MATTHAW 7
Midang Tei Thukhennak (Lk 6:37-38, 41-42)
1 “Pathian i sonsiatmi na hih ngawlnak tukin mi sonsia pahsun hi.
2 Itahim titale mi na sonsiat bangin nangmah vang Pathian in sonsia bok tuk a, midang tei humah na bawl bangbokin Pathian in, na humah bawlbok tuk hi.
3 Na mit sung a ummi thingkhal ngengpi hei kinmawh ngawlin na unau pa i mitsung a buak neuno khi ita mu li cim?
4 Nangma mit sungah buak ngengpi um leng napi in, itakaw na unau pa i lakah na mitcang kheksak nang na tih ngam?
5 Mi ultung pa! Nangma mitsung a buak ngengpi cu khek masa inna, mahceng ten na unau pa i mitsung a mitcang cu celzetno mu in, kheksak thei tuk ci.
6 “A thiangthomi nate uico pia pahsuh un: hekkikin nangmuh lehlam pet kha tuk hi. Na suang manpha uhte vokpi mai ah koih pahsuh un; a ke tuah sikpek thong tuk hi.
Ngen Un, Zei Unna, Kiu Un (Lk 11:9-13)
7 “Ngen unna, ngah tuk uh ci; zei unna mu tuk uh ci; kiu unna hon tuk hi.
8 Itahim titale a ngentu hempoh ten ngahin, a zeitu hempoh ten mu haw tuk hi. A kiutu hempoh tei ca in kongka cu honsak hi tuk hi.
9 Na ca uhten cangho a ngen haw tale, noh a pa ten suang pia a ni uh ci maw? 10 Ngasa a ngen haw ahin ngul pia ni uh cim?
11 Mipha ngawlzet hi nave uhcin na ca tei ca in, a pha mi thil pia thei na hi uh tale vancung na Pa uhin, a ngentu tei humah itin kaw thil a phapha pia ngawlin a um tuk?
12 “Miten nangmu humah bawl haw hen, tin na deih uh bangin midang tei humah bawlbok un hi. Hihi cu Moses Daan le profet tei thuzilhnak in, a zilhnuam belmi hi. Kongka Cawngcik (Lk 13:24)
13 “Kongka cawngcik tawnin hawh un, itahim titale hell hawhnak kongka cu zalin, a lampi vang hawhbaih a hih hangin a hawhtu vang tam haw hi.
14 Mahnaven nunnak sung a, hawhnak kongka cu cawngcikin, a hawhnak lampi vang a haksa hangin a heng suaktu vang demno hi. Thingkung le A Ngah (Lk 6:43-44)
15 “Profet manngawlte na ngalling un: a pualam haw cu tuu bangin um haw naven a sunglam haw cu cingne hangsan bang haw hi.
16 Iti bang mihing haw him tih cu a bawlnak haw pen thei tuk uh ci. Ling kung pen sabit ngah awng ma hi: lenling kung pen thei min thawi awng haw ma hi.
17 A tidammi thingkung ten ngah pha ngah haw a, thingkung ngi na ngawl ten ngah sia ngah thei haw hi.
18 A tidammi thingkungin ngah sia ngah thei ma hi, thingkung ngi na ngawlin ngah pha ngah thei bokma hi.
19 Ngah pha a ngah ngawlmi thingkung cu phukin, mei sungah haal mek haw hi.
20 Mahti bang bokin profet manngawlte cu a deh bawlnak haw pen thei tuk uh ci.
Nohte Thei Awng Mang (Lk 13:25-27)
21 ‘Topa, Topa,’ tin a sam litu hempoh ten vancung Uknak sungah heng khawng haw tukma hi. Vancung a um ka Pa i deihnak a bawltute bekin heng haw tuk hi.
22 Thukhennak ni a hen ten mi tampi in, ‘Topa, Topa! Nangma minin Pathian thu hilh ung a, na minin khawhuai tampi hawlvawkin, nalamdang tampi bawl ung!’ tin ti susuih haw tuk hi.
23 Mahten kei in, ‘Nohte thei awng mang! Ka nel pen tai un, noh mipha ngawlte!’ tin ti tung hi.
Inn Satu Pa Nih (Lk 6:47-49)
24 “Mah hangin hi ka otmi zain, a zuitu cu suangpi hum a, inn satu micip pa bang hi.
25 Nguah tamzet a zuk hangin tuilunin le huihpi nasezet theu naven suangpi humah sakmi inn a hih hangin cim ma hi.
26 “Mahnaven hi ka otmi za leng na pi in, a mang ngawltu cu philnel hum a, inn satu misil pa bang hi.
27 Nguah nasezet a zuk hangin tuilunin le huihpi nasezet a theu ten tu in, cim khawng,” tin ti hi. Jesuh i Thuneihnak
28 Jesuh in hi thu hempoh a son ceng ten, mipi ten a thusondan lamdangsa mahtak haw hi.
29 Amah in Daan zilhtute bang zilh ngawlin, thunei zetin zilh hi.
To listen this verse in audio in Ngawn...