Numei Nu i Sumpi (Mt 12:41-44)
1 Jesuh in, a elkim zo in mihau tei Biakinn a, tangka kuang sungah sumpi a khiak lih haw mu hi.
2 Mahten meivong ca-ngahzet pa khatin sum pia nihno a khiak khi mu hi.
3 Jesuh in, “Thu ngangai hilh ing. Hi meivongnu in midang sangin tam saw pia hi.
4 Itahim titale midang cu a neih haw sung pen a val bek pia haw hi. Mahnaven hi meivongnu in, a zawngzet vangin a nunnak tukin a neihmi venghawngin pia,” ti hi.
Biakinn Siat Tuk Thu Hilh (Mt 24:1-2; Mk 13:1-2)
5 Nungzui khenkhat ten suang mawizet tuah a tian haw mi Jerusalem Biakinn i mawidan le Pathian lakah biakpiaknak an a piak haw thute son li haw hi.
6 Jesuh in, “Hih hempoh hi mu ten uh ci. Mahnaven suang cu pa khatno hei amu umnak sa lengah umleh ngawltohin, a vawk khawng haw hun heng tuk hi,” tin ti hi.
Haksatnak le Bawlsiatnak (Mt 24:3-14; Mk 13:3-13)
7 Amuh ten, “Sazapa, mahmi cu ituk ten tuk him? Mahten a hun heng zo hi tih theih theihnak tukin iti bang melciknakte um tuk him?” tin dong haw hi.
8 Jesuh in, “Ngalling un; Zoltheihin umta pahsuh un hi. Keima min pu in, mi tampi hung haw tuk a, ‘Keimah hi amah ing hi tih le a hunkim zo hi,’ tin ti haw tuk hi. Mahnaven zui kha viang pahsuh un hi.
9 Ngaldonak le buainak thu na zak uhten lau pahsuh un. Hiti bang thu cu heng masa tuk naven a tawpnak hun nai hi tihnak kha ma laih hi.”
10 Ngam khat le ngam khat dodunin, a cozah pa khatin, a dang acozah pa khat sim tuk hi.
11 Leihum mun tihkimah hiinhing tuk a, paam le natsia namkim heng tuk hi. Nalamdang le a lauhuai zetmi cu van pen lang haw tuk hi.
12 Mahti bang thil a hen laih ngawlin noh cu mat tawkin, bawlsiatnak thuak tuk uh ci. Pumkhawm innah na thu uhte son tukin le thawng khiak tukin midang tei khutah piakin um tuk uh ci. Keima min hangin kumpi bawi le uktu bawi tei mai ah tulpih haw tuk hi.
13 Mahmi cu nohtei ca in Thuthangpha phuannak hun pha hi tuk hi.
14 Iti bangin hupdun kam nung tin, a laih ngawlin na thinkham pahsun un.
15 Itahim titale awn kam thiamnak le cihnak nase zetin pia tung a, na awn uh a don theitu tuk pa khat hei um haw tukma hi.
16 Na nu le pa, na u le naute, na sangngam uh le na ngualcam uhten nangmuh zuak haw tuk hi. Thah a tawktu hei um tuk uh ci.
17 Keimah hangin mi hempohin hua haw tuk hi.
18 Mahnaven na lu hum uh a, samzang khatno hei zuk tukma hi. 19 Kho zetin, na ding uh tale nunpatnak ngah tuk uh ci,” tin ti hi.
Jerusalem Siatnak Tuk Hilh (Mt 24:15-21; Mk 13:14-19)
20 Jesuh in, “Ngalkap ten Jerusalem a kilcih khawng na muh uhten a ngei ngawlin sia tuk tih, na theita un hi.
21 Mahten Judea a, um ten mual humah tai un, khuapi sung a um ten khuapi zamsanta un hi. Ngamsung a um ten khuapi sung zuan tukin kik pahsuh un hi. 22 Itahim titale hihi cu, ‘Dantatnak Ni,’ hi tuk hi. Mah hangin Lai Thiangtho i a hilh hamsa hempoh a kimnak hun hi tuk hi.
23 Mah hun cu numei naupai le naukai nei tei ca in itizah takin haksa tuk nen tim! Hi leihumah haksatnak heng tuk a, Pathian dantatnak cu mihing tei humah heng tuk hi.
24 Khenkhat cu namsau tuah that haw tuk hi. Khenkhat cu ngam tihkimah salin, kai kawkawi haw tuk a, Jerusalem cu Pathian thei ngawl ten a hun haw a kim laklawh a ke nuai ah cilpek haw tuk hi,” tin hilh hi.
Mihing Capa Hunnak Tuk (Mt 24:29-31; Mk 13:24-27)
25 Jesuh in, “Ni le hade, aksi tei humah nalamdangzet um tuk hi. Leihum buppi ah vansannak um tuk a, tuipi nging thawm le tui hualpi khangte khi lau haw tuk hi.
26 Leihum buppi ah a heng tukmi thu a ngaihsut haw ten mi tampi cu thinsu leita haw hangin lungmitin lum haw tuk hi. Itahim titale vanhum a ummi cu a ping le pangah thehkeh khawng haw tuk hi.
27 Mahten Mihing Capa cu meingo humah sunloihnak le a nase zetmi huham tuah lang tuk hi.
28 Hitih bang thu a hen pepel ten dingin, humlam zo un hi. Itahim titale na nunpatnak ni uh nai zo hi,” ti hi.
Theikung Pen Zilmi (Mt 24:32-35; Mk 13:28-31)
29 Jesuh in hi tehkipnak cu hilh hi. Thei kungah hei hihen, thingkung dang thu ah hei hihen ngaisung teh un hi.
30 A ceh tawtin, a pat ten khuakhal hun nai zo hi, tih thei cawm uh ci.
31 Mahti bang bokin, a hum a, thu a kim ten Pathian Uknak cu nai zo hi tih na theita un hi.
32 “Atu a nunglaih tei thih khawng laih ngawlin hi thil hengkim khawng tuk tih khi phawkngil pahsun un hi.
33 Van le lei cu paithongleh haw tuk naven ka thu cu paithong thei tukma,” ti hi. Ngallin Kul
34 Jesuh in, “Ngallingin um un! Puai bawlin zu inthah le sa ei hei in hihen, nun khuasaknak helhkamin, na umta pahsuh un hi; na um sual uh tale na phawhkhak uh ngawlin mah Ni cu heng tuk hi.
35 Thang bangin awk tuk hi. Itahim titale mah Ni cu Leihum mi hempoh tei humah heng tuk hi.
36 Ngalling zetin um unna, a heng tukmi thil hempoh himdamno nawkvawk theihnak tukin le Mihing Capa i mai ah na din theihnak tuk uhin tawp ngawlin thungen un,” ti hi.
37 Jesuh cu mah hun hawng khin biakinn ah thuhilh hi. Taklam ten tulin Olif Mualah caam thei mek hi.
38 Mi hempoh cu ama thuhilh ngai nuamin, biakinn ah zingtungno in hawh haw hi.