To listen that verse in audio click to Ngawn..
Nalamdang Bawltik Haw (Mk 8:11-13; Lk 12:54-56)
1 Sadusi le Farasi khenkhat ten cu Jesuh lakah a sual zei nuamin hung haw a, “Pathian i umpihmi na hi tale nalamdang bawltehin,” tin ti haw hi.
2 Jesuh in, “Nitum ten van a san tale khua pha tuk tin ti uh ci.
3 Zingtungno in vanmawk sanin mei a nim tale nguahzu tuk,’ hi tin ti uh ci. Van zo in, khua pha tuk le khua sia tuk thei uh ci, mahnaven mahmi hun melciknak cu thei sisih ma uh ci.
4 Tuhun a mihingte hi mipha ngawl le Pathian a simsial ngawlte hi uh ci. Nalamdang bawltik uh ci, mahnaven bawl tuk mang. Noh tei ca nalamdang cu Jonah i nalamdang bek hi tuk,” ti hi. Mahtin tita zamin tul hi.
Farasi le Sadusi Tei Naman (Mk 8:14-21)
5 Nungzuite cu tuinim tanvawkin, a ngalkhat lamah a hen haw ten cangho cawi tuk phawkngil haw hi.
6 Jesuh in amuh tei lakah, “Farasi le Sadusi mitei naman khi komzetno in ngalling un,” ti hi.
7 “Cangho a cawi uh ngawl hangin mahtin ti hi tuk,” tin pa khat le pa khat tidun li haw hi.
8 Mahti bangin, a son leilui lih haw cu Jesuh in, a zak ten, “Cangho na neih uh ngawl thu cu ita sonnuam li uh cim! Na upnak uh dawm leita hi.
9 Theithei ma laih uh cim? Mihing thawng nga vaknak cangho pa nga ka botthem khi thei ma toh uh cim? A khambang haw kho i zong cawmleh tih phawk lehma toh uh cim?
10 Mi thawng li ca in cangho salih khi thei laih uh cim? A khambang haw bawm izongta kaw na copleh uh khi?
11 Nangmuh tei lakah ka sonmi hi cangho thu hi kha ma tih cu ita thei zo ma uh cim? Farasi le Sadusi tei naman hi ngalling un,” ti hi.
12 Mahten nungzuitu ten ngalling un a tihmi hi cangho lakah sawhmi naman hi kha ngawlin Farasi le Sadusi tei zilhnak naman hi saw tih cu theitumleh haw hi.
Peter i Jesuh Thu A Phuannak (Mk 8:27-30; Lk 9:18-21)
13 Jesuh cu Sisaria Filipi khuapi elah hawhin, mahlai ah a nungzuitute cu “Miten Mihing Capa hi akua tin ti haw kaw?” tin dong hi.
14 Amuh ten, “Mi khenkhat ten tuiphum Johan tin ti haw, mi khenkhat ten Elijah hi tin ti haw hi. A khenkhat ten Jeremiah ahimata profet pa kha khat hi tuk tin ti haw ven,” tin don haw hi.
15 Jesuh in, “Nangmuh ten aw, kei hi akua tuk ti nge uh cim?” tin dong hi.
16 Simon Peter in, “Nang cu a nungmi Pathian Capa Khrih hi ci,” ti hi.
17 Jesuh in, “Bar Jonah i capa Simon mi bawngpha hi ci: Itahim titale hi thuman hi mihing lak pen na ngahmi hi ngawlin vancung a um ka Pa i theihtikmi hi.
18 Hilh ing hi Peter, nang cu suang hi ci; hi suangpi humah ka Pawlpi din tung a, thihnak hei in neh tukma hi.
19 Vancung Uknak tawhcangte pia tung a, leihum pen na khammi cu vancungah kham hi bok tuk a, leihum pen na honmi cu vancung pen hon hi bok tuk,” ti hi.
20 Jesuh in, a nungzuitu tei lakah Khrih a hihnak kua mah hilh tuk ngawlin thupia hi.
Jesuh In A Thih Tuk Thuhilh (Mk 8:31, 9:1; Lk 9:22-27)
21 Mah ni pepan Jesuh in, a nungzuitu tei lakah, “Jerusalem ah hawh tung a, Judah thuneitu, thiampi upa le Daan zilhtu tei khutah haksatnak tawk tung hi, keimah cu that haw tuk naven ni thum nungten tholeh tung hi,” tin ciang zetin hilh hi.
22 Peter in Jesuh cu mundang deuhah pui in mawhsiat hi. “Topa Pathian in awi zazal ma hen. Hitih bang cu na humah heng zazal ma hen,” ti hi.
23 Jesuh in heklehin Peter lakah, “Satan pa ka nel pen tai in! Ka hawhnak lampi khaktu ci, itahim titale hitih bang na ngaihsutnak hi Pathian lak pen a hengmi hi ma hi, mihing lak pen a hengmi hi,” ti hi.
24 Jesuh in, a nungzuitu tei lakah, “Kua hei hihen keimah a zui nuamtu cu ama deihnak zamin, ama haksatnak thinglamteh pua in zui hen.
25 Itahim titale kua hei hihen ama nunnak a panduncop nuamtu cu a nunnak sung tuk hi; mahnaven keimah hangin a nunnak a botu cu a nunnak pan ngahtute haw hi.
26 Mi pa khatin leihum buppi a co hei in, a nunnak a sung tale i nemcuamnak um kaw? Imah nemcuam ma hi! A nunnak cu imah in leileh thei tukma hi.
27 Mihing Capa cu a Pa i sunloihnak le vancungmite tuah hungleh pal tuk a, mi hempoh cu amu nadehnak bangin dehman pia tuk hi.
28 Thungai in hilh ing. Mihing Capa hi Kumpi bangin a hunleh laklawh nangmu sungah a thi tuk ngawlmi um uh ci,” ti hi.