LUKE 8

Jesuh Zuitu Numeite 

1 Mah nungten Jesuh cu Pathian uknak Thuthangpha hilhin khuapi le khuano ah zin kawkawi hi. Mah a zin kawkawinakah nungzui sawm le pa nihte vang tel bok haw hi. 2 Natnak a dadang a damtik mite le khawhuai khalhsiat a damtikmi nu vang tel bok hi. A sung pen khawhuai salih a hawlvawkmi Mary (Magdalin tih hei sammi), 3 Herod zungah bawi nadek Chuza i zi Joanna, Susanna le a neihmi hempoh tuah Jesuh le a nungzuitute a bawm litu numeite vang tel bok haw hi. Anci Theh Tehkipnak (Mt 13:1-9; Mk 4:1-9) 4 Jesuh lakah khua khat nung khua khat pen mi honpi a hen haw ten Jesuh in hi bangin tehkipnak hilh hi. 5 “Vei khat laihin, Mi pa khat cu anci vawh tukin hawh hi. Lo sungah anci a vawh ten khenkhat cu lampi tuanah cuu in, miten cilpekin, vano ten khul khawng haw hi. 6 Khenkhat cu suang humah cuu haw hi. Anci cu po naven leinom ngawl hangin ko khawngta hi. 7 Anci khenkhat cu ling sungah cuu in, ling tuah khangto kawm haw naven lingin, dep khawngta hi. 8 Khenkhat cu leingam phatnak munah cuu haw in, po haw hi. Ngui haw in, a cang za khat ten nei haw hi. Zaknak tuk beng a nei hempoh ten zata un!” tin ti hi. Tehkipnak i Sullam (Mt 13:10-23; Mk 4:10-12) 9 Hi tehkipnak i a sullam cu ihim tin nungzuitu ten Jesuh dong haw hi. 10 Jesuh in, “Pathian uknak thukuh cu noh tei lakah piak hi zo naven midang tei lakah tehkipnak tuah hilh hi tuk hi. Mah hangin zo li haw tuk naven mu haw tukma, ngai li haw tuk naven za haw tukma,” tin ti hi. Anci Vawh Tehkipnak Thu Sonciang (Mt 13:18-23; Mk 4:13-20) 11 “Hi tehkipnak i a sullam cu hi tih bangin hi. Anci cu Pathian thu hi. 12 Lampi tuanah a cumi anci i sullam cu Pathian thu za haw naven Dawi ngilo hungin a muan ngawlnak tuk le nunpatmi a hih haw ngawlnak tukin a lungmu sung haw pen Pathian thu a laktul sakte khi hi. 13 Suang humah a cuu mi anci i sullam cu Pathian thu cu zain, lungdam zetin pom naven a lungmu sungah thuk zetin tum ngangai ma hi. Hun comno sung um naven sualsohnak a hen ten a tuleh khi hi. 14 Ling lakah a cuu mi anci i sullam cu Pathian thu cu za bok haw naven leihum thinkhamnak, hauhsaknak le tisa nopnakin khuhleh khawngin, ituk mahten a ngah haw a min awng ngawlte khi hi. 15 Lei ngam phatnakah a cuu mi anci i sullam cu Pathian thu cu za haw a, lungmu pha le thuhilh sangin, a tawp tian ngah nei in, a umtute haw hi,” tin ti hi. Kho Khuhmi Mei Inn (Mk 4:21-25) 16 Jesuh in, “Mei inn vakin, kho tuah khuhtu kuamah um awng ma, ih khun nuai ah vang koih awng haw ma hi. Inn sungah mi a tum haw ten khuavak phano in, amuh theihnak haw tukin mei inn vaknak humah koih haw hi. 17 “Selkuhmi hempoh cu langleh khawng tuk a, khuhmi hempoh vang khuavaknakah suahtulin, muleh khawng leleng tuk hi. 18 “Thu na ngaih uhten ngalling un hi. Itahim titale thil a neitu cu piakbet hi tuk a, imah a nei ngawltu cu dem lai nei ing tin, a ngaihsutmi nangawn hei laksakin um tuk hi,” tin ti hi. Jesuh i Nu le Unaute (Mt 12:46-50; Mk 3:31-33) 19 Jesuh i nu le a naute cu a nelah hung haw naven mitam leita haw hangin tawk thei haw ma hi. 20 Mi pa khatin Jesuh nelah, “Na nu le na nau ten pualamah nangmah tawk nuamin ding leng haw hi,” tin hilh tum hi. 21 Jesuh in mi hempoh tei lakah, “Ka nu le ka naute cu Pathian thu zain, a zuitute haw hi,” tin don hi. Jesuh In Huihsia Cawltik (Mt 8:23-27; Mk 4:35-41) 22 Vei khat cu Jesuh le a nungzuitute hawmkuang sungah tum haw in, a nungzuitu tei lakah, “Tuipi ngalkhat lamah hawh nung,” tin ti in hawh haw hi. 23 Hawmkuang tuah a hawhlih haw laihtakin Jesuh cu hihbu hi. Muanmawh khak ngawlin tuipi humah huih nasezet theu a, hawmkuang sungah tui tumin, dim awndiak toh hangin a nungzuitute cu lauzet zo haw hi. 24 Nungzui ten Jesuh cu phongin, “Topa thi khawng awn toh ung!” tin ti haw hi. Jesuh cu tho in, huihsia le tuicawkpi cu thupia hi. Huihsia cu cawlin, thawmvang umleh ngawlin dai diudeu hi. 25 Jesuh in, a nungzuitute lakah, “Na muannak uh ilai ah him?” tin dong hi. Mahnaven lamdangsa in lauzet haw a, pa khat le pa khat, “Hi pa hi akua him?” Huihsia le tuihualpi thupia in, a thu na ngai haw hi,” tin tidun li haw hi. Jesuh In Dawih Khalhsiat Damtik (Mt 8:28-34; Mk 5:1-20) 26 Jesuh le a nungzuitute cu hawmkuang tuah Galilee tuipi ngalkhat Gerasa ngamah heng haw hi. 27 Jesuh cu tuimawk pen a tolh kuan ten dawi ngilo tei khalhsiatmi mi pa khatin tawk hi. Mahpa cu hun saupi sung innah um ngawlin le van hei silh ngawlin vak pepel a, mithi vuinak suangkua sungah um saw hi. 28 Jesuh amuh haw ten nging zetin au hi. Jesuh ke bulah bokin, “Jesuh, Cungnungbel Pathian Capa! Kei nelah na bawl tuk i nei cim?” “Kei hi bawlsia pahsun tin kun ing,” ti hi. 29 Ita hi bangin ti him titale hi pa i sung a, dawi ngilo cu Jesuh in tul tukin hawlvawk zo toh hi. Vei tampi dawi ngilo in khalsia mekin, a khut le ke cu thikkhau tuah kencihin thawngah khum haw hi. Mahnaven a thikkhau cu pelcatin dawi ngilo in phillawnah hawlvawk lehcet hi. 30 Jesuh in, “Na min akua him?” tin dong hi. Mahpa in, “Ka min cu Honpi ing hi,” tin don hi. Itahim titale khawhuai tampi cu a sungah a um haw

esuh in, “Na min akua him?” tin dong hi. Mahpa in, “Ka min cu Honpi ing hi,” tin don hi. Itahim titale khawhuai tampi cu a sungah a um haw hang hi. 31 Khawhuai ten Jesuh cu, “Taw nei ngawl khuk thukpi sungah khiasuk pahsun hi,” tin ngen haw hi. 32 Mah mualmawk lamah vok honte taa dudut li haw hangin khawhuai ten “Vok tei sungah tumtik zazalin hi” tin ngen haw in, a ngetnak haw bangin Jesuh in thupia hi. 33 Mahpa i sung pen tulin, vok honpi sungah tum haw a, mah vok honpi cu liang sangzet hum pen dawksuk tawtokin tuinim sungah cak khawng haw hi. 34 Mah vok hon a khaltu ten hitih bangin thu um hi, tih a muh bek haw ten manlangzet tai haw a, khuasung le lo lakah hi thu than kawkawi haw hi. 35 Iti bang thu nentim tih a zo tukin mi tampi hawh haw a, Jesuh lakah a hen haw ten a sung pen khawhuai a tulmi pa cu Jesuh ke bulah khung a, van phano silhin, lungmu cangkimno in um amuh haw ten lauzet haw hi. 36 Iti bangin dam him tih thu cu a mutu ten a thu umdan hilh haw hi. 37 Mahlai ngamsung a um hempoh ten lauzet haw hangin Jesuh cu mundangah hawh tukin ngen haw hi. A ngetnak bangin Jesuh cu hawmkuang sungah tumin hawhta hi. 38 A sung pen khawhuai tampi a hawlvawk sakmi pa in, “Nangma lakah hawhtik bokin hi,” tin ngen het hi. 39 Mahnaven Jesuh in, “Innah pin inna, Pathian in nangma hum a, thil a bawlmi thu cu hilhin hi,” tin ti in, pintik hi. Mahpa cu khua sungah hawhin, Jesuh in, a hum a bawlmi thute khi hilh het hi. Jairus Canu le Jesuh Puan Zentu Numei (Mt 9:18-26; Mk 5:21-43) 40 Jesuh cu tuipi ngalkhat lam a hen ten mi honpi in muak haw hi. Itahim titale ngeipi amah na ngak zo haw hi. 41 Mahten Jairus a tih haw pa, pumkhawm inn uktu cu heng a, Jesuh ke bulah bokin a innah cam tukin ngen hi. 42 Itahim titale a canu neihcalam, kum sawm le kum nih nu cu a tina thi awndiak tohin um hi. Jesuh a hawh lih laih takin mun tihkim pen mi honpi ten zuanin, zui dudut haw hi. 43 Mah tei lak pen numei nu pa khat kum sawm le kum nih sung thi luang natvei nu um kha bok hi. A neihnak hempoh bo khawngin, sibawi tei lakah bawl li naven kuamah in damtik thei haw ma hi. 44 Mi honpi cam sungah Jesuh nunglam pen zui in, a puancepno khi zenkuh ngah ten a thi luang nat cu thakhatin dam paih hi. 45 Jesuh in, “Akua him kei zen kha tu?” tin dong hi. Kuamah in zen ma ung, tin don haw hi. Peter in, “Na elkimah mi honpi ten kimkotin neek tutuh haw si,” tin don hi. 46 Mahnaven Jesuh in, “Mi pa khatin zen ngah hi. Itahim titale ka sung pen huham a tul khi thei ing hi,” tin ti hi. 47 Numei nu in ka zen lam thei ngah zo toh hi tin cantawtokin hungin Jesuh ke bulah bok hi. Mipi tei mitmuh cilcelin, ita Jesuh cu zen ngahin, thakhatin dam thei him tih thu phuang khawng hi. 48 Jesuh in, “Ka canu na upnakin nangmah damtik zo hi. Thatui zetin pinin,” ti hi. 49 Mahti bangin Jesuh a otlih laih takin Jairus inn pen a kamtai hahte cu heng haw in, Jairus lakah, “Na canu thi zo toh hi. Sazapa cu noksak li pahsun,” tin ti hi. 50 Jesuh in hi thu a zak bek ten Jairus lakah, “Na thinsu pahsun, um poh inna, na canu cu dam tuk poh,” ti hi. 51 Jairus i inn a hen ten Peter, Johan le James le naupang nu i nu le pa sial ngawl inn sungah kuamah tumtik ma hi. 52 Mahlai mun a umte cu kapin tau li haw hi. Jesuh in “Kap pahsuh un. Hi naupang nu cu thi ma hi, hihbu hi,” tin ti hi. 53 Naupang nu thi zo hi, tih cu akua abang theihmi a hih hangin Jesuh i awn cu nuihsandun haw hi. 54 Mahnaven Jesuh in, a khut pen lenin, “Ka canu tho in,” ti hi. 55 Nunglehin, thakhat thoto hi. “A eih tuk an pia un,” tin Jesuh in ti hi. 56 A nu le pa ten lamdangsazet haw hi. Mahnaven Jesuh in hi thu cu kuamah hilh tuk ngawlin thupia hi.