1 Jesuh in, thungai in hilh ing, “Hilai a ding khenkhat ten Vancung Uknak hu le thawm tuah a hen laklawh thi haw tukma hi,” ti hi.
Jesuh Meltheknak (Mt 17:1-13; Lk 9:28-36)
2 Tu nung ni luk lawi ten Jesuh in, Peter, James le Johan cu mual sangpi humah kaitohpihin, amuh bek a um haw ten Jesuh cu a melthek hi.
3 A puansilhte cu iti bang mihing hei i thiantik zawh tuk ngawl tianin, khap susulin de mahtak hi.
4 Mahten Elijah le Moses vang Jesuh tuah thuson ngel li in mu haw hi.
5 Peter in, Jesuh lakah, “Sazapa hilai mun hi eimu umnak tuk awh em hi. Nangma ca tukin buk pa khat, Moses i tukin buk pa khat, Elijah i tukin buk pa khat tin buk pa thum sa tuk hung,” ti hi.
6 Ita hi tih bangin ti haw him titale lau leita in ottuk imah a theih haw ngawl hangin hi.
7 Mahlai takin meingo nimpi in uap paihin, “Hi pa hi ka ihbel, ka Capa hi, a thu na ngaita un,” tin meingo sung pen aw ngingtul hi.
8 Mahceng bek ten a elkim zo kawkawi haw naven, Jesuh sial ngawl kuamah mu haw ma hi.
9 Mualhum pen a tolhsukleh haw ten Jesuh in, “Mihing Capa cu a thihnak pen a thawhleh laklawh hi na muh uhmi kuamah i lakah son pahsuh un,” tin nase zetin kham hi.
10 Amuh ten Jesuh i hi thuhilhte a thin sungah komzetno in vong leng haw hi. “Thihnak pen tholeh,” tihmi hi a sullam ituk nemtim, tin pa khat le pa khat dongdun li haw hi.
11 Mah hangin amuh ten, “Elijah hung masa tuk hi, tin ita Daan zilhtu ten son haw him?” tin dong haw hi.
12 Jesuh in, “Elijah hung masa ngangai tuk a, na hempoh bawlham khawng tuk hi. ‘Mihing Capa hei in nuncimnak le thakemnak tampi thuak tuk hi,’ tin Lai Thiangtho sungah nganin um zo toh hi.
13 Thu ngangai in hilh ing, Elijah cu hung masa zo toh hi. Lai Thiangtho sung a, ngatsa bangin mihing ten ama humah a bawl nuam haw zahin bawl zo haw toh hi,” tin hilh hi.
Khawhuai i Zelhmi Naupang Damtik (Mt 17:14-21; Lk 9:37-43)
14 Jesuh cu a nungzuitu tei umnak a henkikleh ten mi honpi in amuh umcihin, Daan zilhtute tuah thu nialdun li in um haw hi.
15 Mipi in Jesuh amuh haw ten lamdangsa in, a muak tuk zuan susuih haw hi.
16 Jesuh in, “Amuh tuah i thu son li uh cim?” tin a nungzuitu tei lakah dong hi.
17 Mi honpi sung pen mipa pa khatin, “Sazapa, ka capa i sungah khawhuai umin, a ot theih ngawl hangin nangma lakah hunpih ing.
18 Ka capa cu khawhuai i zelh nungsang a pumpi leisehnakin le a kam pen cilphuan kai in, a ha ngawi a, khik thongin bawl hi. Na nungzuitu tei lakah khawhuai hawlvawk saktik naveng hawlvawk thei haw ma hi,” tin hilh hi.
19 Jesuh in, “Upnak nei ngawlte,” tin a nungzuitute liat hi. “I tuk tian nangmuh tuah um kawm tuk laih ing kaw? Nohte tuah i can thuak tuk laih ing kaw? Naupang pa cu ka lakah hunpih un!”
20 Jesuh i lakah naupangpa cu hawhpih haw hi. A ngei ngawlin khawhuai in Jesuh amuh bek ten naupangpa cu caihtikin, cilphuan kai in le a pumpi leisehnakin mang hi.
21 Jesuh in, “Hitih bang a nat sawng ngei toh maw,” tin dong hi. A pa in, “A neulaih pen pan awng toh hi.
22 Khawhuai in ka capa cu susia nuamin, mei sung le tui sungah hei hihen sualin, khal li hi. Na bawl thei ol tale hehpihnakin bawl zazal pohin,” tin ngen li hi.
23 Jesuh in, “Na bawl thei tale ti ci mei! A umtu tei ca tukin na hempoh ahi thei ngawl umma hi,” tin don hi.
24 A pa in, “Um ing, mahnaven ka upnakin, a tinzawh ngawl hangin bawmin,” tin thakhatin au in ngen hi.
25 Mi honpi ten a zot susuih haw cu Jesuh in amuh ten, “Awn thei ngawl bengbul khawhuai, ama sung pen tulvutin hi. Tu nungten ama sung hihimah tumleh toh pahsun, tin thupia ing,” tin liat hi.
26 Khawhuai in naupang pa cu a pumpi hing dedelin, a bawl celh ten ham au in tul hi. Naupang pa cu khawhuai tul celh ten a thisa bangin a um tak cu mi tampi ten, “Thi zo hi,” tin ti haw hi.
27 Mahnaven Jesuh in naupang pa cu a khut pen lenin, a phot ten dingto hi.
28 Jesuh cu inn sungah a hawh tum celh ten a nungzuitu ten, “Ita kohten khawhuai hawlvawk zo ngawl ung kaw,” tin dong haw hi.
29 Jesuh in, “Hitih bang natnak cu thungenin, an cannak tuah bekin hawlvawk thei hi,” tin don hi.
Jesuh In A Thihnak Tuk Son Leh (Mt 17:22-23; Lk 9:43-45)
30 Jesuh le a nungzuitute cu a umnak haw pen thawnin, Galilee ngam lam tawnin hawh haw hi.
Jesuh in miten ama umnak a theih khak haw tuk cu awi hihim ma hi.
31 Itahim titale, “Mihing Capa cu mitei khut sungah pia in, that haw tuk laih hi. Mahnaven ni thum nungten amah cu tholeh tuk hi,” tin, a nungzuitute hilh hi.
32 A nungzuitu ten a thuhilhte cu thei haw ma naven a sullam a dotleh haw tuk vang ngam haw ma hi.
A Kua Ngengbel Kaw? (Mt 18:1-5; Lk 9:46-48)
33 Kapernaum khua ah heng haw ten Jesuh cu inn sungah hawh tumin, “Lampi lakah ithu dondun li uh cim?” tin a nungzuitute dong hi.
34 Mahnaven mengdenin um haw, itahim titale amuh ten eimu lak pen akua ngengbel ung kaw? tin lampi pen a eldun lih haw hangin hi.
35 Jesuh cu khungin, a nungzuitu sawm le pa nihte samin, “Mi pa khat pawpohin, a masabel a nuam tale, a nungdawlbel suakin, mi hempoh tei sila a suah masak kul tuk hi,”
kul tuk hi,” tin hilh hi.
36 Jesuh in naupangno pa khat sam a, amu laizangah khungtikin, a angah cawi hi.
37 “Keima min hangin hitih bang naupangnote a cosang hempoh ten keimah vang cosang hi bok haw tuk hi. Keimah cosang hempoh ten keimah a tiiktu pa vang cosang haw tuk,” ti hi.
Eimu Lamtangte Eimu Mihing Hi (Lk 9:49-50)
38 Johan in, “Sazapa, nangma min suangin, khawhuai a hawlvawk theitu mu nave ung, nangmah zui ngawl mihing a hih tak cu kham ung,” tin hilh hi.
39 Jesuh in, “Kham pahsuh un,” tin ti hi. Itahim titale keima min suangin, nalamdang a bawl theitu ten keimah son sia haw tukma hi.
40 Eimu lam tangte cu eimu mihingte haw hi. 41 Itahim titale keima mi na hih uh hangin tui keu khat a piatu hempohin laksawng ngah ngawlin um hihim haw tukma hi.
Sualsohnak Thu (Mt 18:6-9; Lk 17:1-2)
42 Jesuh in kua hei hihen, hi tibang naupangno i upnak lampialtiktu a um tale, a ngawngah cangngawinak suang ngengpi khihin, tuipi sungah khesuk ahin a ca in pha saw tuk hi.
43 Na khutin sualnak a bawl tale sattan saw hi. Khut pa nih tuah a mit awng ngawl hellmeipi sungah na tum sangin khut khat bulin nunnak ngam sungah na tum ahin pha saw hi.
44 “Amuh eitu thanlung cu thi awng ngawlin, amuh kangtu mei vang cu mit awng tukma hi,”
45 Na ke in nangmah bahin, a tutik tale sattan in hi. Itahim titale na ke himno in hell sungah na thuak sangin ke him ngawlin nunnak sungah na heng ahin pha saw tuk hi.
46 “Mah mun pen amah eitu thanlung cu thi awng ngawlin amah kangtu mei vang mit awng tukma hi,”
47 Na mitin nang a sualtik tale pholhletin hi. Mit nih nei in hell sungah na tum sangin, mit khat bek nei in Pathian Uknak sungah na tum ahin pha saw tuk hi.
48 A umnak hell sungah a hawvang haw cu a thih ni um ngawlin le mei alh vang a mit ni um tukma hi.
49 Itahim titale mi hempohin biakpiaknak zehsa cu ci tuah thianthohtik a hih bangin thianthohtik khawng hi haw tuk hi.
50 “Ci cu a phabel hi. Mahnaven ci in, a alnak a paitik ahin, a alleh theihnak tukin ite mang tuk uh cim? Mahtibang hangin nangmu sungah ngualcam dunnak nei tekin, pa khat le pa khat a lemno in umta un,” tin hilh hi.