Jerusalem Ah Sunglawi Zetin Tum (Mk 11:1-11; Lk 19:28-40; Jn 12:12-19)
1 Jesuh le a nungzuitute cu Jerusalem nai dedeuh li haw toh hi. Olif mual a ummi Bethfage khua heng haw hi. A nungzuitute pa nih mai ah hawhhamtikin hitin thucah hi.
2 “Na mai uh a, khua ah hawh unna, laakpi ano tuah a khih haw mi mu paih tuk uh ci. A khau dukin, ka lakah hunpih un hi.
3 Miten i tuk kaw na kaih uh a ti haw tale, ‘Topa in kin hi,’ tin ti unna, thakhatin phal haw tuk poh hi,” tin ti hi.
4 Hihi cu profet i hilhsami kimtiknak tukin hi. Profet in:
5 “Zion khuapi cu hilh un, na kumpipa cu na lakah hung li laih hi. Amah cu lungnemmi hi in, laak humah khung hi. Laakno humah khung,” ti hi.
6 Jesuh i hilhnak bangin nungzuitute cu hawhin bawl haw hi.
7 Laak le ano cu hunpihin, a ngumzaangah a puan haw cu phahin Jesuh cu khung hi.
8 Mipi ten Jesuh i hawhnak tuk lampi ah a puan haw cu phahin, midang ten thingceh la in lampi ah phah bok haw hi.
9 Jesuh i masuanah a hawhte hihen a nunglam pen a zuitute hihen a venghawng haw in,
“Hosana David Capa cu thangphat un!
Topa i min tuah a hungtu cu Pathian in thupha pia tahen!
Pathian cu thangphat un!” tin au leilui haw hi.
10 Jesuh cu Jerusalem khua sungah a tum ten a khua buppi in, au leilui haw a, “Hi pa hi akua him?” tin khua miten dong haw hi.
11 Mipi ten, “Hi pa cu Galilee ngam Nazareth khua profet Jesuh hi,” tin ti haw hi.
Jesuh Biakinn ah Hawh (Mk 11:15-19; Lk 19:45-48; Jn 2:13-22)
12 Jesuh cu biakinn sungah tumin, mahlai a, na zuaktu le a leitute khi hawlvawk khawng hi. Tangka thektu tei cabuai le laileng zuaktu tei khunnakte cu bungletsak khawng hi.
13 Jesuh in, “Lai Thiangtho sungah Pathian in, ‘Ka inn cu thungetnak inn tih hi tuk hi,’ mahnaven noh ten nguca tei ngelhnak munin bawl uh ci,” tin hilh hi.
14 Biakinn sung a um mitcaw le kebaite cu a lakah hung haw in damtik hi.
15 Nalamdang a bawl ten Biakinn sung a naupang ten, “David Capa cu thangphat un,” tin, a au lih haw cu thiampi upate le Daan zilhtu ten amuh haw ten thinukzet haw hi.
16 Mah hangin, mipi ten, “A au lih haw mi hi thei cim?” tin dong haw hi. Jesuh in, “Thei ing! Lai Thiangtho sungah ‘Naupang le nau nawicawp naumom tei sung pen thangphatnak cangkim tultik ci,’ tin ngatmi sial awng ma uh cim?” tin donin zam hi.
17 Jesuh in zamsanin, Jerusalem khuapi sung pen tulin Bethani khua ah hawhin caam hi.
Theikung Tamsiatnak (Mk 11:12-14, 20-24)
18 A zing, zingtungno in Jerusalem khuapi lamah a hawhleh ten a ngilkialzet hi. 19 Lampi el a, theikung cu mu in, a bulah zuan naven a ceh sialngawl a ngahmi mu ma hi. Mah hangin theikung cu, “Itukmah ten ngahleh toh pahsun,” ti hi. Thakhatin theikung pi cu ko khawng paih hi.
20 A nungzuitu ten amuh haw ten lamdangsazet haw hi. “Ita hi tih bangin manlang zetin ko khawng paih heng?” tin dong haw hi.
21 Jesuh in, “Thungai in hilh ing. Aicannak nei viang ngawlin na um ngangai uh tale hi theikung pi hum a, ka bawlmi hi nangmuh vangin bawl thei bok tuk uh ci. Hi bek hei hi ngawlin hi mual hei hi, ‘Thawn inna, tuipi sungah caak in,’ na ti uh tale na tih uh bangin piang tuk hi.
22 Na um ngangai uh tale thungetnak tuah na nget uhmi hempoh cu ngah tuk uh ci,” ti hi.
Jesuh i Thuneihnak (Mk 11:27-33; Lk 20:1-8)
23 Jesuh cu Biakinn sungah thu a zilh lih laih takin thiampi upate le hotute a lakah hung haw in, “Hih thilte hi akua i thu tuah bawl nge cim? Akua kaw thu a piatu?” tin dong haw hi.
24 Jesuh in, “Thu pa khat dong bok nang inna, na don thei uh tale, a koi thu in hitih bang thil bawl ing kaw tih hilh tung,” ti hi.
25 “Johan i tuiphumnak a piaklih khi Pathian i thu in maw mihing i thu in kaw a piak?” tin a dot ten, “Itin ti kam nung?” tin amu sungah eldunnak um hi. ‘Pathian i thu in bawl hi,’ a ti uh ahin, ‘Mah tale Johan i thu sang ma si uh si,’ tin ti ol si.
26 ‘Mihing thu in,’ a ti leleu uh vangin Johan cu mi hempoh ten profet hi tin, a up sih haw tak mipi ten eimuh lehlam a siatleh haw ahin, tih lauhuai sih hi,” tin ti haw hi.
27 Mah hangin, ‘Thei ma ung,’ tin don haw hi. Jesuh in, “Mahti bang ahi tale kei vangin, a koi thu in him ka bawl, tih hilh bok tuk mang,” ti hi. Capa Pa Nih Tehkipnak
28 Jesuh in, “Itin ngaisung uh cim? Mi pa khatin capa pa nih nei in, a capa upa saw lakah hawh a, ‘Capa aw, tuni cu sabit huanah hawhin nadekin hi,’ tin ti hi.
29 A capa upa saw in, “Nuam mang” tin el naven a nungten siklehin sabit huanah hawhleh hi.
30 A capa nauta saw lakah hawh lehleu in sabit huanah nadek tuk hawhtik bok hi. Mahpa in, ‘Hawh tung hi ka pa,’ tin sangto paih naven hawh ma hi.
31 Hi capa pa nih tei lak pen akua saw in kaw a pa i deihnak a bawltu?” tin dong hi. Amuh ten, “A capa upa saw,” tin don haw hi. Jesuh in, “Thungai in hilh ing: siahkhontu le numei pha ngawlte hi nangmu laih ngawlin Pathian Uknak sungah tum haw tuk hi. Jesuh in, “Thungai in hilh ing: siahkhontu le numei pha ngawlte hi nangmu laih ngawlin Pathian Uknak sungah tum haw tuk hi.
32 Itahim titale tuiphum Johan cu lamdik lak tukin nangmu lakah hung naven um nuamma uh ci; mahnaven siahkhontu le numei pha ngawl ten um haw hi. Mahmi na muh nung uh hei ten na lungmu uh thek nuam ngawlin um nuam cuang ma uh ci.”
Sabit Huan Nadektu Tehkipnak (Mk 12:1-12; Lk 20:9-19)
33 Jesuh in, “Hi tehkipnak hi ngai hih hem un. Mi pa khat cu sabit huan bawlin, mah a huan cinnak tukin buk sa hi. Sabit suknak tuk khuk co in, a cinnak tukin deubuk sa hi. Mah nungten sabit huan nadektu tei lakah zawngtikin, amah cu khualzin tukin hawhta hi.
34 Sabit ngah thoih hun a hen ten a covo cian tukin a umlawhte cu huan zawngtu tei lakah hawhtik hi.
35 Sabit huan zawngtu ten a umlawhte cu man haw a, pa khat cu vaatin, adang pa khat cu thatin le a dang pa khat cu suang tuah sep haw hi.
36 Lo neitu pa in, a umlawhte tam saw deuh hawhtik lehleu naven huan zawngtu ten a masa bang lelengin bawlsia haw hi.
37 A dawlbel ten a capa hah hi, “Ka capa hi cu maisong loli haw tuk,” tin ngaisung hi.
38 Mahnaven huan zawngtu ten a capa amuh haw ten, “Hi pa hi huan neitu pa i capa hi. Hung unna, that nung inna, a nate cu eimu co tuk hung,” tin ti lamsang haw hi.
39 A capa cu manin, huan pualamah doktulin that haw hi.
40 “Huan neitu pa a hun ten mah huan zawngtute cu itin bawl tukin ngaisung kam uh ci?” tin dong hi.
41 Amuh ten, “Mahti bang mipha ngawlte cu thatin, ama covo a manno in, a pia theitu midang tei lakah a huan cu zawn tuk hi,” tin don haw hi.
42 Jesuh in, “Lai Thiangtho i hilhmi sial awng ma uh cim? Lai Thiangtho in, ‘Inn satu tei nemcuam ngawl tin a lawl haw mi suang cu a thupibel mi suangin cang hi. Hihi Topa i bawlmi hi, ohtei mitzohin mawizet,’ ti hi.
43 “Thungai in hilh ing, Pathian Uknak hi nangmu lak pen lak hi tuk a, ngah phano in, a ngah suaktik theitu tei lakah piak hi tuk hi,” ti hi.
44 “Kua hei hihen hi suangpi humah a cakmi cu keh khawngin, hi suang i ngawi ngahmi pawpoh cu leivul bangin zan dihdiah haw tuk hi,” tin ti hi.
45 Jesuh i hilhmi tehkipnak thute cu thiampi upa le Farasi ten a zak haw ten amu cungcang son hi tih thei haw hi.
46 Mah hangin Jesuh cu mat tum haw naven mipi ten profet hi tin, a ngaihsut haw hangin mipi ten lau in man ngamleh haw ma hi.