To listen that verse in audio click to Ngawn..
Tuiphum Johan Thihnak (Mk 6:14-29; Lk 9:7-9)
1 Mah hunin, Galilee ngamuktu Herod in Jesuh i thu le la cu za hi.
2 Herod in, “Hi pa hi tuiphum Johan a nunglehmi hi. Mah hangin hi, hitih bang nalamdang a bawl theih,” tin, a khutnuai a bawite cu hilh hi.
3 Mah laihngawlin Herod in Johan matnak tuk thupia in, a thupiaknak bangin man haw a, thikkhau a khih celh haw ten thawngah khia haw hi. Ita mahtin bawl him titale a naupa Filip i zi Herodias i hangin hi.
4 Tuiphumnak piatu Johan in Herod cu, “Herodias hi na huai tukmi hi ma hi,” tin, a tihmek hangin hi.
5 Herod in Johan cu that nuam naven Judah mite lau hi. Itahim titale Johan cu profet hi tin ngaisung haw hi.
6 Herod hincam ni-in Herodias i canu cu lam hi. Herod cu lungkim ngangai in, a lakah,
7 “Na ngetmi pawpoh pia tung,” ti hi.
8 A nu i ngaihsutnak a piak bangin Herod lakah, “Hilai loli ah tuiphum Johan i lu daalkuang pa khat humah pia in,” tin ti hi.
9 Kumpipa cu a thasia ngangai hi. Mahnaven a sammi mipi tei mai loli ah thutiamnak a bawl zo hangin a ngetnak bangin bawl tukin thupia hi.
10 Mah hangin Johan cu thawng sung loli pen a lu tantik hi.
11 Johan i lu cu daalkuang humah cawi haw a, Herodias i canu cu pia haw hi; amah in, a nu Herodias i lakah hawhpih hi.
12 Johan i nungzuite cu hungin, a luang cu la in vui haw hi; mahnung ten Jesuh cu hilh haw hi.
Mi Thawng Nga An Vak (Mk 6:30-44; Lk 9:10-17; Jn 6:1-14)
13 Jesuh cu Johan i thu a zak ten tulin, hawmkuang sungah khungin mivengnak munah amah bek hawh hi. Mah thu cu mipi ten a zak haw ten amu khua tek pen tul khawmin amah cu zui haw hi.
14 Jesuh cu hawmkuang sung pen tulin mipite amuh ten a lungmu sungah hehpihnak tuah dimin, mahlai ah tina tampi damtik hi.
15 Mah ni taklam ten a nungzuitute cu a lakah hung haw in, “Khuanu zo si, hilai mun hi ngamveng a hih hangin, mipite pintik inna, elkim khuate ah hawhin amu ca in an ei haw hen,” tin ti haw hi.
16 Jesuh in, “A hawh haw kul tukma poh hi; nangmuh ten a eih haw tuk i pawpoh pia un,” ti hi.
17 “Hilai ah a neih uhmi cu cangho pa nga le ngasa pa nih bek hi,” tin ti haw hi.
18 Jesuh in, “Hilai ah hunpih hem un,” ti hi.
19 Mipite cu hampa humah khung tukin thupia in, cangho pa nga le ngasa pa nih cu a lak celh ten vanlam zo in, Pathian nelah lungdamnak thu hilh hi. Cangho cu bothemin, nungzuitu tei lakah pia in; nungzuitu ten mipi sem haw hi.
20 Mi hempoh ten ei in, kham uk haw hi. Mahceng ten a eih kham bang haw cu nungzuitu ten khawmleh haw a, kho sawm le kho nih dim hi. 21 An a eitute cu numei le naupangte sial khak ngawlin pasal tiptep thawng nga haw hi.
Jesuh Tui Humah Hawh (Mk 6:45-52; Jn 6:15-21)
22 Jesuh in mipite cu pintikin, a nungzuitute cu hawmkuang sungah tumtik a, tuinim ngalkhat lamah hawh hamtik hi.
23 Mipite a pintik nungten amah nguakcang thungen tukin mualhumah kai hi. Khuanu em toh naven mahlai ah Jesuh cu amah nguakcangin um hi.
24 Hawmkuang cu tuipi mawk pen khawla thimah heng zo in huih pi theu in hawmkuang cu sak le hangah mutvawk kawkawi hi.
25 Zinglam nazi pa thum le pa luk laklawh sungin, Jesuh cu tui humah hawhin, a nungzuitu tei lam zuanin hung li hi.
26 A nungzuitu ten tui humah a hawh limi amuh haw ten lau mahtak haw hi, “Thi-la si?” tin ti in, lau in au tutui haw hi.
27 Jesuh in, “Lau pahsuh un! Keimah ing hi! Imah lau tuk umma,” ti hi.
28 Mahten Peter in, “Topa, nangmah na hi ngangai tale na lakah tui hum pen ke in hawhtik bokin,” ti hi.
29 Jesuh in, “Hung vele,” ti hi. Peter cu hawmkuang sung pen tulin tui hum pen ke in Jesuh lakah hawh hi.
30 Mahnaven huihtheu nasezet amuh ten lau in, tui sungah nim dedeuh hi. Mah hangin “Topa aw, kei panin hi,” tin au hi.
31 Jesuh in, a khutsan paihin, a mat ngah ceng ten, “Na upnak neu leita hi. Ita hiti bang lawlawmin upnak nei ma nge cim?” tin ti hi.
32 A pa nih haw in hawmkuang sungah tum haw a, huih cu dai hi.
33 “Nang cu Pathian Capa ngangai ci,” ti in bia haw hi.
Genesaret Ah Midamtik (Mk 6:53-56)
34 Tuinim cu kaltan vawkin Genesaret ngamah heng haw hi.
35 Mahlai a mihingte hei in Jesuh cu thei haw hi. Mah hangin elkimah a ummi tina hempoh samkhawm haw in, Jesuh lakah hunpih haw hi.
36 Damngawl ten a puancepno pohcawm zen theihnak tukin ngen haw bangin a puan lek zentu hempoh cu dam khawng haw hi.