Jesuh In Mi Thawng Li An Vak (Mt 15:32-39)
1 Ngeican um ngawlin mi tampi khawmdun haw a, an eih tuk nei ngawlin a um laihtak haw in;
2 Jesuh in, a nungzuitute samin, “Hi mi honpi tei ca tukin ka ngaihsut ten hehpihzet ing. Itahim titale amuhte cu ka lakah ni thum um zo haw tohin, an eih tuk nei haw ma hi.
3 Ngialkialin ka pintik ahin, lam lakah tamsawl haw tuk hi. Mahbek sial ngawlin mi khenkhatte cu khawlapi pen hung haw hi,” tin hilh hi.
4 “Hitih bang ngamsung pen mihing hi zong tei an eih tuk ilai ah zei tuk hung him,” tin a nungzuitu ten dong haw hi.
5 Jesuh in, “Cangho i zong nei uh cim?” tin a dot ten a nungzuitu ten, “Cangho salih um hi,” tin don haw hi.
6 Mah hangin Jesuh in mi honpi cu lei humah khungtikin, a khun ceng haw ten, cangho salih cu la in Pathian lakah lungdam a sat ceng ten cangho cu bothemin, mi honpi sem tukin a nungzuitute san hi.
7 Ngasa vang demlaihno nei bok haw in, lungdam a sat ceng ten a nungzuitute sanin, mi honpi semtik hi.
8 Ei haw in, a kham ceng haw ten a khambang haw cawmleh haw a, bawm salih kim hi.
9 A eitu cu mi thawng li laih ting haw hi.
10 Jesuh in mipite cu pintikin amah cu a nungzuitute tuah hawmkuang sungah khungin, thawn bok haw a, Dalmanutha ngamah heng haw hi.
Nalamdang Bawltik Haw (Mt 12:38-42; 16:1-4)
11 Farasi khenkhat ten Jesuh sual zei nuamin, “Pathian tenmi na hih le hih ngawl vanhum pen nalamdang theihtupnak tukin lak le ci,” tin ti haw hi.
12 Hi thudotnak hangin Jesuh cu a lungmu sungno pen huisa li hi, “Ita hi khangmi ten nalamdang bawl tukin ngen haw him? Thungai in hilh ing; hi khang mitei ca tukin nalamdang lak tuk imah umma hi,” tin ti hi.
13 Jesuh in amuhte cu zamin, hawmkuangah khungin tuipi ngal lamah hawh hi.
Farasi le Herod i Naman (Mt 16:5-12)
14 A nungzuitu ten cangho ken tuk phawkngilin, hawmkuang sungah cangho pa khat bek nei haw hi.
15 Jesuh in, “Ngai un! Farasi le Herod tei naman ngallingzetta un,” tin hilh hi.
16 Nungzuitu ten, “Cangho nei ma si ung,” tin pa khat le pa khat son li haw hi.
17 Jesuh in, a thu son haw a zak ten, “Ita cangho neih ngawl thu thongpoh son li uh cim? Tu tian imah ngaisung thei ma laih uh cim maw? Thu ngaihsut theihnak tukin na lungmu uh haksa em laih thong uh cim maw?
18 Mit nei si uh ci, mu thei ma uh cim? Beng nei si uh ci, za ma uh cim maw? Mi thawng nga ca in,
19 Cangho lom nga tuah mi an ka vak khi phawk lehma toh uh cim? Na khambang uh bawm i zong cawm uh nge cim?” Nungzuitu ten, “Bawm sawm le bawm nih,” tin don haw hi.
20 “Cangho salih tuah mipi thawng li an ka vak ten na khambang uh bawm i zong cawm nge uh cim?” tin a dot ten, “amuh ten bawm salih cawm ung,” tin don haw hi.
21 Jesuh in, “Noh ten imah thei zo ma laih uh cim maw?” tin dong hi. Bethsaida Pen Mitcawpa Damtik
22 A nungten Bethsaida khua ah heng haw in, mitcawpa pa khat cu Jesuh lakah hunpih haw a, “Zen pohin,” tin kuun li haw hi.
23 Jesuh in mitcaw pa cu a khut pen lenin, dai pawleu lamah hawhpih hi. A mitah cilsiakin, a humah a khutsuan a, “Na muh theih um maw?” tin dong hi.
24 Mitcaw pa in, zoto in, “Mu thei ing, mihingte cu thingkung thawn li bangin mu ing,” ti hi.
25 Jesuh in, a khut cu mitcaw pa i humah nga lehin, van zoto lehtik hi. Mahbek ten a mit vak lehin, ihempoh cangcian zetin muleh thei hi.
26 Jesuh in, “Na innah pin den inna, khua sungah vak hihim pahsun,” tin hilh hi.
Peter In Khrih Thu Phuang (Mt 16:13-20; Lk 9:18-21)
27 Mahten Jesuh le a nungzuitute cu Sisaria ngam Filipi khua lamah a hawh laih haw in, lampi lak pen Jesuh in, “Kei hi akua tin ti haw him?” tin a nungzuitu tei lakah dong hi.
28 Mi khenkhat ten, “Tuiphumnak petu Johan hi,” ti haw hi; A khenkhat ten, “Elijah hi,” ti haw hi tin a nungzuitu ten hilh haw hi.
29 Jesuh in, a nungzuitute dong leleu in, “Nangmuh hihimin aw keimah hi akua ing kaw tih thei uh cim?” ti hi. Peter in, “Nang cu Khrih hi ci,” ti hi.
30 Jesuh in amah akua hum tihmi kua ma lakah hilh tuk ngawlin a nungzuitute nase zetin thupia hi.
Jesuh In A Thuak le Thihnak Tuk Son (Mt 16:21-28; Lk 9:22-27)
31 Jesuh in, a nungzuitu tei lakah zilh panin, “Mihing Capa in thuaknak tampi tawk tuk hi. Upate, thiampi upa le Daan zilh thiamtu ten lawl haw tuk hi. That haw tuk a, ni thum nungten tholeh tuk,” ti hi.
32 Mah thu cu amuh tei lakah celzet a hilh ten Peter in Jesuh samin, mawhsiat hi.
33 Mahnaven Jesuh in, a nungzuitute zo thahin Peter lakah, “Satan aw, ka nel pen tai in,” tin a elkim zo kawkawi in Peter cu liat hi. “Na ngaihsutnakte Pathian lak pen a hungmi hi ma hi. Mihing ngaihsutnak bek hi,” tin Peter cu liat hi.
34 Jesuh in mi honpi le a nungzuitute samin, “Mihing pa khat pawpohin ka nung a zui nuam tale, ama deihnak zamsanin, ama haksatnak thinglamteh pua in zui hen.
35 Itahim titale a nunnak a pan suak nuam ten a hawvang nunnak bo tuk hi. Mahnaven Keima thu hangin le lungdamnak Thuthangpha i hangin a nunnak a botiktu cu nunpatnak ngah tuk hi.
36 Itahim titale mi pa khatin vanhaang nuai leihum hempoh a nei vangin, a hawvang nunnak a paitik tale nemcuamnak imah um tukma hi.
37 A hawvang nunnak cu imah tuah leileh thei tukma hi.
38 Sualnak tuah a dimmi, hi khang mitei lak pen keima thuzilhnak hei hihen a zahcakpihtu cu Mihing Capa in, a pa i minthannak le a mi thiangtho vancungmite tuah a tolhleh ni ten zahcakpihleh bok tuk hi