Jesuh Suahnak (Mt 1:18-25)
1 Mah hunin kumpi Augustus in, a uknak Rom ngamsung hempoh mipum sialnak tukin thupia hi.
2 Hi a masabel mipum sialnak bawl laihin, Quirinius cu Siria ngamuktu hi.
3 Mah hangin akua abang mipum sialnakah mipumsial tukin amu suahnak mun tekah zuan haw hi.
4 Josef cu Galilee ngam a, Nazareth khua pen David kumpipa i suahnak Judea ngam Bethlehem ah hawh hi. Josef cu David casuan a hih hangin mahlai khua cu zuan hi.
5 Mipum sialnakah minkhum bok tukin a hammi Mary tuah hawh ngel haw hi. Mary cu naupai in,
6 Bethlehem khua ah a um haw laih takin a nau hin hun kim hi.
7 A catawntil capa cu hingin, puan tuah tuam a, khui ankuang sungah sial hi. Itahim titale khualbukah ngiahnak tuk a khan co ngah haw ma toh hi. Tuucingte le Vancungmite
8 Mahlai ngam sungah tuucing khenkhatte cu hampa lakah zancamin, a tuute cing um haw hi.
9 Topa i vancungmi pa khat cu amuh tei lakah langin, Topa i sunloihnak cu amuh tei humah vakin, lau mahtak haw hi.
10 Mahnaven vancungmi ten, “Lau pahsuh un! Nohtei ca tukin lungdamnak Thuthangpha puak ing hi, mah Thuthangpha cu mi hempoh ca in lungdamnak ngengbel hi.
11 Tuzan loli in, David khua sungah nangmuh nunpantu tuk Khrih Topa hing zo toh hi.
12 Mahmi sialsiahnak cu hi bangin hituk hi: Nauno cu puan tuah tuamin, khui an eihnak kuang sungah a sial haw mu tuk uh ci,” ti hi.
13 Mah vancungmi tuah a dang van ngalkap honpi thakhat langin, Pathian thangphatnak la sa haw hi.
14 “A sangbel vanah Pathian cu thangphatin um tahen, A ihmi mihing tei umnak hi lei humah lemdaihnak um tahen,” tin sa haw hi.
15 Vancungmite vanah a kihleh nung haw ten tuucing ten, “Bethlehem khua ah hawhin, Topa i hilhmi cu zota nung,” tin pa khat le pa khat son li haw hi.
16 Nawhkhahzet hawh haw a, Mary le Josef le khui an eihnak kuang sung a, sialmi nauno cu mu haw hi.
17 Tuucing ten nauno amuh bek haw ten vancungmi tei nauno thu a hilhham mi cu amuh tei lakah hilhleh haw hi.
18 Tuucing tei hilhmi thu a zatu hempoh ten lamdangsa mahtak haw hi.
19 Mary in hi thute phawk lelengin, thukzet ngaisungin tiamteh li hi.
20 Tuucingte kikleh haw in, a muhmi le a zak haw mi hangin Pathian pahcoihnak lasa thahin pin haw hi. Vancungmi tei hilhnak bangkekin kim hi. Jesuh Minsa
21 Nau vunceptan hun nipi khat lawi ten a min Jesuh tin sa haw hi. Hi min cu a nu i pai laih ngawlin vancungmi tei hilhhamsa mi hi. Biakinn ah Jesuh Ap
22 Moses thukham sung a um bangin Mary le Josef in thiantiknak puai a bawl huncan haw heng hi. Mah hangin nauno cu Jerusalem ah ap tukin hawhpih haw hi.
23 Topa i thukham sungah, “Capa tawntil pawpoh cu Topa i lakah na ap un hi,” tin ngatmi um hi.
24 Mah i humah Topa i daan sungah a um bangin khulo kop khat ahimata lailengno pa nih tuah biakpiaknak nei tukin hawh haw hi.
25 Mah hunin Simeon a tih haw pa cu Jerusalem ah um hi. Amah in Israel tei nunpatnak a ngah haw tuk khi ngak leng hi. Hawvang Thiangtho cu a lakah umin,
26 “Topa i thutiam, Khrih na muh laklawh thi tukma ci,” tin Hawvang Thiangtho in, a lakah ciang zetin phuang hi.
27 Hawvang i lamhuainak hangin Simeon cu biakinn sungah tum hi. Thukham sung a um bangin a kul le sapmi hempoh bawl tukin Jesuh cu a nu le pa ten biakinn sungah tumpih haw hi.
28 Simeon in nauno cu cawi in,
29 “Topa, tuni in, na thutiammi kimtikin, na salpa cu a nunnak nitumtik thei ci.
30 Na mipatnak cu ka mit tuah mu ngangai zo toh ing hi.
31 Mi hempoh mai a, na bawlsa nunpatnak cu,
32 Gentail mitei lakah na lampi langtiktu khuavaknak hi a, na miphun Israel tei lakah sunloihnak hengtiktu hi,” tin Pathian pahcawi hi.
33 Simeon i awnkam a zak haw ten nauno i nu le pa ten lamdangsa mahtak haw hi.
34 Simeon in thupha muicu a piak celh ten a nu Mary lakah, “Hi nauno cu Israel miphun tampi tei lupbahnak tuk le mi tampi tei nunpatnak tukin Pathian i tenmi hi. Hi pa cu mi tampi tei sonsiatmi le Pathian lak pen a hungmi melciknak tuk hi.
35 A lungmu sung haw a thu-ip langtiktu in cang tuk hi. Na lungmu cu khawngaih kahnak namcem sut bangin sun tuk hi.”
36-37 Asher hinnam Fanual i canu, numei profet Anna tihmi meivongnu um hi. Kum salih sung bek pasal nei in, kum sawm liat le kum li kim zo toh a hih bangin tekzet zo hi. Mahnaven Biakinn zamthong awng ngawlin a sun a zan Pathian bia in, thungenin ancang leleng hi.
38 Mah hun laih takin, na heng kha bok a, Pathian thangphatin Jerusalem luatnak tuk a ngaktu mi hempoh lakah hi nauno i thu cu hilh hi. Nazareth Ah Kikpihleh
39 Josef le Mary cu Topa i daan bangin a kul le sapmi hempoh a bawl celh haw ten Galilee ngam, amu khua Nazareth ah kikleh haw hi.
40 Nauno cu khang tawto in, ngil dedeuh hi; cihnak tuah dimin Pathian hehpihnak cu a humah um hi. Biakinn Sungah Naupang Jesuh
41 Jesuh i nu le pate cu kumsialin Kaltan Puai hun ten Jerusalem ah hawh mek haw hi.
42 Jesuh cu kum sawm le kum nih a kim ten a dan bangin mah puainakah hawh bok hi.
43 Puai ceng ten innah pin khawng haw naven naupang Jesuh cu Jerusalem ah tangnom hi. Mahnaven a nu le pa ten thei kha haw ma hi.
44 Mi honpi lakah umbok hengin sa in, sun nilui in, a unau le a ngualcam tei lakah zei pepel haw hi.
45 A muh haw ngawl ten amah zei tukin Jerusalem ah kikleh haw hi.
46 A ni thumnak ten biakinn sungah Judah zilhtute tuah khung khawmin, a thusonte ngai in le dong li bokin mu haw hi
47 Jesuh i thudonleh thiamdan le a cihdante amuh haw ten a zatu hempoh ten lamdangsazet haw hi.
48 A nu le pa ten amuh haw ten lamdangsa zetin, a nu in, “Ka capa aw, ita hi bangin mi bawl cim? Na pa tuah thinkham zetin nangmah zei li si ung,” tin ti hi.
49 Jesuh in, “Ita zei li uh cim? Ka pa i innah um ing tih thei ma uh cim?” tin don hi.
50 Mahnaven a thu donkiknak i sullam thei zo haw ma hi.
51 Jesuh cu a nu le pate tuah Nazareth ah kiklehin, a thu ngai in um haw hi. A nu in, hi thu le la hempoh phawkngil ngawlin tiamteh leng hi.
52 Jesuh cu taksa pumpi le cihnakah khangto in, Pathian le mihing mai ah mitmai pha ngah hi.