To listen that verse in audio click to Ngawn..
Khut Zawngpa (Mt 12:9-14; Lk 6:6-11)
1 Jesuh cu pumkhawm inn sungah a tumleh ten, mahlai munah khut langkhat zawng pa um hi.
2 Miten Jesuh sualman nuamin, Sabbath ni-in, tinate damtik na maw tih le! tin zonim leng haw hi.
3 Jesuh in khut zawngpa cu, “A laizangah dingin,” ti hi.
4 Mahten, “Sabbath ni-in, thilpha bawl pha saw tuk maw, siatnak bawl pha saw tuk him? A nunnak pat tuk maw, thatin zam tuk iti bang pha saw him?” tin a dot ten kuamah in don thei ngawlin mengden haw hi.
5 Jesuh in thinuknak mitmai tuah a elkim mihing hempoh a zohten, mi thinlian ngeh a hih haw tak cu a thasia in, khut zawngpa cu, “Na baanzakin!” ti hi. A baan cu zaakto pohle a khut cu dam hilhial paih hi.
6 Pumkhawm inn pawlam a tul cengbek haw ten thakhatin, Farasi le Herod i miten Jesuh that nuamin, a sual zei tukin thusiam li haw hi. Tuiting Mawkah Mihonpi
7 Jesuh cu a nungzuitute tuah Galilee tuiting lamah kiklehin, mihonpi ten zui haw hi. Galilee le Judea ngam,
8 Jerusalem khua, Idumea ngam, Jordan ngun ngalkhat lam le Taiar le Sidon ngamsung a ummi hempohin, Jesuh i thu hempoh a zak haw ten a lakah hawh haw hi.
9 Mihonpi tei nawkvawk khak tuk ngawlin, a nungzuitute hawmkuang koih hamtik hi.
10 Itahim titale, Jesuh in mi tampi a damtik hangin, natnak a vei hempoh ten amah zen nuamin neek tutuh haw hi.
11 Khawhuai zelh miten Jesuh amuh haw ten, “Pathian Capa ci!” tin, a kebulah bokin au li haw hi.
12 Jesuh in khawhuai zelhmi ten amah cu akua him tih son ngawl tukin thupia hi.
Jesuh In Nungzui Sawm le Pa Nih Teng (Mt 10:1-4; Lk 6:12-16)
13 Jesuh cu mual humah kaito in, a mi deihtente sam hi. A sam mite cu a lakah hung haw in,
14 amah in mi sawm le pa nih teng ing, nungzuitute tin sam hi. Jesuh in, “Keimah tuah um tukin nangmuh ten ing,” tin hilh hi. “Thuhilhtu tukin hei in tiik tung a,
15 khawhuai hawlvawk theihnak tukin thuneihnak nei tuk uh ci tin ti hi.
16 A tenmi nungzuitu sawm le pa nih min cu: Simon (Peter tin min thak a phuahmi pa;)
17 Zebede i capa James le a nau Johan; James le a nau Johan tei unau nihte cu Jesuh in, a min haw ‘Boanerges’ tin sa in, a sullam cu “Vanthum Ca,” tihnak hi.
18 Andru, Filip, Bartholomew, Matthai Thomas, Alfias capa James, Thaddaeus, Phunnam tantu Simon le
19 Jesuh zuaktu Judah Iskariot hi haw hi.
Jesuh le Beelzabul (Mt 12:22-32; Lk 11:14-23; 12:10)
20 Jesuh cu a innah pin hi. Mihon tam leita a khop haw tak cu a nungzuitute le Jesuh cu an eihnak hun hei nei haw ma hi.
21 Mah thu cu a innkua pih ten a zak haw ten, “Jesuh a lung-am zo hi,” tin mipi ten a tih si bok haw hangin amah cingkhawi tukin hawh haw hi.
22 Jerusalem khua pen a hungmi Daan zilhtu ten, “Hi pa in Beelzabul nei hi! Dawi suangin, khawhuai hawlvawk hi,” tin ti haw hi.
23 Jesuh in amuhte cu samin, tehkipnak tuah thu hilh hi. “Iti bangin kaw Satan in Satan lala a hawlvawk theih tuk?
24 Ngam pa khat cu khen nih suahin le a lemdun ngawlmi ngam cu kho tukma hi.
25 Innkua khat cu khen nihin suahin, a haudun lite cu kiamsuk haw tuk hi.
26 Mah hangin Satan in amah le amah do in, a khen ahin ding zo ngawlin a uknak ngam cu caksukin bo tukma hi.
27 “Mi ngilpa cu kencih masa ngawlin iti bangin a inn sungah tumin, a vante laksak thei haw tuk him?
28 Thungai in hilh tung. Mihingte izahta sualin, awn sia tian a awn li haw hei in ngaihthiam hi haw tuk hi.
29 Mahnaven Hawvang Thiangtho a sonsiatute cu sual ngaihdamnak ngah haw tukma hi.
30 (Itahim titale, “A sungah khawhuai um hi,” a tih haw hangin hi.)
Jesuh i Nu le Naute (Mt 12:46-50; Lk 8:19-21)
31 Mahlai takin a naute le a nu cu hung haw a, inn pawleu lamah dingin, Jesuh samsak tukin mi pa khat cial haw hi.
32 A kimkot a khungtu mihonpi ten, “Na nu le na nau ten nangmah zei in, pawleu lamah um li haw hi,” tin hilh tum haw hi.
33 Jesuh in, “Akua nge ka nu?” “Akua nge ka naute cu?” tin dong hi.
34 A kimkot a khungtu mihonpi cu zo kawkawi in, “Zo un! Hite hi ka nu le ka naute haw hi!
35 Pathian i deihnak bangin a nungcatute cu ka unau, ka u le nau le ka nu hi haw tuk hi.”