Jesuh Zuak Tukin Vaihawm Haw (Mt 26:1-5; Lk 22:1-2; Jn 11:43-45)
1 Kaltan Puai le naman tel ngawl cangho puai a kimnak tuk ni nih bekin sam hi. Thiampi upa le Daan zilhtu ten Jesuh khi mankuh denin, thah theihnak tuk lampi zei haw hi.
2 “Puai hun sungin bawl tukma hung, mipite buai bengbung kha haw kawn,” tin ti haw hi.
Jesuh Cu Bethani Ah Sathau Leih Haw (Mt 26:6-13; Jn 12:1-8)
3 Jesuh cu Bethani khua a, phaaknat a thuaktu Simon innah an a eih laih takin numei pa khatin, alabaster thawl pa khat, a manhak zetmi zimui tui a dimmi cu cawi hi. Mah thawl cu sukehin, zimui tui cu Jesuh i lu ah leih hi.
4 Mahlai a um mipite cu thinukzet haw in, “Pammaizet si maw?
5 Zimui cu ngun tangka za thumk valin zuakin, mah tangka in mi ca-ngahte bawm ahin, pha saw tukma maw?” tin pa khat le pa khat tidunin, numei nu cu mawhsiat li haw hi.
6 Jesuh in, “Imah ti pahsuh un! Ita dondak kha li uh cim? Amah in ka ca in, a pha mi le a mawi mi bawl zo hi.
7 Mi ca-ngahte cu a kumkhua in, nangmu lakah um haw tuk poh hi, na nuam uh tale i tuk hei ten bawm thei uh ci. Mahnaven kei cu nohtei lakah um leleng tuk mang hi.
8 Keimah vui tukin tuangtimsa in, a tihtheih zahin bawl zo hi.
9 Thungai in hilh ing. Leihum hempoh a, Thuthangpha a phuannak haw hempoh ah hi a bawlmi hi amah phawhlengnakin son leleng haw tuk hi,” ti hi.
Judah In Jesuh Zuak Tuk Lungkim (Mt 26:14-16; Lk 22:3-6)
10 Mahten nungzuitu sawm le pa nih sung pen Judah Iskariot cu Jesuh zuak tukin thiampi upa tei lakah hawh hi.
11 Amu lakah a otmi a zak haw ten a lungdam zetin tangka piak tuk thutiam haw hi. Judah in Jesuh cu zuak ngahin, amu khut sungah a hen theihnak tukin hun lemcang bek cang hi.
A Nungzuitute Tuah Kaltan Puai An Ei Haw
(Mt 26:17-25; Lk 27:7-14; Jn 13:21-30)
12 Naman hel ngawl cangho puai, ni khatnak ni, Kaltan Puai andonak tukin Tuuno a ngawh ni haw in nungzuitu ten, “Ilai munah kaw Kaltan Puai takeih ka tuangtip saktuk na deih?” tin dong haw hi.
13 Jesuh in mi pa nihtikin hitih bangin thucah hi. “Khua sungah hawh unna, tuithawl tuah tui cawitu pa tawk tuk uh ci.
14 Amah cu zui unna, a tumnak inn neitu pa i lakah, ‘Sazapa le a nungzuitu ten Kaltan Puai takeih a eih khawmnak haw tukin inndat cu ilai khi kaw, tin dong un ti hi.’
15 Mahten amuh ten humta khan ngengpi lak haw tuk hi. Ihempoh phano le cangkim zetin, a umsa mi khan hi tuk a, mahlai ah takeih eih khawmnak tukin bawl un,” ti hi.
16 Nungzuite cu hawhin khua sung a hen haw ten Jesuh i hilhhamsa bangin ihempoh a mansa khawngin mu haw a, mahlai ah Kaltan Puai takeih cu bawl haw hi.
17 Taklam ten Jesuh cu a nungzuitu sawm le pa nihte tuah heng haw hi.
18 Cabuai ah an a eih haw laihtakin, “Thungai in hilh ing. Nangmu lak pen keimah tuah an a ei langkhattu pa in keimah zuak tuk,” ti hi.
19 Nungzuitute cu lungnop ngawl zetin pa khat nung pa khat, “Na tih nuammi cu keimah poh hi kha ing maw?” tin dong tek haw hi.
20 Jesuh in, “Nangmu sawm le pa nih sungah a telbokmi; keimah tuah kuang pa khat sung a, cangho a nimtu pa hi tuk hi.
21 Mihing Capa cu thihnak thuak tuk, tin Lai Thiangtho sungah a tih bangin thi tuk hi. Mahnaven Mihing Capa a zuaktu pa i ca in lauhuaizet hi. Mahpa cu piang ngawlin a umta ahin, ama ca in pha saw tuk naven,” tin ti hi.
Topa Takeih (Mt 26:26-30; Lk 22:14-20; 1Kor 11:23-25)
22 Takeih a eih haw laih takin cangho cu la in, thu a nget celh ten bot themin, a nungzuitu tei lakah pia hi. “La unna ei un, hi, hi ka taksa hi,” ti hi.
23 Mah nungten khuat la in, Pathian nelah lungdam a sat ceng ten amu lakah pia in, in haw hi.
24 Jesuh in, “Hi, hi mi tampi tei ca in ka sung pen a luang tulmi ka thisan hi.
25 Pathian thutepmi a khotiktu ka thisan hi. Thungai in hilh ing. Vancung Uknak sung a, sabit thak ka inleh tian hi sabit hi, inleh tukma toh ing,” ti hi.
26 La a sak nung haw ten tulin Olif Mualah hawh haw hi.
Peter i Nialnak Hilhham (Mt 26:31-35; Lk 22:31-34; Jn 13:36-38)
27 Jesuh in, “Na venghawng uhin keimah zam tuk uh ci; Lai Thiangtho sungah, ‘Pathian in tuucingtu cu that tuk a, tuute cu vakkek khawng haw tuk hi,’ tin ngatsa in um hi.
28 Mahnaven thihnak pen ka thawhleh nungten nangmu masuan Galilee ah hawh tung,” ti hi.
29 Peter in, “Midang ten a taisan khawng haw hei in, kei in taisan hihim tuk mang,” ti hi.
30 Jesuh in Peter cu, “Thungai in hilh ing; tuzan ak vei nih a khuan laih ngawlin vei thum tian, ‘thei mang hi’ tin nial tuk ci,” ti hi.
31 Peter in nase sesemin, “Nangmah tuah thi bok tuk ka hi hei in, mahtih bangin awn hihim tuk mang,” ti hi. Nungzuitu dangte hei in mah bangbok lengin ti haw hi.
Gethsemane Ah Jesuh Thungen (Mt 26:36-46; Lk 22:39-46)
32 Gethsemane tihmi munah heng haw ten Jesuh in, a nungzuitu tei lakah, “Ka thunget sungin hilai ah um un,” ti hi.
33 Peter, James le Johan ten hawhpihin, A thinkhamnak le thasiatnak panto hi.
34 Amah in, “Ka lungkham leita hangin, a keh tuk bangin um hi. Hilai ah um unna, hihbu ngawlin ngak un,” ti hi.
35 A cangthei tuk ahi tale mah haksatnak cu tawk kha tuk ngawlin kun hi. Mailamah dawm hawh a, lei ah bokin thungen hi.
36 “Pa aw, ka pa aw! Nangma ca in ihempoh cangthei khawng hi. Hi thuaknak khuat hi ka lak pen la zazalin, mahnaven keima deihnak bang hi ngawlin nangma deihnak bang hi saw tahen," ti hi.
37 Mahten kiklehin, nungzuitu pa thum tei hihbu leng cu mu hi. Peter lakah, “Simon hihbu leng cim? Nazi pa khat sungno hei hihbu ngawlin um thei ma uh cim maw?” tin ti hi.
38 Jesuh in, “Hihbu ngawlin ngak unna, sualsohnak sungah cak tuk ngawlin thungen un hi. Na lungmu uhin deih naven, na tisa uhin nang zo ma thong si,” tin ti hi.
39 Mahten hawh lehleu in, a masa bangin thungenleh hi.
40 Mahten kiklehin, a nungzuitute hihbu khawng cu mu hi. A mit haw hakto thei ngawlin, iti bang don tuk him tih hei thei haw ma hi.
41 A vei thumnak a kihleh ten amuh tei lakah, “Hihbu in, cawl hiahhuah thei laih uh cim? Tawk toh hen! A hun heng zo hi! Zo un! Mihing Capa cu misual tei khutah piak hi zo hi!
42 Tho unna, hawh nung hi. Zo un, keimah zuaktu pa heng zo toh hi!” tin ti hi.
Jesuh Man Haw (Mt 26:47-56; 22:47-53; Jn 18:3-12)
43 Jesuh cu a otlih laihtakin nungzuitu sawm le pa nih tei sungah a telbokmi Judah cu heng hi. Judah tuah munkhatin thiampi upate, Daan zilhtute le Judah upa tei hahmi mi honpi cu ngalnam le tembekte cawi in hung haw hi.
44 Mi zuaktu pa in mi honpi cu melciknak pia zo in, “Ka napmi pa cu na mat nuam uh mipa hi tuk hi. Amah cu man unna, phano cingin hawhpihta un,” ti hi.
45 Judah a hen bek ten Jesuh cu zuanin, “Sazapa” tin nam hi.
46 Jesuh cu manin, khimzet ken haw hi.
47 Mahlai takin a el hawah a dingtu pa khatin, a naam dawk tulin, Thiampi Sang i umlawhpa i beng satvawk hi.
48 Jesuh in, “Kei hi nguca ing maw naam le tembek tuah na hun uh?
49 A nisialin Biakinn ah thu ka zilh lih laihin kuamah in man ma si uh si. Hi zuh hi, Lai Thiangtho sung a, thu cu a kim kul,” ti hi.
50 Mahten a nungzuitu hempoh ten zamsan khawng haw hi.
51 Tangvalno pa khat puan pano silhmi pa in, Jesuh cu zui hi. Amah vang cu mat tum bok haw 52 naven a puan zamin thacang taivawkta hi.
Thukhennakah Henpih Haw
(Mt 26:57-68; Lk 22:54-55; 63-71; Jn 18:13-14; 19:24)
53 Jesuh cu Thiampi Sang pa i innah pui in, mahlai ah thiampi upate, upa dangte le Daan zilhtute tuah tawkdun khawm haw hi.
54 A khawla thim pen Peter in zui in, Thiampi Sang i inntualah tum hi. Inntual a, ngalviltu tei lakah khungin mei awi hi.
55 Thiampi upate le thukhentu khonsil upa ten Jesuh cu a that nuamin, a sualnak zei li haw naven mu zo haw ma hi.
56 Mi tampi ten zolthu polcopin, Jesuh sual nawn haw naven thucun thei viang haw ma hi.
57 Mi khenkhatte dingto in,
58 Hi pa in, “Mihing sakmi Biakinn hi phia let khawng tung a, ‘Ni thum nungten mihing bawl ngawlmi Biakinn sa tung,’ a tih za ung,” tin zolthu nawn haw hi.
59 Mahti bang ahi hei in, thucun thei cuang haw ma hi.
60 A venghawng haw mai ah Thiampi Sang cu dingto in, Jesuh cu thudong hi. “Sual a not haw hi thei ma cim?” tin ti hi.
61 Mahnaven Jesuh cu daidenno umin, kam khatno hei don ma hi. Thiampi Sang in, “Sunloihmi Pathian Capa a cim maw?” tin dong lehleu hi.
62 Jesuh in, “Hi ing hi, Mihing Capa cu Cungnungbel Pathian taklamah khungin, vancung meingo tuah a hunleh mu tuk uh ci,” ti hi.
63 Thiampi Sang in, a puan botkekin, “Thutheitu a dang hei kul lehma toh hi.
64 Pathian a nautat zia cu thei khawng zo uh ci! Itin ngaisung uh cim?” tin ti hi.
65 Mi khenkhat ten Jesuh cu cilsiakin, a mithupin vat haw hi. “A vattu akua him? hilhin,” ti haw hi. Mahten ngalkap ten hawhpihin beng pepel haw hi.
Peter In Jesuh Phatsan (Mt 26:69-75; Lk 22:56-62; Jn 18:15-18; 25-27)
66 Peter cu Thiampi Sang pa i inntual a umlaihin, Thiampi Sang i umlawhnu pa khat cu hung hi.
67 Peter cu mei awi leng amuh ten cangcianzet zo in, “Nangmah vang Nazareth mi Jesuh tuah a um langkhat mi hi ci,” ti hi.
68 Peter in, “Thei kha mang, na otmi cu ithu him tih thei mang,” tin nialin, kongkal lampi ah a thawn ceng bek ten ak khuang hi.
69 Umlawhnu in mu lehleu in, a elkim mitei lakah, “Hi pa vang amu lakah telmi bokmi pah cuh!” tin ti lehleu hi.
70 Mahnaven Peter in nial lelengin, a ngei ngawlin, a elkim a ding ten Peter cu, “Kei tel kha mang tin nial thei hihim tukma ci; itahim titale nangmah vang Galilee mi hi ci,” tin ti haw hi.
71 Mahten Peter in, “Ka hilhmi hi a manmi hi. A man ma ahi tale Pathian in bawlsia hen tin tiamdun ing hi. Na tih uhmi pa thei kha mang,” ti hi.
72 Mahbek ten a vei nihnak ak khuangin, Peter cu Jesuh in ak vei nih a khuan laih ngawlin vei thum tian, “Thei kha mang hi” tin phatsan tuk ci, a tihmi phawklehin, nase zetin kap hi.