To listen that verse in audio click to Ngawn..
MARKA Ngatmi Lungdamnak Thuthangpha
(The Gospel according to Mark)
Tuiphum Johan i Thuhilhnak (Mt 3:1-12; Lk 3:1-18; Jn 1:19-28)
1 Pathian Capa Jesuh Khrih i Thuthangpha cu hi bangin hi.
2 Profet Isaiah i ngatmi laibu sungah: “Pathian in, ‘Na matanah na hawhnak lam sial tukin, ka kamtaitu pa hawh hamtik ing.
3 Mi pa khat cu hampa lak pen au in, ‘Pathian hunnak tuk lampi na bawlham un. A hawhnak tuk lampi na camtik un,’ ti hi,” tin ngan hi.
4 Tuiphum Johan cu phillawn pen tulto in, sualzahnak tukin, “Na sualnak uhte sikin, tui na phum uh tale Pathian in, na sual uhte ngaithiam tuk,” tin hilh hi.
5 Johan i thuhilhmi ngai tukin Judah ngam le Jerusalem khua sung a, mi hempoh cu hung haw hi. A sualnak haw siklehin, Jordan Ngunah tuiphum haw hi.
6 Johan cu kalauk mul tahmi puan silh a, saphaw taikhap tuah a el hetin, khaau le hampa lak a, khuaihum ei in um hi.
7 Amah in hi bangin thuthan hi, “Keimah sangin a thawmngeng saw ka nungah heng tuk laih hi. Kei cu ama kedam khau duktu tuk hei in tak mang.
8 Kei in, tui sungah nangmuh phum naveng amah in, noh cu Hawvang Thiangtho sungah nangmuh phum tuk hi,” tin hilh hi.
Jesuh Tuiphumnak le Sualsohnak (Mt 3:13, 4:11; Lk 3:21-22, 4:1-13)
9 Mah hun laih takin Galilee ngam Nazareth khua pen Jesuh hungin Jordan ngunah Johan in tuiphumnak pia hi.
10 Tuiphumnak lak celh le tui sung pen a thawh toh laih takin, van kong hongin, Hawvang Thiangtho cu khulo bangin Jesuh humah kumsuk hi.
11 Vancung pen aw ing pa khatin, “Nangmah cu ka ihbel ka Capa ci; Ka lungdamnak nangma sungah um hi,” ti hi.
12 Thakhat thu in, Hawvangin Jesuh cu phillawnah hawhtik hi.
13 Phillawnah ni sawm li umin, mah hun sungah Satan i sualsohnak thuak hi. Mahlai ah sahangte um haw naven vancungmite hungin bawm haw hi.
Jesuh In Ngasa Mantu Pa Li Sam (Mt 4:12-22; Lk 4:14-15; 5:1-11)
14 Mah ceng ten Johan cu thawnginn sungah khum haw a, Jesuh cu lungdamnak Thuthangpha hilhin Galilee ngam sungah vak hi.
15 “Hun pha heng zo hi,” ti in, “Pathian Uknak nai zo! Na sualnak uhte siklehin, lungdamnak Thuthangpha um un,” tin hilh hi.
16 Jesuh cu Galilee tui mawk lamah a hawh laih takin, Simon le a nau Andru, suuk vawktu tei unau nihte cu tui sungah suukvawk li in mu hi.
17 Jesuh in, “Ka nungzui un, mihing matdan zilh tung hi,” ti hi.
18 Thakhat thu in, a suuk haw zamin zui haw hi.
19 Demlaihno a hawh ceng haw ten, Zebede i capa James le a nau Johan cu hawmkuang sungah a suuk haw bawl li in mu leleu hi.
20 Jesuh in, amuh bek ten a pa nih haw in sam paihin, a pa Zebede le a kulite cu hawmkuang sungah zamin, Jesuh zui haw hi.
Khawhuai Zelhpa (Lk 4:31-37)
21 Jesuh le a nungzuitute cu Kapernaum khua lamah hawh haw a, Sabbath ni-in, Jesuh cu pumkhawm inn sungah tumin thu hilh hi.
22 Mipi ten Jesuh thuhilhnakte a zak haw ten lamdangsazet haw hi. Daan zilhtute bang kha ngawlin thunei zetin thu hilh hi.
23 Mah hunkekin, pumkhawm inn sungah khawhuai zelhpa lut tum bokin,
24 “Nazareth khua mi Jesuh aw, kohtei lakah i bawl tuk nei nge cim? Keimuh siatsuah tukin hung cim maw? Akua nge cim tih thei leng ung hi; Nang cu a Pathian i mi Thiangtho hi ci,” tin ngingzet auto hi.
25 Jesuh in, “Mengdenin; hi pa i sung pen tulin,” tin thupia hi.
26 Khawhuai cu a tul tuk ten, mahpa cu thingnekta zamin, ngingzet au in tul hi.
27 Mipite ten lamdangsa zetin pa khat le pa khat, “Iti bang thu him? Thuneihnak tuah a dim thuhilhnak thak hi ma maw? Hitih bang ngai in khawhuai tei humah thunei a, tai in, a tih ten tai haw hi,” tin amuh le amuh dongdun li haw hi.
28 Jesuh i minthannak cu mahlai mun pepanin Galilee ngamsung hempoh ah thangkeh paih hi.
Jesuh In Mi Tampi Damtik (Mt 8:14; Lk 4:38-41)
29 Pumkhawm inn sung pen a tulin, James le Johan tuah Simon le Andru tei innah hawh haw hi.
30 Simon i sungnu cu a nattunin, zaunakah um hi tih thu Jesuh a hen ten hilh paih haw hi.
31 Jesuh cu mah nu i lakah hawhin, a khut pen len a, phongto hi. A phot bek ten dam paihin, a mikhualte tuamlawm hi.
32 Taklam nitum ceng ten, tina hempoh le khawhuai zelh hempoh cu Jesuh lakah hawhpih haw hi.
33 A khuatang haw in, Jesuh i umnak kongka bulah dim ukin khawmdun haw hi.
34 Natnak phunkim a thuak hempoh le khawhuai zelh hempoh hawlvawk sak khawng hi. Jesuh in khawhuai tei ot tuk phal ma hi. Itahim titale amah cu akua him tih thei haw hi.
Galilee Ah Jesuh Thuhilh (Lk 4:42-44)
35 A zing ten vak laihngawl tho in, inn pen tulin, mivengnakah thungen tukin hawh hi.
36 Simon le a phialpih ten Jesuh zei in, amuh haw ten;
37 “Mi hempoh ten nangmah zei li haw ven,” tin hilh haw hi.
38 Mahnaven Jesuh in, “Hilai elkim a khua hempoh ah hawh pepelin, thuzilh tuk hung hi, itahim titale ka hunsanbel cu thuzilh tuk na hi,” ti hi.
39 Mah hangin Jesuh cu Galilee ngamsung hempoh ah hawh a, pumkhawm inn sungah thuzilhin, khawhuai hawlvawk pepel hi.
Jesuh In Mi Pa Khat Damtik (Mt 8:1-4; Lk 5:12-16)
40 Miphaak pa khat Jesuh lakah hungin, a mai ah khukdinin bokin, “Kei na bawl nuam ahin thiangtik thei ci,”a tin kuun hi.
41 Jesuh in, a hehpihzet taktohin, a khut tuah zenin, “Damtik nuam ing hi,” tin donin, “Thiang tohin!”
42 a tih bek ten a phaaknat cu dam paih hi.
43 Jesuh in amah cu thakhat thu in, damtik a, “Ngai hih kek, hi thu hi kuamah i lakah hilh pahsun.
44 Na thiampi pa i lakah hawh inna, lakin, miten damciang na hihlam a theihnak haw tukin, Moses i thupiaknak bangin, biakpiaknak na bawlin hi,” tin thupia hi.
45 Mahnaven a hawhnak hempoh ah mitei lakah hilh pepelin, thangkehtik khawng hi. Mah hangin Jesuh cu mitei muhin khua sungah tum ngam ngawlin, dai pawleu mivengnak munah um hi. Mah ahi hei in, khua tihkim pen mipite cu ama lakah zuan haw hi.