To listen that verse in audio click to Ngawn..
Mo Puai Tehkipnak (Lk 14:15-24)
1 Jesuh in mipite cu tehkipnak tuah zilh hi.
2 “Vancung Uknak cu hi bangin hi. Kumpi pa khatin, a capa i zihuainak puai bawl hi.
3 Mah mopuainakah tel tukin a sammi hempoh hilh tukin a umlawhte hah naven kuamah hung haw ma hi.
4 Mah hangin a sammi tei lakah a umlawh dangte hahlehin, hi bangin thucah hi. “An eih man zo ung. Ka khuicangte le ngan thauzet ngo khawng zo ung a, ihempoh tuangtim khawng zo ung hi. An ei khawm tukin hung toh un,” ti hi.
5 Mahnaven sam sa ten imah simsial kha ngawlin amu nadeh bang leng dekin um haw hi. Pa khat cu a lo ah hawhin, a dang pa khat cu a dawl zuaknakah hawh hi.
6 Midang ten a umlawhte cu manin, a vah ceng haw ten that haw hi.
7 Kumpipa cu a thinukzet hangin a ngalkapte cialin mithat tute cu thatin, a khuate vang haal haw hi.
8 Mah nungten a umlawhte samin, “Mo puai ka bawlmi cu ihempohin man khawng zo naven ka sam mite hi sam tak hi haw ma hi.
9 Mah hangin mi zapi i hawhnak lampi ah hawhta unna, na zop theih zazah uhin zawmta un,” ti hi.
10 A umlawhte cu lampi ah a tawh haw pawpoh a pha a sia tih um ngawlin a sam haw tak, puai bawlnak innpi cu dim hi.
11 “A sammi haw zo tukin kumpipa a tum ten mopuan silh ngawl mi pa khat mu hi.
12 Kumpipa in, ‘Ka ngualcam pa, mopuan silh ngawlin itin kaw hilai munah na tum theih?’ tin dong hi. Mahnaven imah hilh thei ma hi.
13 Mahten Kumpipa in, a umlawh tei lakah, ‘A khut le a ke ken unna, pualam khuathimnakah vawkta un hi. Mahlai munah kah le hacang ngawi in um tuk hi,’ ti hi,” tin hilh hi.
14 Mah nungten Jesuh in, “Sammi cu tampi naven tenmi cu demno hi,” tin, a dawlbelnakin hilh hi.
Siah Piaknak Thu (Mk 12:13-17; Lk 20:20-26)
15 Farasi mite cu Jesuh sual zei theihnak tukin thudot tuk bawlcawm haw hi.
16 Amuh zuitu khenkhatte le Herod i mihing khenkhatte cu Jesuh lakah hawhtikin, “Sazapa, nang cu thuman son ci tih thei ung. Pathian i deihnak ihim tihmi thu vang miten iti bang ngaisung haw nantim tih hei ngaisung ngawlin zilh ci. Itahim titale nang cu mitei hihnak vang maisong ma ci.
17 Mah hangin na ngaihsutnak hilhin hi. Rom kumpi bawipa lakah siah piak hi a Daan uhin awi maw awi ma him?” tin dong haw hi.
18 Tuptahnak pha ngawl a neih haw mi Jesuh in, a theih ten, “Mipha ngawlte ita kei thangin awk tukin na ngaihsut uh?
19 Siah piak tukmi tangka lak hem un,” ti hi. Tangka cu a piak haw ten,
20 “A koi mel le min kaw a cuang?” tin dong hi.
21 Amuh ten, “Kumpi bawipa mel le a min hi!” tin don haw hi. Jesuh in, “Mah ahi tale kumpi bawi ta cu kumpi bawi pia unna, Pathian ta cu Pathian pia un hi,” tin don hi.
22 Mah a zak haw ten lamdangsa in pualamah tulin hawhsan khawng hawta hi.
Thawhlehnak Thu (Mk 12:18-27; Lk 20:27-40)
23 Mah ni sun lelengin, Sadusi mi khenkhatte cu Jesuh lakah hung haw hi. A muhte cu thawhlehnak umma a titu haw hi.
24 Amuh ten, “Sazapa,” Moses in, “Mi pa khat ca nei ngawlin a thi tale, a nau pa in, a zi cu huai hen. Mahten ca a nei haw tale cu mithi pai ca in cang tuk ti hi.
25 Hilai ah a um awngmi unau salih um haw hi. Upabel cu zi huai in, ca nei ngawlin a thih hangin a zi cu a nau pa in co hi.
26 Pa nihnak pa vang cu thi leleu in, a pa thumnak pan a zi cu coleh hi. Mahten a unau hawng haw i zi a hih nungten unaute cu thi khawng haw hi.
27 A dawlbel ten mah nu vang cu thi bok hi.
28 A salih haw in, a zi ten haw hangin thihnak pen thawhkik ni ten akua i zi tukin um kam ni?” tin dong haw hi.
29 Jesuh in, “Iti lawlawmin khial thei uh cim? Lai Thiangtho le Pathian ngilnak huham na theih uh ngawl hangin hi.
30 Itahim titale mithi tei thawhleh ten vanah a ummi vancungmi bang haw tuk a, huaidunnak tihte um tukma hi.
31 Mithi thawhlehnak thu ah Pathian i hilhmi sial awng ma uh cim?
32 Pathian in, ‘Kei cu Abraham Pathian, Isaak Pathian, Jakob Pathian ing hi,’ tin ti hi. A nungmi Pathian hi in, a thi mitei Pathian kha ma hi,” tin ti hi.
33 Mahmi cu mihonpi in, a zak haw ten a thuhilhdan lamdangsazet haw hi.
Thukham Ngengbel (Mk 12:28-34; Lk 10:25-28)
34 Jesuh in Sadusi mite awnthei ngawlin bawl tih thu cu Farasi ten a zak haw ten tawkdun khawmin,
35 amu lak pen pa khat, Daan zilhtu pa in, Jesuh sual zeinuamin thu dong hi.
36 Sazapa, “Daan sung pen i thukham kaw a ngengbel?” tin dong hi.
37 Jesuh in, “Topa na Pathian cu na lungmu hempoh, na nunnak hempoh le na ngaihsutnak hempoh tuah it in hi,’
38 tihmi hi; a ngengbel le a thupibel thukham hi.
39 Pa nihnakah a thupibel mi thukham cu pa khatnak bang leleng hi: ‘Nangmah na ihdun bangin na inn nelte it bokin,’ tin ti hi.
40 Moses Daan hempoh le profet tei zilhmi hempoh cu hi thukham pa nihin, huapcih khawngin, kaikhawmtu,” ti hi.
Khrih Thu (Mk 12:35-37; Lk 20:41-44)
41 Farasi mite munkhatah a pumkhawm haw ten Jesuh in,
42 “Khrih hi itin ngaisung kam uh ci? Akua i casuan kaw?” tin dong hi. “David casuan hi,” tin ti haw hi.
43 Jesuh in, “Mahtin ahi tale itakaw, ‘Hawvangin David lakah, Khrih cu Topa hi tin, itin kaw a tiik theih?’ David in:
44 ‘Topa in ka Topa i lakah, ka ngalte na ke nuai ah ka koih laklawh, ka taklamah khungin hi,’ tin ti hi.
45 David in, Topa a titale itin kaw Khrih cu David casuan a hih theih tuk?” tin dong hi.
46 Jesuh i thudotmi cu kuamah in don thei haw ngawlin mah ni pepan kuamah in thu dongleh ngam haw ma toh hi.