To listen that verse in audio click to Ngawn..
Sabbath Thu Dotnak (Mt 12:1-8; Mk 2:23-28)
1 Sabbath ni-in, Jesuh cu sangvut lo lai ah vak li hi. A nungzuitu ten sangvut ngui cu zutin, a khutsungah nuai in baak thathah haw hi.
2 Farasi khenkhat ten, “Keimu Daan ah Sabbath ni-in imah bawl tukma, a tihmi noh ten ita bawl uh cim?” tin ti haw hi.
3 Jesuh in, “David le a ngalkap ten a ngilkial haw ten David in i bawl him tih thu khi sial awng ma uh cim?
4 Pathian i inn sungah tumin, Pathian nelah piakmi an cu la in, a eih celh ten a ngalkapte vang pia bok hi. Hi an khi thiampi sialngawl kuamah dang i eih daan hi ma hi,” tin donleh hi.
5 Jesuh in, “Mihing Capa cu Sabbath uktu Pa hi,” ti hi.
Khut Langkhat Zawng Pa i Thu (Mt 12:9-14; Mk 3:1-6)
6 Vei khat cu Sabbath ni-in, Jesuh cu pumkhawm innah thuhilh hi. Mahlai ah khut taklam zawngmi pa khat um hi.
7 Farasi le Daan zilhtu ten Jesuh i sual a zei nuam haw ten, Sabbath ni ah hi tina pa hi damtik na maw tin, a bulno pen zo leng haw hi.
8 Mahnaven Jesuh in, a ngaihsutnak haw thei leng hi. Mah hangin tina pa i lakah, “Ding inna, mailamah hawhin,” ti hi. Khut langkhat zawng pa cu dingin mailamah hawh hi.
9 Jesuh in, “Thu pa khat dong tung. Eimu Daan ah Sabbath ni-in, a bawl phalmi i him? Mi bop tuk maw, mi siatsuah tuk saw him? Mi nunnak humhim tuk maw, siatsuah tuk khi saw him?” tin dong hi.
10 Pa khat nung pa khat a mit haw a zohcik pepel celh ten khut langkhat zawng pa i lakah, “Na khutzaakin hi,” a tih ten zaakto paihin, damvawkta hi.
11 Thinuk leita haw a, Jesuh a bawlsiat theihnak tukbuk vaikum haw hi.
Nungzuitu Sawm le Pa Nih Tennak (Mt 10:1; Mk 3:13-19)
12 Mah hunin Jesuh cu thungen tukin mual humah kai in, Pathian nelah zankhua thungen hi.
13 Zinglam khuavak ten a nungzuitute samkhawmin mah sung pen mihing sawm le pa nih tengtum pengin, mahte cu nungzuitu tin sam hi.
14 A min haw cu Simon (Peter tih hei sammi) le a nau Andru, James le Johan, Filip le Bartholomew,
15 Matthai le Thomas, Alfias capa James le Simon (phunnam tangtu tin sammi),
16 James capa Judah le Jesuh a zuak lehtu Judah Iskariot na hi haw hi.
Jesuh i Thuhilhnak le Damtiknak (Mt 4:23-25)
17 Jesuh cu a nungzuitute tuah mualhum pen a tolhsukleh haw ten, midang tampi tuah lawnlai ah ding haw hi. Mahlai munah mi honpi cu Judea ngam hempoh pen hihen, Jerusalem khua pen hei hihen, tupi mawk a um Taiar le Sidon khua pen hihen tampi heng haw hi.
18 Amuhte cu a thuhilhmi ngai nuamin le a natnak haw dam nuamin hung haw hi. Hawvang siasuak i khalhsiat mite vang damtik hi.
19 A sung pen huham tulin a damtik khawng hangin, mi hempoh ten amah zen nuam tek haw hi.
Lungdamnak le Thasiatnak (Mt 5:1-12)
20 Jesuh in, a nungzuitute a zoh cangcian ten, “Noh mizawngte aw mi muicu hi uh ci, Itahim titale Pathian uknak ngam cu nangmuta hi!
21 Tu hunin, a ngilkial mite aw mi muicu hi uh ci. Itahim titale na von uh vah tuk hi. Tuhunin, a kap mite aw mi muicu hi uh ci. Itahim titale nuileh tuk uh ci!
22 Mihing Capa i hangin miten nangmuh hua in, a deidat hangin le zawnsakin, a sonsia haw ahi tale mi muicu hi uh ci.
23 Mahti bang hun ten thinnopin um unna, lungdamin laam un. Itahim titale nohtei ca tukin vancungah laksawng ngengpi koihsa in um hi. Hitih bangkekin a pu le pa ten profet tei humah bawl zo haw toh hi.
24 Tuhun a mihau cu mi bawngsia hi uh ci. Itahim titale nunnopnak ngah khawng zo toh uh ci. Tamsiatnak coleh tuk uh ci.
25 Tuhun a vonvahte aw hehpih huai uh ci. Itahim titale ngilkialin umleh tuk uh ci. Tuhun a nui lite aw hehpih huai uh ci. Itahim titale lungkhamin kapleh tuk uh ci.
26 Mi hempoh ten a pahcawi haw tale hehpih huai uh ci. Itahim titale a pu le pa ten mahti bangin profet man ngawlte khi pahcawi zo haw toh hi.
Na Ngal Uhte It Un (Mt 5:38-48; 7:12a)
27 Mahnaven ka thu a zatute na ngal uhte na itta unna, nangmuh a huatu tei ca in phatnak bawl un hi.
28 Nangmuh a tam litute khi thupha piata unna, nangmuh bawlsiatu tei ca in thunget sakta un hi.
29 Mi pa kha khatin, na bek langlam a beng tale, a langlam hei dawh laihin, mi pa kha khatin, na angki humta saw a la tale na angki sungsilh vang pia betin hi. 30 Na thil a ngentu pa kha khat a um tale pia in hi. Na tangka a laksaktu lakah ngen kik pahsun hi.
31 Nangma humah miten a bawlsak haw ahin tih na deih bangkekin mitei humah na bawl bokin hi.
32 “Nangmah a ittu bek na it kikleh tale ita thupha muicu co tukin muang kha li cim? Misualte hei in amuh ittu khi it bok haw laih hi.
33 Nangma humah phatnak a bawltu tei hum bekah phatnak na bawl tale ita thupha muicu co tuk cu muang kha li cim? Misualte hei in hitih bangin bawlbok haw hi.
34 Ngah kikleh tung hi tin na ngaihsut mitei nel bekah na leicawi phal tale ita thupha muicu ngah tukin muang li cim? Misualte hei in ngah kikleh tuk ahi tale misual dangte khi leicawi phal bok haw hi.
35 Mahti bang kha ma hi! Na ngalte it unna, amu humah phatnak bawl un, ngahleh tung tin ngaihsutnak tuah sum leicawi pahsun hi. Mahti bang na bawl uh tale laksawng tampi ngahin, Cungnungbel Pathian i ca hi tuk uh ci. Itahim titale amah cu misual le lungdamnak thei ngawl tei humah hei in pha hi.
36 Na pa uh cu mi hehpih thiam a hih hangin nohte vang mi hehpih na thiamta un,” ti hi.
Midang Sonsia Pahsun (Mt 7:1-5)
37 “Midang tei humah thukhen pahsun na, Pathian in, na humah na thu khen bok tukma hi. Mi sonsia pahsun na, Pathian in sonsia bok tukma hi. Mi ngaidam inna, Pathian in nangmah ngaidam bok tuk hi.
38 Mite thil pia inna, Pathian in nangmah pialeh bok tuk hi. Tam zetin le dimletin, na khut sungah piak hi bok tuk ci. Na don zawh ngawl tianin buaksuk tuk hi. Midang humah na tehnak bangin cu Pathian in, na humah tehnakin mang bok tuk hi,” tin ti hi.
39 Jesuh in hi tehkipnak thu hilh hi: “Mitcaw pa khatin, a dang mitcaw pa khat cu iti bangin lamhuai thei tuk him? Lam a huai tale a pa nih haw in hawkluam sungah caak haw tuk hi.
40 Tawngta cu a zilhtu pa sangin thiam saw awng ma naven a cunnak a celh ten a zilhtu pa bangbok tuk hi.”
41 “Na mit sung a, thingkhal a ummi saw khi ngaisung ngawlin ita na unau i mitsung a buakno khi zo li cim?
42 Na unau i lakah, “Unau pa aw, na mitsung a, buak zohsak nang” tin ita ti thei cim? Nangma mitsung a, thingkhal hei mu ma ci. Noh mi ultung theite! Na mitsung a, thingkhal khi suah masa unna, mah nungten na unau uh i mitsung a, buak cu phano in mu tuk uh ci,” tin ti hi.
Thingkung le A Ngah (Mt 7:16-20; 12:33-35)
43 “A dammi thingkungin, ngah sia ngah awng ma hi. Mahti bang bokin, a nami thingkung hei in, ngah pha ngah awng bokma hi.
44 Thingkung hempoh cu a ngah pen theih poh hi. Lingkung hum pen thei min thawi awng ma uh ci. Mahti bang bokin valuk ling hum pen sabit ngah lo awng ma uh ci.
45 Mipha in, a lungmu sung ummi thilpha khi tultikin mipha ngawlin a lungmu sung ummi thilpha ngawl khi tultik bok hi. Itahim titale mihing cu a lungmu sung ummi khi a kam pen tul,” ti hi.
Inn Satu Pa Nih (Mt 7:24-27)
46 “Jesuh in, ‘Topa, Topa,’ tin sam li sihin, ka hilhmite bawl ma si uh ci?
47 Ka lakah hungin, ka thuhilhmi ngai in, a zuitute cu iti bang haw him tih khi him tih nangmuh lak tung hi.
48 Mipa pa khat cu khuam kua thukzet co in, suangpi humah inn a satu bang khi hi. Tuilunin mah inn cu sim li naven kho zetin sakmi inn a hih hangin hing zo ma hi.
49 Mahnaven ka thuhilhmi za leng na pi in, a zui ngawltupa cu khuam phano in phut ngawlin philnel humah inn a satu pa bang hi. Tuilunin mah inn cu a sim ten thakhat thu in, a cim hangin izah lauhuai him?” tin ti hi.