To listen that verse in audio click to Ngawn..
Jesuh In Tizawng Pa Khat Damtik (Mt 9:1-18; Lk 5:17-26)
1 Ni dawmlaih nung ten Jesuh cu Kapernaum khua sungah heng lehin, mi hempoh ten innah um hi tih thu theikeh khawng haw hi.
2 A theihbek haw ten, umnak hei tong ngawlvo in, kongka tian dim ukin khawmdun paih haw hi. Jesuh in amuh lakah thu hilh hi.
3 Thu a hilh laih takin tizawng pa khat cu mihing pa li ten zawngin, Jesuh lakah hawhpih haw hi.
4 Mihing dim uk tak cu Jesuh lakah henpih thei haw ma hi. Mah hangin Jesuh i umnak tawk zawnkek hum pen innkuul hongletin, tizawng pa cu a zaunak tuah khesuk cih haw hi.
5 Jesuh in, a upnak haw a muh ten, tizawng pa i lakah, “Capa aw, na sualnakte ngaihdam hi zo,” ti hi.
6 Mahnaven amu lak a, khung boktu Daan zilhtu khenkhat ten,
7 “Hi pa in ita hi tih bangin a ot theih? Pathian humah awn sual hi. Pathian pa khat bek sialngawl akua him sualnak a ngaidam thei?” tin, a lungmu sung haw in ngaisung haw hi.
8 Jesuh in, a ngaihsutnak haw thei paihin, “Nohte ita hi tih bangin thu ngaisung uh nge cim?
9 Tizawng pa i lakah iti bangin ka ti ahin baih saw tuk him? Na sualnak ngaihdam hi zo toh hi tih maw, tho inna, na zaunak la in hawhin, tih iti bang baih saw tuk him?
10 Mahnaven Mihing Capa in leihum pen sual ngaihdam theihnak thunei hi, tih na theihnak tukin,” tin ti zawng pa i lakah,
11 “Tho inna, na zaunak la in, na innah pinin ti ing.”
12 A tina pa cu tho to paihin, a zaunak le in, mi hempoh muhin pin hi. A mutu hempoh ten lamdangsa in, “Hitih bang thu itukmah in mu awng ma hung,” ti thahin Pathian thangphat haw hi.
Jesuh In Levi Sam (Mt 9:9-13; Lk 5:27-32)
13 Jesuh cu Galilee tui mawk lamah hawh lehin, mihonpi ten a nungzui haw a, mihonpi cu thuzilh pan hi.
14 A hawh laih takin, Alfias i capa Levi cu siahdonnak zung sungah khungin mu hi. Jesuh in, “Ka nungzui in,” a tih bek le Levi cu dingto in, Jesuh nungzui paih hi.
15 Mah ceng ten Jesuh cu Levi innah an ei hi. Siahkhontu le misual tin, a tihmi haw, mi tampi ten Jesuh cu zui haw in, a khenkhatte cu Jesuh le a nungzuitute tuah an ei langkhat haw hi.
16 Farasi le Daan zilhtu khenkhat ten, Jesuh cu misualte le siahkhontec tuah an ei langkhat amuh haw ten a nungzuitu tei lakah, “Amah cu ita misual le siahkhontute tuah an ei langkhat a, tui in langkhat him?” tin dong haw hi.
17 Jesuh in hi thu a zak ten, “Tidam ten sibawi kin haw ma, tinate bekin kin haw hi. Mi thiangthote pui tukin hung mang, misualte pui tukin hung ing,” tin donleh hi.
An Cannak Thu (Mt 9:14-17; Lk 5:33-39)
18 Vei khat cu Tuiphum Johan i nungzuite le Farasi mite an cangin, a um haw laih takin, Jesuh lakah hawhin, “Tuiphum Johan nungzuite le Farasi ten ancang haw si, ita na nungzuitu ten ancang haw ma kaw?” tin dong haw hi.
19 Jesuh in, “Zihuaitu tangval pa cu a ngualcamte tuah langkhatin, a um haw laih takin, a ngualcam ten ancang thei haw a ni maw?” Cang thei tukma! Zihuai pa tuah a um langkhat sungzong cu ancang thei haw tukma hi.
20 Mahnaven zihuaitu pa khi a ngualcamte tuah a khendun ni heng tuk laih hi. Mah hun ten an cangleh haw tuk laih hi.
21 “Kuamah in puansia khi puanthak tuah dah awng haw ma hi. A dah ahin, a dahnak puan thakin, a puansia cu ngeng saw deuhin baltik tuk hi.
22 Savun thawl lun sungah kuamah in sabittui thak thun awng haw ma hi. A thun haw tale sabittui in savun cu pokkehtik tuk a, sabit tui thak cu savun thawl thak sungah thun dan hi,” tin hilh hi.
Sabbath Cungcang Thudotnak (Mt 12:1-8; Lk 6:1-5)
23 Jesuh le a nungzuitute cu Sabbath ni-in, sangvut lo lai ah a hawh laihtak haw in, a nungzuitu ten sangvut ngui zutin, ei haw hi.
24 Mah hangin Farasi ten Jesuh lakah, “Zo in, Sabbath ni-in bawldan ngawlmi cu ita na nungzuitu ten bawl haw him?” tin dong haw hi.
25 Jesuh in, “David le a ngualcam tei ngilkial laihtakin, a bawl haw khi sial awng ma uh cim maw?
26 Thiampi Abiathar khan laihin, David le a ngualcamte cu ngilkial emin, a um haw ten David cu Pathian biaknak inn sungah tumin, thiampi sialngawl kuamah i eih dan ngawlmi cangho thiangtho ei in, a ngualcamte a piak thu khi sial awng ma uh cim maw?
27 Sabbath ni cu mihing ca tuk a bawlmi si, mihing cu Sabbath ni ca tukin bawlmi kha ma hi.
28 Mah hangin Mihing Capa cu Sabbath i Topa hi,” tin don hi.