Jesuh In Nungzui Sawm le Nih Tiik (Mt 10:5-15; Mk 6:7-13) 91 Jesuh in nungzuitu sawm le pa nih cu munkhatah samin, dawi ngilo hawlvawk theihnak le natnak a dadang damtik theihnak huham pia hi. 2 Vancung Uknak thu hilh tuk le tina damtik tukin hawhtik hi. 3 Amuh tei lakah, “Khual na zin uhten imah keng pahsuh un. Thiangkhut, tawngphu, an, tangka le angki silhthuah tukte hei hihen keng pahsuh un hi. 4 Na tulleh laklawh uh tian na caamnak inn lengah caam un hi. 5 Nangmuh a kik tei khua cu zamsan unna, mahlai khua ngallin piaknakin, na ke uh a, leivul khi na thiingta un,” ti hi. 6 Nungzuitute cu hawhin, khuano sungah zin pepel haw a, Lungdamnak Thuthangpha hilhin, khua hempoh ah tina damtik pepel haw hi. Herod i Lung Nokbuk (Mt 14:1-12; Mk 6:14-29) 7 Galilee ngamuktu Herod in mahti bang thu piang a zak ten a lung nokbuk hi. Itahim titale tuiphum Johan nungleh hi tin mi tampi ten ti haw hi. 8 Midang ten, “Elijah langleh hi,” tin ti haw in, pawl khat ten ni dang laih a, profet pa kha khat nungleh hi, tin ti bok haw hi. 9 Herod in, “Johan i lu cu tantik zo toh naveng ka thu zak lihmi pa hi akua nan tim?” tin ti hi. Mah hangin Jesuh amuh theihnak tukin hantiam leleng hi. Mihing Thawng Nga An Vak (Mt 14:13-21; Mk 6:30-44; Jn 6:1-14) 10 Nungzuitute cu heng kikleh haw in, a nadehnak haw hempoh cu Jesuh hilh haw hi. Nungzuitute cu pui in, Bethsaida tihmi khua ah amuh nguakcang hawh haw hi. 11 Mah thu cu mipi ten a zak haw ten zui haw hi. Jesuh in lungdam zetin samin, amuh tei lakah Pathian uknak thu hilhin, damtik tuk a kul hempoh vang damtik hi. 12 Nitum kuan ten nungzuitu sawm le pa nihte a lakah hung haw in, “Hilai mun hi ngamveng hangin mi honpi hawhtik inna, khua le lo lakah hawhin, an le camnak tuk poh hei zei haw tahen,” tin ti haw hi. 13 Mahnaven Jesuh in, “A eih haw tuk an cu nangmuh ten pia un,” ti hi. Amuh ten, “Ka neih uh hempoh ka khawp uhten cangho pa nga le ngasa pum nih bek si. Mihonpi tei ca tukin an lei zo tuk ung maw?” tin ti haw hi. 14 Mahlai munah pasal tiptep thawng nga laih um haw hi. Jesuh in, “Mipi hi sawm nga kop tenin, khungtik un hi,” tin nungzuitute cu hilh hi. 15 A tihnak bangin nungzuitu ten a bawl celh haw ten 16 Jesuh in cangho pa nga le ngasa pum nih cu la a, vanlam zoto in Pathian nelah lungdam thu a son ceng ten mipite sem tukin nungzuitu tei khutah pia hi. 17 A venghawngin, a eih celh haw ten, a khambang haw a nungzuitu ten a khonleh haw ten kho sawm le kho nih ting hi. Jesuh i Thu Peter In Phuang (Mt 16:13-19; Mk 8:27-29) 18 Ni khat cu Jesuh amah nguakcang thu a nget laihtakin, nungzuitute a lakah hung haw a, Jesuh in, “Mipi ten kei hi akua tin ti haw him?” tin dong hi. 19 Amuh ten, “Mi khenkhatin tuiphumnak petu Johan hi ti haw hi. Adang ten Elijah hi ti haw in, pawl khat leleu ten ni dang laih a, profet pa kha khat nungleh hi tin ti haw hi,” tin don haw hi. 20 Jesuh in, “Noh ten aw, kei hi akua tukin ngaisung uh cim,” tin dong hi. Peter in, “Nang cu Pathian i Khrih hi ci,” tin don hi. A Thuaknak le Thihnak Tuk Hilh (Mt 16:20-28; Mk 8:30-9:1) 21 Jesuh in hi thu cu kuamah hilh tuk ngawlin thupia hi. 22 Amuh tei lakah, “Mihing capa cu nase zetin thuak tuk hi. Upa, thiampi le Daan zilhtu ten lawlin, that haw tuk naven ni thum nungten thawhlehtikin um tuk hi,” tin hilh hi. 23 A venghawng haw i lakah, “Akua nabang hei hihen kei a zui nuamtu ten kei ing tihnak khi zamsanin, a nisialin ama haksatnak thinglamteh pua in zui haw tahen. 24 Itahim titale akua hei hihen ama nunnak humhim nuamtu in, a nunnak bo lawh tuk hi. Mahnaven keima min hangin a nunnak a bo lawhtu in, a nunnak hum ngah tuk hi. 25 Mi pa khatin, leihum hempoh hi co ngahin, ama nunnak a bo ahin i nemcuam kaw? Imah nemcuam ma hi. 26 Mi pa khatin, keimah le ka thuhilh mite a zahcak pih tale Mihing Capa vangin a sunloihnak, a pa i sunloihnak le vancung mithiang tei sunloihnak tuah a hen ten zahcak pihleh bok tuk hi. 27 Ciang zetin hilh ing. Hilai a, dingleng khenkhat tei Pathian uknak amuh haw laklawh a thi tuk ngawlmi um uh ci,” tin hilh hi. Meltheknak (Mt 17:1-8; Mk 9:2-8) 28 Jesuh in hi thu a hilh ceng nipi khat ten Peter, Johan le James samin, thungen tukin mualhumah hawhpih hi. 29 A thunget lih laih takin Jesuh cu a melthekin, a puan silh de susulin ngo hi. 30 Thakhatin mihing pa nih hung haw a, otpihdun haw hi. Mahpa nihte cu Moses le Elijah haw hi. 31 Vancung sunloihnak tuah lang haw in, Jerusalem khua ah a thihnak tuk hangin Pathian tuptahmi a cangkimnak tuk thu khi Jesuh tuah son khawm haw hi. 32 Peter cu a ngualcamte tuah hihbuh ci zetin, na zau leng haw hi. A khanlawhto haw ten Jesuh cu sunloihnak le mi pa nih tuah dingleng khi mu haw hi. 33 Mahpa nihte cu Jesuh lak pen a tul kuan haw ten Peter in, “Topa hilai ah um tuk hi thilpha hi. Buk pa thum sa nung inna, nangma ca tukin pa khat, Moses ca tuk pa khat le Elijah ca tuk pa khat,” ti hi. Amah in ikaw ka ot tih hei theiciang ngangai ma hi. 34 Mahti bang a tih lih laihin, meingo zamin, amuh cu khuh hi. Hitih bangin meingo in, a uap hangin a nungzuitute cu lau mahtak h
ahti bang a tih lih laihin, meingo zamin, amuh cu khuh hi. Hitih bangin meingo in, a uap hangin a nungzuitute cu lau mahtak haw hi. 35 Meingo sung pen, “Hi pa hi ka tenmi ka capa hi, a thu na ngaita un,” tihmi aw za haw hi. 36 Mah aw a thaamleh ceng ten Jesuh cu amah pa khat bekin ding leng hi. Hi thu ah nungzuitu ten kuamah hilh ngawlin daidenno in um haw hi. Dawih Khalhsiat Naupang Damtik (Mt 17:14-18; Mk 9:14-27) 37 A zingten Jesuh le a nungzuitu pa thum cu mual pen tolhsukin, mi honpi ten Jesuh khi muak haw hi. 38 Mi honpi sung pen mi pa khatin, “Sazapa, ka capa neihcalamno zohsak bebelin! tin ngen hi. 39 Dawi ngilo i khalhsiat ten au bawbuai in, a pumpi leisehnakin le a kam cilphuankai in bawlin hah nuam awng hihim ma hi. 40 Dawi ngilo hawlvawk tukin na nungzuitute kun li naveng tithei cuang bok haw ma hi,” tin au hi. 41 Jesuh in, “Noh itizah takin muannak nei ngawlmi le mi suaksual hi uh cim? Noh tei lakah i tuk tian um tuk hing ngim? Itih tian thuak hih tuk hing ngim?” tin ti hi. Mahpa i lakah, “Na capa cu hilai ah hunpihin,” ti hi. 42 Naupang pa cu Jesuh lakah hawh tukin a hawh laihtakin dawi ngilo ten khalsia in, a pumpi leisehnak mangin caih het leleu hi. Jesuh in dawi ngilo cu hupin, naupang pa cu damtikin, a pa i lakah pialeh hi. 43 Pathian i huham ngilnak amuh haw ten mipi cu lamdangsa mahtak haw hi. A Thihnak Tuk Thu Hilh Leh (Mt 17:22-23; Mk 9:30-32) Jesuh i bawlmi hempoh amuh haw ten mipi cu lamdangsa in le amzet haw hi. Mahti bangin a um lih haw laihtakin, nungzuitu tei lakah, 44 “Thu pa khat hilh tung a, mahmi cu ituk mahten phawkngilta pahsuh un hi. Mihing capa cu zuakin, thuneitu tei khut sungah piakin um tuk,” ti hi. 45 Mahnaven nungzuitu ten a son nuammi thei baan haw ma hi. A theihtheih haw ngawlnak tukin selmi thu a hih hangin a theih haw ngawl hangin thudot tuk hei ngam haw ma hi. Akua Ngengbel Kaw? (Mt 18:1-5; Mk 9:33-37) 46 Nungzuitu ten ohtei lakah, akua ngengbel hung kaw? tih thu dondun haw hi. 47 Jesuh in, a ngaihsutnak haw a theih ten naupangno pa khat pui in, a elah dingtik hi. 48 mahten amuh tei lakah, “Keima minin hi naupang tun inn a hontu cu keimah tun inn hontu hi. Keimah tun inn a hontu cu keimahtiktu tun inn a hontu hi. Itahim titale nangmu sung pen mi nautabel khi a ngengbelmi hi,” ti hi. Langpang Ngawltu Cu Bawmtu (Mk 9:38-40) 49 Johan in, “Mi pa khat cu nangma minin dawih ngilote hawlvawk li ka mu uhten kham ung. Itahim titale eimu lakah a telmi hi kha ma,” ti hi. 50 Jesuh in, “Kham pahsuh un hi. Itahim titale eimu thu a el ngawltute cu eimuh bawmtu haw hi,” tin Johan le nungzuitu dang tei lakah hilh hi. Samaria Ten Jesuh Deih Haw Ma 51 Jesuh cu vanah lak tohin, a umnak tuk hun nai nawnawm toh hangin Jerusalem lamah hawh tuk ngaisung catin hawh hi. 52 A mai ah kamtaite hawh hamtikin, ihempoh tuangtim ham tukin Samaria khua pa khatah tum haw hi. 53 Mahnaven mahlai khua ten sang haw ma hi. Itahim titale Jerusalem ah hawhvawk tuk hi tih thu a zak haw hang hi. 54 Mahmi cu Johan le James ten a zak haw ten Jesuh lakah, “Topa hite hi siatsuah khawng tukin vanhum pen mei alh caksuktik ahin deih ma cim?” tin ti haw hi. 55 Jesuh cu amuh tei lamah hekin, liatnek zam hi. 56 Mahten Jesuh le nungzuitute cu khua dangah hawh hawta hi. Jesuh Zuinuamtute (Mt 8:19-22) 57 Hi bangin a hawh pepel laih takin mi pa khatin Jesuh cu, “Na hawhnak hempoh ah zui tung,” ti hi. 58 Jesuh in, “Cingne ten kua nei in, vano ten bu nei haw hi; mahnaven Mihing Capa cu lu ngaknak tuk mun hei nei zo ma,” ti hi. 59 Jesuh in midang pa khat lakah, “Ka nungzui in,” ti hi. Mahnaven mahmi pa in, “Topa hawhvutin, ka pa vui hihta nang,” ti hi. 60 Jesuh in, “Mithi cu mithi ten vui haw tahen. Nang cu hung inna, Pathian Uknak thu phuang saw in,” ti hi. 61 Adang pa khatin, “Topa, nangmah zui tung. Mahnaven a masabelin ka innkua otpih hihta tung,” ti hi. 62 Jesuh in, “Akua hei hi tahen, nunghek thah keuko in lobungte cu Pathian Uknak ngam co tukin tak ma,” ti hi.