Jesuh In Rom Ngalbawi Innceng Damtik (Mt 8:5-13)
1 Jesuh cu hi thu hempoh a hilh ceng ten Kapernaum khua ah hawh hi.
2 Mahlai ah Rom ngalbawi pa khat um a, mah ngalbawi in, innceng pa khat nei in, it mahtak hi. Mah a innceng pa cu a tina in, thi awndiak toh hi.
3 Hi ngalbawi pa in Jesuh i thu le la a zak ten a innceng pa damnak tuk ngetsak tukin Judah upa khenkhat hah hi.
4 Jesuh lakah a hen haw ten tihtak zetin, “Hi pa hi na bop tukin tak ngangai hi.
5 Phun le nam itzettu hi in, amah hihimin pumkhawm inn pa khat sa hi,” tin ngen haw hi.
6 Mah hangin Jesuh in, amuhte cu zui hi. Mahlai inn a hen kuan haw ten ngalbawi pa in, a ngualcamte hawhtikin, “Topa haksa emin hung nuam li pahsun hi.
7 Ka inn hi nang i tumnak tuk tak ma si. Nangma lakah keimah hawh nang ka tih ten nangmah tawk tukin hei tak mang tin ngaisung ing. Mah hangin thupia poh inna, ka innceng cu dam tuk poh hi.
8 Keimah hei hi bawi upa khutnuai ummi ing. Keima khutnuai hei ah ngalkap tampi umbok haw hi. Ngalkap pa khat cu ‘Hawhin!’ ka tih ten hawh hi. Adang pa khat cu, ‘Hungin hi!’ ka tih ten hung hi. Ka innceng cu ‘Hi bawlin!’ hi ka tih ten bawl haw,” ti hi.
9 Jesuh in hih thute a zak ten lamdangsa mahtakin, a zuitu mi honpi tei lam hekin, “Thungai in hilh ing. Israel mi lakah hei in, hiti bang muankhonak a nei tawk awng ma laih ing,” ti hi.
10 A hawhtik mite cu ngalbawi pa i innah kikleh haw in, ngalbawi pa i innceng pa cu na dam zo khi mu haw hi. Jesuh In Meivongnu i Capa Tholehtik
11 A ngei ngawlin Jesuh cu Nain a tih haw mi khua ah hawhin, nungzuitute le mi honpi ten zuibok haw hi.
12 A khua dawng haw a hen ten mithi vui tukin mi honpi tul dudut tawk haw hi. A thi tu cu meivongnu i capa neihcalam hi in, khuasung mi honpi ten a nu cu zui haw hi.
13 Topa in, a nu amuh ten hehpih mahtakin, “Kap toh pahsun,” ti hi.
14 Jesuh cu hawhin, mithi kuang cu a khut tuah a zen ten mithi zawngte cu cawlpaih haw hi. Jesuh in, “Tangval pa, tho in, ti ing hi,” ti hi.
15 Mithi pa cu thoto a, awn thei paihin, Jesuh in, a nui lakah hawhpih hi.
16 A venghawng haw in, thinsu in Pathian thangphat haw hi. “Eimu sungah profet ngengpi suak hi. A mihingte nunpan tukin Pathian hung zo hi,” tin ti haw hi.
17 Jesuh i thu le la cu mahmi ngam hempoh le a el kim ngam sungah thang khawng hi.
Tuiphum Johan i Kamtaite (Mt 11:2-19)
18 Johan i nungzui ten Jesuh i thu hempoh cu Johan lakah hilh haw hi. Johan in, a zuitu pa nih samin, Topa nang cu, “Johan i hung tuk hi a tihmi khi cim?
19 Ahimata a dang ngak hih tuk laih ung maw?” tih thu dong tukin hawhtik hi. 20 Jesuh lakah a hen haw ten, “Johan i hung tuk hi a tihmi nangmah cim maw? Ahimata midang ngak hih tuk laih ung kaw? tih thu dong tukin Johan in hah hi,” tin ti haw hi.
21 Mahlai takin Jesuh in, mi tampi tei natnak a phunkim le dawi ngilo i khalhsiat vang damtikin, mitcaw tampi vang khua mu lehtik hi.
22 Mah hangin Jesuh in Johan nungzuite cu “Kiklehta unna, na muh uhmi le na zak uh thute hi Johan na hilhta un hi. Mitcaw ten khua mu haw, kebai ten hawh thei haw in, miphaak ten damnak ngah haw, bengbul ten thu za lehin, mithite tholeh haw hi. Mi ca-ngah tei lakah lungdamnak Thuthangpha cu au in um zo toh hi.
23 Keima thu cungcangah muanhelhnak a nei ngawltute cu muicu thupha cote haw hi,” tin don hi.
24 Johan i nungzui tei kihleh nungten Jesuh in, mipi tei lakah Johan i thu la cu hi bangin hilh hi. “Hampa lakah Johan tawk nuamin, na hawh uh laihin, imu nuamin kaw na hawh uh? Huih i muh hangin limi awn leliai hampa mu tukin maw?
5 I mu nuamin hawh uh cim? Van pha silhmi zo nuamin maw? Mahti bang van pha silhin, nuamta zetin, a umtute cu kumpi inn bekah um haw hi.
26 Hilh hem un. I zo nuamin hawh uh cim? Profet zo nuamin maw? Hi zuh hi, profet zo nuamin hawh ngai hi uh ci. Mahnaven na muh uhmi cu profet sangin nase saw hi
27 Itahim titale Johan i thu cu Lai Thiangtho in hi bangin ti hi. ‘Pathian in nangma ca lampi sialtu tukin na masuanah ka kamtaitu pa hawhhamtik tung,’ ti hi.
28 Thungai in hilh ing. Mihing i hinmi hempoh lak pen, “Johan sangin nase saw kuamah umma hi. Mahnaven Pathian uknak a, mi nautabel cu Johan sangin ngeng saw,” ti hi.
29 Siahkhonte pen pan mi hempoh cu Johan i thuzilh a zak haw ten Pathian i dikcangnak zui in, Johan i tuiphum haw hi.
30 Mahnaven Farasi le Daan zilhtu ten amu ca in Pathian i tuptahmi cu nialin, Johan i tuiphumnak cu deih haw ma hi.
31 Jesuh in, “Tu laih mihingte hi i tuah tehkim kam nang? I tuah bangve haw him?
32 Bazal a khung naupangte bang haw hi. Naupang hon khat ten a dang naupang hon khat tei lakah, ‘Mopuai la saksak nave ung, lam nuam ma uh ci, Mithi la saksak nave ung, kap nuam sih ma uh ci,’ tin, a tidun limi naupangte bang kek haw hi.
33 Tuiphumnak piatu Johan hun laih khin an le sabittui cangin, a um ten, ‘A sungah dawi ngilo nei hi,’ tin ti uh ci.
34 Mi capa hungleh bokin a eih a in ten noh ten, ‘Hi pa hi zo un! An le sabittui ngawpzet, siahkhontu misual tei ngualcam hi,’ ti uh ci.
35 Pathian i cihnak thuman a hihlam cu a pomtu ten langtik haw,” ti hi. Jesuh Simon Innah Jesuh Simon Innah
36 Farasi mi pa khatin, Jesuh cu takeih ei ngel tukin a sam ten Jesuh cu hawhin, an ei tukin khung hi.
37 Mah khua ah nunpoh a nungmi numei pa khat um hi. Mah nu in, Jesuh cu Farasi pa i innah an ei tuk hi tih thu a zak ten pak namtui thawl khat kengin,
38 Jesuh nunglam ke bulah dingin kap a, Jesuh i ke bulah a hitui cakin kawt hi. A ke kawt cu a sam tuah nawtin, a nap celh ten pak namtui leih hi.
39 Mahmi cu Farasi pa amuh ten a lungmu sungah, “Hi pa hi profet ahi ngangai tale amah zen litu numei hi akua him tih khi thei tuk hi. Izah tian a nuncan siasuak him tih khi thei tuk hi,” tin ngaisung hi.
40 Jesuh in Simon lakah, “Simon thuhilh nuam nei ing,” ti hi. Simon in, “Sazapa aw hilhin,” ti hi.
41 Jesuh in, “Tangka putu pa i lak pen tangka putu mihing pa nih um haw hi. Pa khatin za nga pu hi. Adang pa khatin sawm nga pu hi.
42 A pa nih haw in loh zo haw ngawl hangin a pa nih haw in zah hi. Hi tei pa nih sung pen kua saw in sum a putu pa it saw deuh tuk him,” ti hi.
43 Simon in, “Tangka tam deuh a zah mipa in it sawdeuhbel tuk tin ngaisung ing,” tin don hi. Jesuh in, “Na sonmi cu man hi,” tin don hi.
44 Numei nu i lam a hek celh ten Simon lakah, “Hi numei nu hi mu a cim? Na inn sungah tum naveng ka ke somnak tuk tui pia awng ma ci. Mahnaven hi numei nu in ka ke cu a hitui tuah somin, a sam tuah nawt hi.
45 Nang in, a nam hei in muak ma ci. Mahnaven hi nu in ka hen bek ten cawl ngawlin ka ke nam hi.
46 Nang in, ka lu ah ka thih tuk olif thau pia ma naven cin hi nu in ka ke ah pak namtui leih hi.
47 Thungai in hilh ing, mi itnak ngengpi a langtikmi in, a sualnak tampi cu ngaihthiam hi zo toh hi, tih khi langtik hi. Mahnaven a sualnak demno bek ngaihthiam a himi ten itnak demno bek langtik bok haw,” ti hi.
48 Jesuh in numei nu i lakah, “Na sualnakte cu ngaihthiam hi zo toh,” ti hi.
49 An eihnak cabuai a, khung midang ten, a lungmu sung hawah, “Sualnak nangawn a ngaithiam thei, hi pa hi akua kaw?” tin ti haw hi.
50 Mahnaven Jesuh in numei nu i lakah, “Na muannakin nangmah pan suak zo toh hangin lungmuang zetin, na innah pinin,” ti hi.