohtei kumpipa tukin deih ma ung hi,’ tih thu hilhleh tukin kamtai hah haw hi. 15 Mahmi pa cu kumpi a can nungten pinlehin, a hen bek ten, a nadekte sum izah ngah haw him tih khi a theih nuamzet hangin, a nadektu sawm khat cu sam hi.
16 Pa khat pa hungin, ‘Topa sui tangka cang khat na piakmi tuah sui tangka a meet sawm khat ngah ing,’ ti hi.
17 A bawipa in, ‘Pha hi. Nang cu nadektu pha hi ci. Na neuno humah na muantak hangin khuapi sawm khat uktu in koih tung,’ tin ti hi.
18 Pa nihnak pa hungin, ‘Topa sui tangka cang khat na piakmi tuah a meet cang nga ngah ing,’ ti hi.
19 Mahpa cu, ‘Khuapi pa nga uktu in koih tung hi,’ tin ti hi.
20 Adang nadektu pa khat hungin, ‘Topa, hilai hah na sui tangka cu um hi. Puanno tuah cuun in, koih ing.
21 Nang cu mi ticikcek na hih hangin lau in koih ing. Nangmata ngawl la thawthongin, anci na pawi ngawl mite vang cawm thawthong thei ci,’ tin ti hi.
22 A bawipa in, ‘Nang nadektu pha ngawl, nangmah vawknak tukin nangma awnkam lala mang tung hi. Mi ticikcek ka hih zia thei ci. Keima ta ngawl vang la in, ka vawh ngawl le ka pawi ngawl mite ka copleh vang thei ci.
23 Mah tale itakaw ka tangka cu tangka koihnak innah na koih ngawl? Na koihta ahin, ka hun kikleh ten a khang tuah ngah tung,’ ti hi.
24 “Mahten mahlai a dingmi tei lakah, ‘A sui tangka cu la unna, sui tangka sawm khat a neitu nadektu i lakah pia un,’ tin ti hi.
25 Mahnaven amuh ten, ‘Sazapa amah cu cang sawm nei zo si,’ tin ti haw hi.
26 A sazapa haw in, ‘Ciang zetin hilh ing. Thil a nei mitei lakah a dang piakbet hi tuk hi. Mahnaven a nei ngawltu lak pen a neihcalam demno nangawn laksak hi tuk hi.
27 Atu-in, kumpi tukin a deih ngawltu ka ngalte cu hilai ah hunpih unna, ka mitmuhin that un,’ tin a kumpipa in ti hi,” tin Jesuh in hilh hi.
Sunglawi Zetin Jerusalem Ah Tum
(Mt 21:1-11; Mk 11:1-11; Jn 12:12-19)
28 Jesuh cu hi thu a hilh ceng ten Jerusalem lamah hawh hi.
29 Olif Mualhum a um, Bethfage le Bethani khua el a hen haw ten nungzuitute pa nih cu masuanah hawhhamtikin,
30 hi bangin thucah hi. “Na mailam uh a khua ah hawhta unna, kuamah i khun awng laih ngawlmi laakno cu khau tuah a khihmi mu tuk uh ci. A khau duk unna, hilai ah kai un hi.
31 Ita dukthong uh nge cim tin, a dongtu a um kha haw tale, ‘Topa in kin hi,’ tin don un,” tin hilh hi.
32 Hawh haw a, Jesuh i hilhnak bangkekin ihempoh cu mu haw hi.
33 Laakno khau a duh lih haw laihin, a neitu ten, “Ita dukthong uh nge cim?” tin dong haw hi.
34 Amuh ten, “Topa in kin hi,” tin don haw hi.
35 Mahten laakno cu Jesuh lakah hawhpih haw a, laakno humah a puan haw phahin, Jesuh khungtik haw hi.
36 Laak hum khungin a hawh ten a hawhnak lampi ah mipi ten a puan haw phah pepel haw hi.
37 Olif Mualhum pen a tolhsuknak mun a hen ten nungzuitute le mi honpi ten Pathian thangphat haw in, nalamdang a bawlmi hempoh amuh haw hangin lungdamin au haw hi.
38 “Topa i minin, a hungmi Kumpipa i humah Pathian muicu um tahen! Vanah lemdaihnak um tahen na, Pathian nelah sunloihnak um tahen,” tin au haw hi.
39 Mi honpi lak a um Farasi khenkhat ten Jesuh cu, “Sazapa, na nungzuitute hi umden haw hen, hilhin hi,” tin ti haw hi.
40 Jesuh in, “Ciang zetin hilh ing. Hite hi a umden haw tale hi suang ten au haw tuk hi,” tin ti hi. Jerusalem Hangin Jesuh Kap
41 Jerusalem cu neek dedeuh haw in, khuapi cu amuh ten Jesuh kap hi.
42 “Tuni in lemdaihnak ca in, a kulmi ihim tih na thei ahin! Mahnaven mu le na mu thei uh si ngawl!
43 Na ngal uhten na elkim uh pen kilcihin, ningli pen a upcih haw hun heng tuk hi.
44 Nangmah le na kulhtian sung a um na mihingte hei hihen, that khawng haw tuk hi. Nangma nunpan tukin Pathian i hen tuk hun na theih ngawl hangin a thuahdunin, a tangmi suang pa khat hei um tukma,” ti hi.
Biakinn ah Jesuh Hawh (Mt 21:12-17; Mk 11:15-19; Jn 2:13-22)
45 Jesuh cu Biakinn sungah hawhin, thilzuaktute hawlvawk khawng hi.
46 “Lai Thiangtho sungah Pathian in, ‘Ka Biakinn cu thungetnak inn tin sam hi tuk hi,’ ti hi. Mahnaven noh ten nguca tei ngelhnakin suaktik uh ci,” tin liat hi.
47 Nisialin Biakinn sungah Jesuh in thu hilh hi. Thiampi upate, Daan zilhtu le hotu ten Jesuh cu that nuam haw hi.
48 Mahnaven a thah theihnak haw tukin lampi zei thei haw ma hi. Itahim titale mi hempoh ten a thuhilhmi ngai nuam mahtak haw hi.