To listen that verse in audio click to Ngawn..
Jesuh In Nupa Khennak Thuzilh (Mk 1:1-12)
1 Jesuh cu thuhilh a celh ten Galilee pen tulin Judea ngam Jordan ngun ngalkhat lamah hawh hi.
2 Mipi ten zui haw a, mahlai pen tina tampi damtik hi.
3 Farasi mi khenkhat cu a sual zei nuamin, “Itih bang thu ahi hei in pano in, a zi maak tukin a Daan uhin hon maw?” tin dong haw hi.
4 Jesuh in, “A pattungin, a bawltu Pathian in numei le pano bawl hi, tihmi Lai Thiangtho sungah sial awng ma uh cim?
5 Pathian in, ‘Mahti bang a hih hangin pano in, a nu le pa zamsanin, a zi tuah kopdun haw tuk a, a pa nih haw in pumkhatah cang haw tuk hi,’ tin ti hi.
6 Mah hangin amuh cu pum nih hileh ngawltohin, pumkhat hi haw hi. Pathian i khoptuah sa mite cu kuamah in khen haw ma hen,” ti hi.
7 Farasi ten, “Mahti bang ahi tale itakaw Moses in, ‘Pano in, a zi cu maaknak lai pia in tultik hen,’ tin daan a piak?” tin dong haw hi.
8 Jesuh in, “Thuzilh haksazet na hih uh hangin Moses in zi maak theihnak tuk thu a piaknak hi. Mahnaven ni dang laihin mahtih bang hi ma hi.
9 Thungai in hilh ing. Mipa pa khatin, a zi cu pano dang tuah sual haw ma naven ma in, zi dang a huai tale mahpa cu nupa sualnak bawl,” ti hi.
10 Nungzuitu ten, “Zi le pasal laklawhah hitih bang tuk ahi tale huaidun ngawl ahin pha saw,” tin Jesuh lakah ti haw hi.
11 Jesuh in, “Mah na tih uhmi cu mi hempoh tei ca in hi ma hi; Pathian i teksa bek ten zui zo haw tuk hi.
12 Pano in, zi a huai ngawlnak cu a thu a phunkimin um hi. Mi khenkhat cu pianpih hangin hi haw in, mi khenkhatte cu zi huai tuk ngawlin tilnget haw a, mi khenkhatte cu Vancung Uknak hangin zi huai ngawlin um haw hi. Mahti bangin a zui theitu in hi thuzilhnakte hi zui hawta poh hen,” ti hi.
Jesuh In Naupangte Thupha Pia (Mk 10:13-16; Lk 18:15-17)
13 Mi khenkhat ten a cate cu Jesuh in, a lu hum hawah khutsuanin, thunget sak tuk deihin hunpih haw naven nungzuitu ten liat haw hi.
14 Jesuh in, “Vancung Uknak cu hi bang tei tatuk a hih hangin, naupangte cu ka lakah hung haw poh hen, kham pahsuh un,” tin ti hi.
15 A lu hum hawah khutsuanin thupha a piak ceng ten hawhleh hi.
Mihau Tangval Pa (Mk 10:17-31; Lk 18:18-30)
16 Vei khat laihin, mi pa khat cu Jesuh lakah hungin, “Mipha zilhtu pa, kumkhua nunnak ka ngah theihnak tukin thilpha i bawl kam nang?” tin dong hi.
17 Jesuh in, “Ita mipha ti thei cim. Mipha pa khat bek um hi. Kumkhua nunnak sungah na lut nuam tale thukhamte zui in,” ti hi.
18 Tangval pa in, iti bang thukhamte him? tin dong hi. Jesuh in, “Mi that pahsun; nupa sualnak bawl pahsun; nguca pahsun, a man ngawlin mite sual nawn pahsun;
19 Na nu le pa upat inna; na inn nelte nangmah le nangmah na ih bang bokin it in,” ti hi.
20 Tangval pa in, “Mah thukhamte cu zui khawng zo ing. Ibawl laih kam nang?” tin dong hi.
21 Jesuh in, “Mi cangkim na nuam ngangai tale hawh inna, na neihmi hempoh zuakin, na ngahmi tangka cu mi ca-ngahte pia in hi; mahten vancungah sum le pai nei tuk ci. Mahceng ten keimah zui in,” ti hi.
22 Mah thu cu tangval pa in, a zak ten a thasia in kiklehta hi, itahim titale amah cu mihauzet hi.
23 Jesuh in, a nungzuitu tei lakah, “Thungai in hilh ing. Mihau tei ca in, Van cung Uknak tum tuk cu haksazet hi.
24 Vei khat hilh lehleu tung. Kalauk pa khat i hio kua sungah a tum tuk sangin mihau pa khat i Pathian Uknak sungah a tum tuk haksa saw hi,” tin ti hi.
25 Mahmi cu nungzuitu ten a zak haw ten lamdangsa mahtakin, “Mahti bang ahi tale, akua in kaw nunpatnak a ngah thei tuk,” tin dong haw hi.
26 Jesuh in, a maicang zo in, “Hihi cu mihing tei ca in, a cangthei ngawlmi hi. Mahnaven Pathian i ca in ihempoh cangthei hi,” tin ti hi.
27 Mahten Peter in, “Ihempoh zamsanin, nangmah zui zo si ung. I heng ka ngah tuk uh?” tin dong hi.
28 Jesuh in amuh tei lakah, “Thungai in hilh ing hi, san thak hengin Mihing Capa cu a khunnak sunglawi humah a khun ten noh ka nungzuitu sawm le pa nihte cu Israel miphun sawm le pa nih uktu hi bok tukin khunnak humah khung bok tuk uh ci.
29 Kua hei hihen keima ca in, a nu le pa le a cate hihen, unau pih le celnu hihen, inn le lo hei hihen pa khat pawpoh a zamsantu cu a let za khatin ngahleh tuk a, kumkhua nunnak piak hi tuk hi.
30 Mahnaven tu a masabelte cu dawltabel hileh haw tuk a, tu a dawltabelte cu masabelleh haw tuk,” ti hi.