To listen that verse in audio click to Ngawn..
A Kua Kaw Thawmngengbel (Mk 9:33-37; Lk 9:46-48)
1 Mah hunin nungzuitute cu Jesuh lakah hawhin, “Vancung Uknakah akua kaw ngengbel tuk?” tin dong haw hi.
2 Jesuh in naupangno pa khat samin, amu laizangah a dintik ceng ten,
3 “Thungai in hilh ing. Na lungmu uh thekin, naupangno na bang uhma tale Vancung Uknak sungah tum tukma uh ci.
4 Vancung Uknakah a ngengbel cu mi nuai ah a umtu hi naupang bangin lungmu a neitute hi.
5 Mahten keima minin hi naupangno a bawl phatu cu keimah a bawl phatu ti hi.
Sualsohnak (Mk 9:42-48; Lk 17:1-2)
6 Kua hei hihen hi naupangno hi pa kha khatin, keimah a upnak pen a pialtiktu cu a ngawngah cang ngawinak suangtum khaihin, tuipi sungah khia ahin ama ca in pha saw hi.
7 Leihumah hinmi tei upnak a pialtik thei thil tampi a um hi poi ngangai hi. Mahti bangin um leleng tuk laih hi, mah bangin a pialtiktu cu thusia co haw tuk hi.
8 “Na khut uhin hihen, na ke uh hei in hihen na upnak uh a pialtik tale talhin vawk un hi. Khut pa nih le ke pa nih tuah kumkhua meipi sungah na cak tuk sangin khut le ke ngawlin nunnak sungah na tum uh cu pha saw hi.
9 Mahten na mit uhin, na upnak uh a pialtik tale khek let un hi. Mit pa nih tuah hell sungah na cak tuk uh sangin mit pa khat tuah nunnak sungah tum cu pha saw hi.
A Paimi Tuu Tehkipnak (Lk 15:3-7)
10 “Hitih bang naupangnote na zawnsak ngawlnak tukin ngalling un hi. Thungai in hilh ing. Amuhte cingkhawitu vancungmite cu vancung ka Pa i mai ah um leleng haw hi.
11 Mihing Capa cu a paimi zei tukin hung hi.
12 “Tuu za khat neitu pa in, pa khat a paitik tale i bawl tuk tin ngaisung uh cim? Mualhum a hampa a ei li laih tuu sawm kuah le kuahte cu zamhihin, a paimi tuu pa khat zei tukin hawh tuk hi. 1
3 Thungai in hilh ing. A muhleh ten a pai ngawlmi sawm kuah le kuahte sangin a paimi tuu pa khat humah a lungdam saw hi.
14 Mahti bangbok lengin vancung a, um na Pa uhin naupang pa khatno hei a pai tuk cu awi ma hi. A Sualmi Unau
15 “Na unau uh pa khatin, na hum uhah a sual tale hawh unna, a sual thu hilh un hi. Mahnaven kuamah i theih tuk ngawlin nangmuh tuah bekin tawkdun un hi. Na thu uh a ngai tale unau a ngahleh hi tuk uh ci.
16 Mahnaven na thu uh a ngai ma tale thutheitu pa khat maw pa nih maw hawhpih un hi. Lai Thiangtho in, “Sual notdunnak hempoh cu thu theihpihtu pa nih maw, mahsang tam saw hei in um haw henna,” a tih bangin na hawhpihmi cu theihpihtu tetti hi tuk hi.
17 Mahnaven na thu uh a ngai ma tale, a thu le la a kimno in pawlpi tei lakah hilh un hi. A dawlbelnakin pawlpi thu vang a ngai ma tale amah cu umngawltu, mahma tale siahkhontu bangin ngaisung un hi. Khammi le Kham Ngawlmi
18 “Na venghawng uhin hilh ing: Leihum pen na kham uhmi cu vancung hei ah kham hi bok tuk hi. Mahnaven leihum pen na hot uhmi cu vancung hei pen hot hi bok tuk hi.
19 “Adang hilh hih tung. Hi leihumah mi pa nih lungkim kawmin, thu na ngen uh tale vancungah a ummi ka Pa in, na nget uh hempoh pia tuk hi.
20 Itahim titale ka minin mi pa nih hihen, pa thumin hihen, na khopkhawm uhten noh tei lakah um bok ing,” ti hi. Ngaihdam Ngawlmi Umlawh
21 Peter cu Jesuh lakah hungin, Topa, ka unau uh pa kha khatin, ka humah a sual ahin vei izong tian kaw ka ngaihdam tuk uh? Vei salih tian maw?” tin dong hi.
22 Jesuh in, “Mahma, vei salih tian bek hi ma hi, vei sawm salih i let salih tian ngaidam tuk ci;
23 Itahim titale Vancung Uknak cu hi bangin hi. Vei khat cu kumpipa pa khat umin, a umlawh tei nadeh dante dongkan tukin ngaisung hi.
24 A dotkan bek ten tangka a thawng a zain, a batu a umlawhpa khat cu lakah hunpih haw hi.
25 Mah umlawhpa in leiba lohnak tuk tangka imah nei ma hi. Mah hangin kumpipa in mahpa cu a leiba lohnak tukin a zi le cate le a neihmi hempoh tuah salah zuak khawng tukin thupia hi.
26 Kumpi bawipa i mai ah umlawhpa cu bokin, ‘Hehpih inna, ngak hih zalin hi. Lohleh khawng tuk poh ing hi,’ tin kun li hi.
27 Kumpipa in ngaithiamin, a leibat cu zahin hah hi.
28 “Mahpa cu hawhin ama lakah lei a batu a ngualcam umlawhpa khat cu tawk hi. Mahpa cu manin, a ngawng pen sanin, ‘Na batmi leibat pia in hi,’ tin ti hi.
29 Mah umlawhpa in, a bokin, ‘Hehpih inna, ngak hih zalin hi. Lohleh tuk poh ing hi,’ tin kun lo hi.
30 Mahnaven ngaidam nuam ma. A leiba a loh theih laklawh tian thawngah khia hi.
31 Mahmi cu umlawh dang ten amuh haw ten a lungmu haw nop po ngawlin kumpipa i lakah hawhin mah thute cu hilh khawng haw hi.
32 Kumpipa in mah umlawhpa cu samin, ‘Nang umlawh pha ngawl, na nget lo lih hangin na batmi hempoh zah khawng ing.
33 Na hum a hehpihnak ka neih bangin na ngualcam lakah hehpihnak nei bok tukin mawi ci,’ tin ti hi.
34 Kumpipa cu a thinuk mahtakin mahpa cu a leiba a venghawng a loh theih laklawh thawngah khia hi,” ti hi.
35 Jesuh in, “Kua hei in, na unau uhte cu na lungmu ngangai tuah na ngaithiam uh ma tale vancung a ummi ka Pa in mah umlawhpa bangin bawlbok tuk hi,” tin, a dawltabelin hilh hi.