To listen that verse in audio click to Ngawn..
Anci Theh Tehkipnak (Mk 13:1-9; Lk 8:4-8)
1 Jesuh cu Galilee Tuipi mawkah thuzilhleh hi. A lakah a hungmi mihingte a tam leita haw hangin hawmkuang sungah tumin khung hi. Hawmkuang cu tui hum khawla thimah umin, mi honpite cu tuimawk tianah ding haw hi.
2 Jesuh in tehkipnak tuah thu tampi zilh hi.
3 Jesuh in, “Ngai un! Vei khat laihin, anci theh pa cu anci theh tukin lo ah hawh hi.
4 Anci a theh ten a khenkhat cu lamlai ah cu in, vano ten khul khawng haw hi.
5 A khenkhat cu leingam siatnak suang lakah cu hi. Thakhatin poto naven,
6 a zung mutnak tuk lei a um ngawl hangin nisuakin, ni a sat ten thiimin, thileh khawng hawta hi.
7 A khenkhat cu ling lakah cu a, lingkung ten depin, a cang nei thei haw ma hi.
8 Anci khenkhatte cu lei ngampha munah cu a, phazetno khangto in, a let sawm thum, a let sawm luk; a let za khat tianin ngah hi.
9 Zaknak tuk beng a nei ten na zata un,” tin zilh hi.
Tehkipnak i Tuptahmi (Mt 13:10-17; Lk 8:9-10)
10 Jesuh amahno a umlaih takin a nungzuitu sawm le pa nih ten a tehkipnak i sullam dong haw hi.
11 Jesuh in, “Na theih awng ngawl uhmi Pathian Uknak thukuh,” na theihnak tuk uhin thupia zo hi. “Mahnaven pawlam a ummi tei lakah tehkipnak tuah bekin zilh hi.
12 Mah hangin, ‘Zo li haw tuk naven mu haw tukma hi. Ngai li haw tuk naven thei zo haw tukma hi. Itahim titale, mu thei in, a theithei hawta ahin Pathian nelah kiklehin, ngaihthiam mi hi haw tuk naven,’ ” ti hi.
Jesuh In Anci Theh Thu Hilhciang (Mt 13:18-23; Lk 8:11-15)
13 Jesuh in, “Hi tehkipnak hi theiciang ma uh cim maw? Na thei ma uh tale iti bangin tehkipnak dangte thei zo tuk uh cim?” tin ti hi.
14 Anci theh pa i a thehmi anci cu Pathian thu hi.
15 Lampi lakah a cumi ancite cu Pathian thu a zak bek haw ten Satan hung paihin, amu sung a Pathian thu cu lonsakta hi.
16 Mahti bang bokin suang lakah a cumi ancite vang Pathian thu a zak bek haw ten lungdam emin, sang paih bok haw hi.
17 Mahnaven amu sungah zungthuk bun tum ngawl a hih hangin ngei kho ma hi. Mah hangin Pathian thu hangin a haksatnak le thuaknak a hen ten thakhat thu in, letleh haw hi.
18 Mi khenkhat cu lingcam lak a cumi anci bang hi. Pathian thu za haw,
19 naven hi leihum thinkhamnak, hauhsaknak, a dang deihnak le mahelhnak ten depin, a khuh hangin a ngah, ngah thei haw ma hi.
20 Lei ngampha mun a, cumi ancite cu Pathian thu komno za a, lungdamzetno sangin, a let sawm thum, a let sawm luk, a let za khatin ngah haw hi.
Kho Tuah Khuhmi Mei Inn (Lk 6:16-18)
21 Jesuh in, “Mei inn khi meivaknak humah vak ngawlin kho sinkhupin, zaunak nuai ah koih awng uh cim maw?
22 A lang ngawlin ipzawh tuk imah um tukma hi.
23 Beng a nei hempohin za haw tahen,” ti hi.
24 Jesuh in, “Na zak uhmi thute komno in kemta un. Midangte tehnakin, na man uhmi khi Pathian in nangmah tehnakin mangleh bok tuk hi.
25 Itahim titale a neite piakbet hi haw tuk a, a nei ngawlte cu a neihcalam cawmin laksak hi haw tuk hi,” tih hilh hi. A Khangmi Anci Tehkipnak
26 Jesuh in, “Vancung Uknak thu cu mi pa khatin, a lolai ah anci a vawh tuah bangve hi.
27 Amah cu sun le zanin hihbu in, a khatlawh ten a ancite cu po in, khangto naven iti bangin po in khangto hum tih thei ma hi.
28 Leingamin, ama thuno in, ancite po in nguitik hi. A masabelin, a kung, mahceng ten a ngui, mah ceng ten a ngui sungah a cang piangtik hi.
29 Cangsan ceng bek ten an cop hun toh hangin phio tuah cang at tukin vaithawi hi,” tin hilh hi.
Ankam Ci Tehkipnak (Mt 13:31-32; Lk 13:18-19)
30 Jesuh in, “Vancung Uknak cu i tuah tehkip tuk hing ngim? I tehkipnak tuah lak tuk ing kaw?
31 Ankam ci tuah bangve hi. Ankam ci cu leisungah cinmi anci hempoh lak pen a cang neubel hi.
32 A ngei ngawl poto in, ankung hempoh lak pen a kung ngengbelin saizet hi. A kangkak a ngengzet hangin hampa lak a, vano ten a limbeelin, a sungah busehin um haw,” tin hilh hi.
33 Hitih bangin tehkipnak dangte mangin amu lakah a theihzawh theih haw tuk tianin hilh hi.
34 Tehkipnak tel ngawlin thu hilh awng ma hi. Mahnaven a nungzuitute tuah amuh bek a um haw ten ihempoh hilhciang khawng hi.
Jesuh In Huihpi Daitik (Mt 8:23-27; Lk 8:22-25)
35 Mah ni taklamin, Jesuh cu a nungzuitu tei lakah, “Ngalkhat lamah hawh nung,” a tih ten,
36 mihonpite cu a nunglamah zamin, hawmkuang sungah Jesuh tuah hawh haw hi. Adang hawmkuang tampi vang umbok hi.
37 Tuipi humah a um laihtak haw in, huihpi nase zetin theu hi. Tuihualpi cawkin, a hawmkuang haw cu sepvawk kawkawi in, a sungah tui dim awndiak hi.
38 Jesuh cu hawmkuang taw lam, khunnak humah hihbu leng hi. A nungzuitu ten phong haw a, “Sazapa, ka lalthong uh hei in imah nopmawh kha olma bang um sisi,” tin ti haw hi.
39 Jesuh cu tho in, huihpi le tuipi cu “Daiden un, phia toh pahsuh un,” tin, a liat ten huihpi theu le tuihualpi cu cawl paih hi.
40 Mahlai takin Jesuh in, “Ita lau uh cim? Ita upnak nei ngawl uh cim?” tin ti hi.
41 A nungzuitu ten lau em haw in, “Hi pa hi iti bang mihing hi tuk hum? Huihpi le tuihualpi pohcawmin, a thu mang thei haw cu!” tin pa khat le pa khat tidun li haw hi.