Nazareth Ten A Thu Sang Haw Ma (Mt 13:53-58; Lk 4:16-30)
1 Jesuh cu mahlai mun pen thawnin, a nungzuitu ten a piannak ngam lamah hawhpih haw hi.
2 Sabbath ni-in, Jesuh in pumkhawm innah thuhilh hi. Mipi ten, a thu a zak haw ten lamdangsazet haw hi. “Hi pa in, hi thute ilai pen ngah nemtim? Na lamdang hi tihzat iti bangin a bawl theih?” tin ti haw hi.
3 “Amah cu Mary i capa, lettama dektu, James, Josef, Judah le Simon tei upa pohta ngam maw? A suahpih numeite vang hilai ah um bok haw hi,” tin ti li haw hi.
4 Jesuh in hi bangin thuhilh hi, “Profet ten a khua le tui, a phunpih le a innkua, tih sialngawl mundangah upat co haw hi,” ti hi.
5 Jesuh in mahlai munah tina dawmlaih tei humah a khutsuanin damnak a piak tih ngawl nalamdang imah bawl ma hi.
6 Jesuh in mipi ten amah a up haw ngawl hangin lamdangsazet hi.
Nungzui Sawm le Pa nihte Tiik (Mt 10:5-15; Lk 9:1-6)
Mahceng ten Jesuh cu a elkim khua dangah Pathian thu hilhin vak kawkawi hi.
7 Mah laih takin Jesuh in, a nungzuitu sawm le pa nihte samin, dawi ngilote hawlvawk theihnak tukin thuneihnak pia in, pa nih pa nih tekin vaktik hi.
8 “Thiangkhut tih ngawllam lak pen na man tuk uh a dang imah keng pahsuh un; An, dip, sum le pai, keng pahsuh un.
9 Kedam bulh un; Angki silh thuah tuk vang keng pahsuh un.
10 A khua sung haw pen mun dangah na thawn uh tianin, na tum masanak tei innah um leng un.
11 Munkhat pawpohah na thuhilh uhte ngai nuam ngawlin a kik haw tale na tul uhten amuh tei humah phat ngawlnak thusia um tahen tihnak tukin na ke uh a, leivul thiingta in zam un. Mahmi cu amuh tei ca ngallin piaknak hi tuk hi,” tin thupia hi.
12 A nungzuitute cu hawh haw a, mipite cu sualsihnak thute hilh haw hi.
13 A sung hawah khawhuai a umte hawlvawk sakin, tina tampi cu sathau tuah zutin damtik haw hi.
Tuiphum Johan Thihnak (Mt 14:1-12; Lk 9:7-9)
14 Jesuh i thulate cu mun hempoh ah a zalh khawng hangin, Herode kumpipa in za bok hi. “Tuiphum Johan cu a thihnak pen tholeh zo in, hi pa i sungah hu le thawmin, na dek hi,” tin miten son haw hi.
15 Mi khenkhat ten, “Amah cu Elijah hi,” tin son haw hi. A khenkhat lam ten, “Amah cu Pathian profet pa hi, tanglaih a profet pa khat bang hi,” tin ti haw hi.
16 Mahmi cu Herod kumpipa in, a zak ten, “A ngawng ka tan sa Johan nungleh,” ti hi.
17 Herod kumpipa in Johan cu mantikin thawngah khum hi. Ita hi bangin bawl him ti ahin, Herod in, a nau Filip i zi Herodias cu lonsakin, a huai hang hi.
18 Hi a nau i zi Herodias a lonsaknak thu cu Tuiphum Johan in Herod i lakah, “Na nau Filip i zi tuah na umkawm uh hi dik ma hi,” tin, a hilh mek hangin hi.
19 Mah hangin Herodias in Johan cu hua emin, that nuamzet naven that thei ma hi.
20 Herod in Johan cu mipha le a thiangtho mihing hi tin, a theih tak cu lau emin hup lo hi. Herod in, Johan i ama thu a hilhte cu a zak sial ten a lungnop awng ma naven a thuhilhte cu ngai nuamzet hi.
21 A dawlbelnakin, Herod kumpipa in, a hin ni-in, hunpha la in, acozah bawi upate, ngalbawi upate le Galilee ngamsung a upate samin puai bawl hi.
22 A puai bawl laihtakin Herodias i canu cu hawh tumin, laam cawm hi. Herod le a puai simtu hempoh lungdamtik hi. Mah hangin Herod in khanglaino lakah, “Na deih pawpoh ngen inna, pia tung,” ti hi.
23 “Na deih pawpoh ngen inna, ka ukmi ngam i khen langkhat tianin pia tung,” tin thutiam hi.
24 A khanglaino cu hawh tulin, a nu i lakah, “I ngen tung kaw?” tin dong hi. A nu in, “Tuiphum Johan i lu ngenin,” tin hilh hi.
25 Khanglaino cu manlang zetin kumpi lakah hawhin, a deihmi cu hilh hi. “Tuiphum Johan i lu pia in,” tin ngen hi.
26 Kumpipa cu thasiazet naven a thutiamsa bangin a inn a, puaisim a upat manin, khanglaino i thu cu el ngam ma hi.
27 Kumpipa in Johan i lu la tukin thakhatin, a ngalkapte pa khat hawhtik hi.
28 Ngalkap pa cu hawhin, thawnginn sung pen Johan i lu a tan celh ten daalkuang pa khat humah cawi in, khanglaino cu pia hi. Khanglaino in, a nu pia sawlawn hi.
29 Johan i nungzuite ten hi thu a zak haw ten a luang la tukin hung haw in, khansungah vui haw hi.
Jesuh In Mi Thawng Nga An Vak (Mt 14:13-21; Lk 9:10-17; Jn 6:1-14)
30 Jesuh lakah a nungzuitute a henkikleh haw ten a bawl haw hempoh le a thuhilhmi hempoh cu Jesuh lakah hilh khawngleh haw hi.
31 Jesuh in, “Hung un mivengnakah hawh nung. Cawldam tukin demlaihno cawl hih nung,” ti hi. Itahim titale a hung lam le a hawhlam tih mihing tampi a um leleng haw hangin an hei ei man haw ma hi.
32 Mah hangin hawmkuang sungah khungin, mivengnak munah hawh haw hi.
33 Mi tampi ten a hawh haw cu mu in, Jesuh le a nungzuitute haw hi, tih a muh haw ten amu elah, khua hempoh pen mihingte cu a tai in, hung haw a, amuh sangin heng masa haw hi.
34 Jesuh in tuimawk a hen ten mi honpi a muh ten khaltu nei ngawl tuute bangin hehpih em hangin thu tampi hilh hi.
35 Taklam nitum kuan ten a nungzuitute cu Jesuh lakah hawh haw a, “Hilai mun hi ngamvengin, ni hei tum zo toh hi.
36 Mipite cu hi elkim a ummi khuate ah amu eihtukmi an leicawm tek tukin hilh leci pha tuk hi,” tin hilh haw hi.
37 Jesuh in, “Amuh tei eih tuk an cu nangmu piak kul tuk hi,” tin don hi. A nungzuitu ten ngun tangka za niha man an lei in, amuhte pia tuk ung maw?” tin ti haw hi.
38 Jesuh in, “Mah tale cangho i zong nei uh cim? hawhin zo hem un,” tin don hi. Hawhin, a zoh haw ten, “Cangho pa nga le ngasa pa nih um hi,” tin hilh haw hi.
39 Mahten Jesuh in mipite cu ahon ahonin, hamhing humah khungtik hi.
40 A venghawng haw in za khat hon um, sawm nga hon umin khung haw hi.
41 Mahceng ten Jesuh in cangho pa nga le ngasa pa nih cu la in, vanlam zoto in Pathian lakah lungdam san hi. Cangho cu neuno ten bothemin, sep tukin a nungzuitute san hi. Ngasa pa nih vang cu mi hempoh sem bok hi.
42 A venghawng haw in, kham-ukin, a eih celh haw ten,
43 a khambang haw cangho le ngasa cawmleh haw a, bawm sawm le bawm nih ting hi. 44 Hi an eitu cu pano calcang tiptep thawng nga kim haw hi.
Jesuh Tui Humah Hawh (Mt 14:22-33; Jn 6:15-21)
45 Thakhat thu in, a nungzuitute cu hawmkuang sungah manlang zetin khungtikin, tuipi ngalkhat Bethsaida khua lamah hawhhamtik a, mi honpi cu pintik hi.
46 Mi honpi tuah a khehdun celh haw ten thungen tukin mualhumah kaito hi.
47 Taklam nitum ceng diudeu ten Jesuh cu amah nguakcangin tuipi laizangah a hawmkuang cu um hi.
48 Huihpi in hawmkuang cu nunglamah mut kik hangin a nungzuitute cu cim zetin, a hawmkuang haw hotleh li in mu hi. Zing khuavak kuan nazi pa thum le nazi pa luk vengin, Jesuh cu a nungzuitu tei lakah hawh tukin tuipi humah a ke in amuh ma khelhin hawh hi.
49 Jesuh in, a nungzuitute cu ma khelh tukin um naven a nungzuitu ten tuipi hum a hawhlih cu mu haw hi. A muh haw ten thi-la heng bawlin, lauzet haw hi.
50 A venghawng haw in Jesuh cu mu haw hi. Jesuh in thakhat otpih paih hi. “Ngalpha zetin um un! Keimah ing hi. Lau pahsuh un,” tin don hi.
51 Mahten Jesuh cu amu lak a, hawmkuang sungah a kaitoh bek ten huihpi theu ngawlin meng hi. Amuh ten a lungmu sung hawah lamdangsazet haw hi.
52 Itahim titale a lungmu haw khoh leita hangin mi thawng nga an vakin, cangho a eihnak haw thute hei ngaisungleh thei haw ma toh hi.
Jesuh In Kenesaret Pen Tina Damtik (Mt 14:34-36)
53 Tuipi ngalkhat lam Kenesaret khua a hen haw ten a hawmkuang haw cu tui mawkah cawltik haw hi.
54 Hawmkuang sung pen a tul celh bek haw ten miten thakhatin thei paih haw hi.
55 Amu umnak khua mite cu tai kawkawi haw in, Jesuh i umnak a theih haw ten tina hempoh cu lang tuah zawngin, Jesuh lakah hawhpih haw hi.
56 Khuapi, khuano hampa lak tih um ngawlin natnak a neite hunpih khawng haw in, a puancep a zentik tuk pohcawmin kuun li haw hi. A puancep a tawngkha hempoh ten damnak ngah haw hi.