Nungzuitu Sawm le Pa Nih (Mk 3:13-19; Lk 6:12-16)
1 Jesuh in nungzuitu sawm le pa nihte cu munkhatah samin, hawvang siasuak hawlvawk theihnak le natnak a phunkim damtik theihnak huham pia hi.
2 Nungzui sawm le pa nih tei minte cu: pa khatnakin; Simon (Peter tihmi) le a nau Andru, Zebedi capa James le a nau Johan;
3 Filip le Bartholomew; Thomas le siahkhontu Matthai; Alfias capa James le Thaddaeus;
4 Phun le nam tangtu Simon le Jesuh zuaktu Judah Iskariot hi haw hi.
Tiikmi Sawm le Pa Nih Thucah (Mk 6:7-13; Lk 9:1-6)
5 Hi sawm le pa nihte hi tiikin, pha zetin thucah hi. “Gentail ngam le Samaria ngam tei khua ah tum pahsuh un.
6 Mah sangin a paimi tuu hon Israel tei lakah hawh un hi.
7 Hawh unna, ‘Vancung Uknak nai zo!’ tin hilh un.
8 Tinate damtik un, mithite nunglehtik un, phaaknat a nei mite damtik unna, khawhuaite hawlvawk un hi. Man nei ngawlin na ngah uhmi cu man ngawlin pia bok un.
9 Na tawngphu sung uhah sui tangka hihen, ngun tangka hihen, daal tangka hihen, pua pahsuh un.
10 Khualzinnakah an ngenin, a puaknak tuk dip hihen, angki a val hihen, kedam le thiangkhut hihen, keng pahsuh un. Na dektu cu a kulmi hempoh piak khawng hi tuk hi.
11 “Khuapi le khua neu ah hei hihen na hen uhten lungdamno in tum unna, a phalmi tei innah zintungin, na hawhleh laklawh uh tian mahlai ah caam un hi.
12 Inn sungah na tum uhten, ‘Nohtei lakah lemdaihnak um tahen,’ tin ti un.
13 Mah innkua ten zintunnak a hon haw tale lemdaihnak muicu pia unna, zintunnak a hon haw ma tale, mah muicu cu nangmu lakah kikleh hen hi.
14 Inn pa kha khatin hihen, khua pa kha khatin hihen, tun inn hon ngawlin na thu uh vang a ngai nuam haw ma tale mahlai mun cu zamsan unna, na ke uh a, leivul thiingta in zam un hi.
15 Thungai in hilh ing. Thukhen Ni ten Pathian in mah khuate sangin Sodom le Gomorah khua tei humah hehpihnak tam deuh nei tuk hi,” tin hilh hi.
A Heng Tukmi Bawlsiatnak (Mk 13:9-13; Lk 21:12-17)
16 “Ngai un! Cingne hang hon lakah tuu bangin nohte hah ing. Mah hangin ngul bangin cip unna, khulo bangin nunnem un.
17 Ngalling un; itahim titale nangmuhte a mantu tukin mite tul haw tuk hi; zungah hawhpih haw tuk a, pumkhawminnte pen vat haw tuk hi.
18 Keima hangin uktu le kumpipa tei mai ah henpih haw tuk a, amuh le Gentail mitei lakah ka thu phuan theihnak hun pha nei tuk uh ci.
19 Thukhennak munah a henpih haw ten i heng ka hilh tuk tih le itin kaw ka don tuk tin thinkham pahsuh un. A hun a kim ten na son tuk uh cu theihtik hi tuk uh ci.
20 Itahim titale na ot tuk uh cu nohtei ot hi tukma hi; nangmu sung pen na pa uh i Hawvang Thiangtho in ot sak tuk hi.
21 “Mihing ten mai unau lala that tukin midang tei khutah hengtik haw tuk hi. Pate hei in, ca tei humah mahtih bang bokin bawl haw tuk hi. Cate vangin a pa haw khi midang tei khutah hen haw tuk hi.
22 Keima hangin mi hempoh ten hua haw tuk hi. Mahnaven a dawltawpnak tianin, a nang zo ten nunpatnak ngah haw tuk hi.
23 Khua pa khatah a bawlsia haw tale khua dangah tai un. Thungai in hilh ing. Mihing Capa i hen laih ngawlin Israel ngamsung khua hempoh a na nadeh uh cengman tukma uh ci.
24 “A zilhtu sangin a thiam saw tawngta naupang kua mah umma hi. A bawipa sangin a ngeng saw mi sila kua mah umma hi.
25 Mah hangin tawngta pa khat cu a zilhtu pa tuah a bangve haw ahin, a lungkim tukmi hi poh hi, sila pa vang a bawipa a bangbok tale, a lungkim bok tuk poh hi. Innkua a lupibel cu khawhuai bawi Beelzabul tin sammi ahi tale innkua sung um midangte cu mah sangin minsia saw deuhin sam hi haw tuk hi.
A Kua Kaw Lau Tuk (Lk 12:2-7)
26 “Mah hangin mihing lau pahsuh un, atu a sel hempoh cu hon khawng hi tuk a, thu-ip hempoh cu phuan hileh khawng tuk hi.
27 Khuathim lak a, ka sonmi hi sun khuavak ten hilhleh unna, a kuhno in, na theih uhmi cu hi inn hum pen phuang un hi.
28 Taksa pumpi that thei in, hawvang a that thei ngawltu cu lau pahsuh un. Taksa pumpi le hawvang a pa nihin hell sungah a that theitu Pathian lau saw un hi.
29 Pia khatin, kawllit pa nih lei theih si maw? Mahnaven mah kawllit pa khatno hei na pa uh i thu ngawlin leihumah caak ma hi.
30 Nohte sesem cu na samzang uh hei sial khawng hi.
31 Mah hangin lau pahsuh un. Kawllit tampi sangin manpha saw uh ci. Khrih
Lamtannak le Nialnak (Lk 12:8-9)
32 “Mi pa khatin mipi mai ah kata a hihnak a phuangtul ngam tale vancung i ka Pa i mai pen amah cu tanpihleh bok tung hi.
33 Mahnaven mipi tei mai pen kei a ngialtu cu vancung a, ka Pai ma i pen nialleh bok tung hi.
Lemnak Hi Ngawl Namsau Saw (Lk 12:51-53; 14:26-27)
34 “Leihumah lemnak hengtik tukin hung hi, tin ngaisung pahsuh un hi. Lemdaihnak bawl tukin hung mang, namsau kengin hung ing.
35 Pa le capa, nu le canu, mo le a teknute ngalduntik tukin hung ing. 36 Mi pa khat i ngal lauhuaibel cu ama innkua sungmi hi tuk hi.
37 Kua hei hihen, keimah sangin a nu le pa a it saw tu cu ka nungzuitu tukin tak ma hi. Keimah sangin a canu hihen, a capa hihen, a it saw tu cu ka nungzuitu tukin tak ma hi.
38 Kua hei hihen ama thinglamteh pua in, ka nung a zui ngawltu cu ka mihing hi tukin tak ma hi.
39 Ama nunnak hup a tumtu cu a nunnak sung tuk hi, mahnaven keima hangin a nunnak a piatu cu nunnak hup ngah tuk hi.
Laksawng (Mk 9:41)
40 “Nangmuh zintungtiktu cu keimah zin a tungtiktu hi bok hi, keimah zin a tungtiktu cu keimah hahtu pa zin tungtik tuah bangve hi.
41 Pathian thuzilhtu zintungtiktu cu Pathian thu puatu zin a tuntik hangin a thuzilh man laksawng co bok tuk hi. Mipha pa khat cu mipha a hihnak hangin zintungtiktu cu mah mipha pa i laksawng co bok tuk hi.
42 Thungai in hilh ing. Ka nungzuitu lak pen a nautabelno poh cawm i intuk tui khuat khat a piatu cu laksawng ngah loli tuk hi,” tin hilh hi.
To listen this verse in audio in Ngawn...