Jesuh In Biakinn Siatnak Tuk Hilh (Mt 24:1-2; Lk 21:5-6)
1 Jesuh cu Biakinn pen a tul laih takin a nungzuitu pa khatin, ‘Zo in! Sazapa! Hi inn le suang tei ngeng dante hi lamdangzet thong si!’ tin ti hi.
2 Jesuh in, “A lamdang zetmi inn hi mu ci. Hi suang ngengpite hi pa khatno hei a umnakah a um haw ngawlnak tuk hun heng tuk a, cim khawngleh tuk laih hi,” tin ti hi.
Haksatnak le Cimnak (Mt 24:3-14; Lk 21:7-19)
3 Jesuh cu Biakinn khatlam a, Olif mualah a khun laihin, Peter, Johan le Andru cu kuamah i theih ngawlin hung kuh haw hi.
4 “Na sonmi i hun cu ituk ten tuk kaw? Hilh tehin! Mah hun cu hengpal tuk tih theihtupnak tukin i melciknakte um tuk kaw?” tin dong haw hi.
5 Jesuh in, “Ngallingzet un! Kuamah in zol ngah haw pahsuh hen. Mi tampi cu keima minin hung haw tuk a,
6 ‘Keimah cu Jesuh toh ing hi,’ tin mi tampi zol ngah haw tuk hi.
7 Lam naino le ngam khawlapi ah ngaldo dunnak thawmvangte na theih uhten thinsu in lau pahsuh un. Mahti bangte cu heng tuk naven hunbonak tuk kha ma laih hi.
8 Ngam khat le ngam khat, uknak pa khat le pa khat dodun haw tuk a, khua hempoh ah hiinhingin, paamnak vang heng tuk hi. Mahti bangte cu numei naunei tuk vonna pan bang hi.
9 “Nangmuh hihim ngalling un. Nangmuh manin, zungah hawhpih haw tuk hi. Pumkhawm inn pen vaat haw tuk a; keima hangin hotu le kumpi tei mai ah dingtik haw tuk hi. Mah hun cu ka Thuthangpha na hilhnak uh hun hi tuk hi.
10 Mahnaven hun bo laih ngawlin thuthangpha cu miphun hempoh tei lakah hilh hi tuk hi.
11 Nangmuhte cu manin, zungah a het haw ten itin heng ka don tuk tin, a laih ngawlin thinsu pahsuh un. A hun a hen ten na hilh tuk uhmi cu theihtik hi tuk uh ci. Itahim titale na hilh tuk uh le na ot tuk uhmi cu nangmu ot hi tukma hi; Hawvang Thiangtho i hilhmi hi tuk hi.
12 U le unau vang thihnak tianin zuakdun haw tuk hi. Mahti bang bok lengin, pa ten a ca tei humah bawlbok haw tuk a, ca ten a nu le pate do in, thihnak tianin hengtik haw tuk hi.
13 Keimah hangin nohte cu mi hempoh ten hua haw tuk naven a dawlbel tian a thuak, a nang theitu ten nunpatnak ngah haw tuk hi.
Mullinghah Nawngkai Zetmi (Mt 24:15-28; Lk 21:20-24)
14 Mulling hah le a nawngkai zetmi cu a dintuk ngawlnak munah a din khi mu tuk uh ci. (Hi lai a sialtu ten a hilh nuammi hi thei un!) Judah peng sung a, um ten na venghawng uhin mual humah tai un hi.
15 Innkuul hum a, um ten a ken tukmi thil la tukin inn sungah tolh pahsuh hen.
16 Lo ah a um ten a puan la tukin innah pin pahsuh hen.
17 Numei naupai le naukai nei tei ca in haksazet tuk hi.
18 Mahmi haksatnakte cu phalbi laihtakin, a hen khak ngawlnak tukin Pathian nelah thungen un hi.
19 Itahim titale hi thil a heng tukmi hi Pathian in, leipi a piantik pepan tutian a um awng ngawlmi haksatnak hi tuk hi. Mailam ituk mah hei ten a hengleh awng tuk ngawl tohmi hi.
20 Topa in, mah ni cu a comtik ngawl bangta ahin, kuamah in thuak zo haw tukma hi. Mahnaven a tensa tei ca in, mah ni cu comtik tuk hi.
21 “Mi pa kha khatin, zo un! Hilai ah Khrih um, hilai khah Khrih um,” tin a ti vangin sang pahsuh un hi.
22 Itahim titale Khrih man ngawl le profet man ngawl tampi piang haw tuk hi. Pathian i tensate nangawn zol theih tawp zol tukin thasiahhuai nalamdang tampi bawl haw tuk hi.
23 Ngallingin um un! A laihngawlin hilhham khawng zo ing.
Mihing Capa Hennak Tuk Thu (Mt 24:29-31; Lk 2:25-28)
24 “Mah haksatnak hun ceng ten ni thimin, hade vak tukma hi.
25 Van pen aksite cakin, van a um huham hempoh cu hing haw tuk hi.
26 Mihing Capa cu lang tuk a, vaknak le sunloihnak tuah meingo hum pen hung tuk hi.
27 Leihum mawk khatlam pen mawk khatlam tian a ummi Pathian i tensate cawmkhawm tukin lei ningli ah vancungmite tiik tuk hi.
Theikung Pen Thuhilhnak (Mt 24:32-35; Lk 21:29-33)
28 “Theikung pen ngallinnak la un, A kangte hingin, a zik kuh kuumin, a ceh dawnnote a tawt ten khuakhal hun nai zo tih thei uh ci.
29 Mahti bang thilte na muh uhten hun nai zo, heng awndiak toh tih thei un hi.
30 Hilai a ummite a thih khawng haw laih ngawlin hi thil hempoh heng khawng tuk hi tih cu phawkngil pahsuh un.
31 Van le lei cu bo tuk naven ka awnkam cu bothong hihim tukma hi.
Kuamah In A Hun Thei Haw Ma (Mt 24:36-44)
32 “Mahnaven ituk ten mah ni le mah hun heng tuk tih cu kuamah in thei haw ma hi. Vancungmite le Capa vangin thei ma; Pa bekin thei hi.
33 Ituk ten a hun heng tuk hum tih na theih uh ngawl hangin ngalling le cingcai zetin um un hi.
34 Ituah bangve hum ti ahin, mi pa khat cu khualzintuk tulin a umlawhte khi a nadeh haw tuk celzet le kim zetin thupia in, kongka cingtupa vang hihbu sung ngawlin, kongka cingtiktu inn neitu pa bang hi.
35 Inn neitu bawi cu ituk ten heng tuk tih na theih uh ngawl hangin ngalling zetin um un hi. Zanlam hei hi thei in, zanngil vang hi thei, khuavak laihngawl le nisuak ten hei hi thei hi.
36 Thakhat thu in, a heng tale na hihbu laihin, tawk kha thei hi.
37 Jesuh in nohtei lakah ka hilhmi hi mi hempoh tei lakah a hilh hi toh ing hi; Ngalling zetin um un!” tin ti hi.