Jesuh Thawhkiknak (Mt 28:1-8; Lk 24:1-12; Jn 20:1-10)
1 Sabbath ni ceng, a zingten Mary Magdalin, James i nu Mary le Salome ten Jesuh luang noih tukin zimui lei haw hi.
2 Nipizing tung nisuak bek ten khanah hawh haw hi.
3-4 Lampi a hawh thah haw in, “Akua belin khaan kongkhah suangpi nawm zo tuk kam hung?” tin pa khat le pa khat dongdun li haw hi. (Mah suangpi cu suangpeek ngengpi hi) A zoh haw ten khaan kongkhah hon sa in mu haw hi.
5 Khaan sungah a tum ten tangval pa khat puan ngo silh taklam mawkah a khungleng cu mu haw a, lau mahtak haw hi.
6 Amah in, “Lau pahsuh un! Thinglamtehah a thah haw mi Nazareth Jesuh zei uh ci tih thei ing. Hilai ah umleh ma toh, tholeh zo hi. A koihnak haw mun hi zo un hi.
7 Atu-in hawh unna, a nungzuitu le Peter cu ‘Ama hilh hamsa bangkekin, nangmu masuan Galilee ah hawh unna, mu tuk uh ci,’ tin hilhta un,” ti hi.
8 Mahten khaan pen thinsu le lauthahin tulin tai haw hi. A lau leita haw hangin kuamah lakah son ngam haw ma hi.
Mary Magdalin Lakah Jesuh Lang (Mt 28:9-10; Jn 20:11-18)
9 (Nipi ni-in, thihnak pen Jesuh a thawhleh nungten a masabelin Mary Magdalin lakah lang hi; Mary Magdalin cu a sung pen khawhuai salih a hawlvawk sakmi nu khi hi.
10 Mary Magdalin cu hawhin, a ngualcamte hilh hi. Amuhte cu Jesuh a thih hangin lungleng khawngai in kap li haw hi.
11 “Jesuh nungleh zo, mu ing hi,” tin, a hilh haw ten sang haw ma hi.)
Nungzui Pa Nih Lakah Jesuh Lang (Lk 24:13-35)
12 Mah nungten nungzuitu pa nih cu khuano lamah a hawh lih haw laihin phundang zetin amu lakah lang hi. 13 Kikleh haw a, midang tei lakah hilh haw naven amuh ten sang haw ma hi.
Nungzui Sawm le Pa khat Lakah
(Mt 28:16-20; Lk 24:36-49; Jn 20:19-23; Nung 1:6-8)
14 A dawlbel ten Jesuh cu nungzuitu sawm le pa khatte an a eih laihtak haw in, amu lakah lang hi. Upnak a neih haw ngawl hangin le amah cu nungleh hi, tih a mutu tei sonte a up haw ngawl hangin liat hi.
15 Jesuh in, “Leihum khua le ngam hempoh ah hawhta unna, mi hempoh tei lakah lungdamnak Thuthangpha hilhta un.
16 A kuakua hei hihen a thu umin, tuiphumnak a ngahtu hempoh cu nunpat hi haw tuk hi. Mahnaven a thu um ngawlte cu sual thaman thihnak thuak haw tuk hi.
17 A umtute cu nalamdang bawl theihnak huham piak hi haw tuk hi. Ka minin khawhuai hawlvawk thei haw tuk a; awn thakin awn haw tuk hi.
18 Ngul a mat haw ten hihen, thihsi a in haw ten hei hihen, imah kinmawh haw tukma hi. Mina tei humah a khut haw nga in, tinate vang damtik haw tuk hi,” tin ti hi.
Jesuh Vanah Kaito (Lk 24:50-53: Nung 1:9-11)
19 Topa Jesuh cu amu lakah thu a hilh ceng ten vancungah lak tohin um a, Pathian taklamah khung hi.
20 Nungzuitute cu hawhin, ngam hempoh ah thuhilh haw hi. Topa cu amu lakah nadekin, nalamdang tampi a bawlmi in, a thuhilh mite man loli hi, tih langtik hi.
Thu Khupnak Dang 16:9-10
9 Numeite cu Peter le a ngualcam tei lakah hawh haw in, a thu theih haw cu a com zawngin hilh haw hi.
10 Mahceng ten Jesuh amah loli in, kumkhua nunnak thu, thu nung le thu thiangtho cu nisuahnak lam pen nitumnak lam tiang a nungzuitute mangin than khawng hi. Amen.