To listen that verse in audio click to Ngawn..
Daan Zilhtu le Farasi Mite Ngallin Piaknak
(Mk 12:38-39; Lk 11:43-46, 20:45-46)
1 Jesuh cu mihonpi le a nungzuitu tei lakah thuhilh hi.
2 “Daan zilhtute le Farasi mite hi Moses i piakmi Daan a hilhciangtu tukte haw hi.
3 Mah hangin a hilh haw mi thu hempoh cu na bawl tuk uh le na zui tuk uhmi hinaven a thil bawldan haw cung pahsuh un, iahim titale a hilh bangin bawl ma hi.
4 Mi ko humah van ngitzet suan haw naven amuh ten mah van ngit puak bawm tukin a khut lekno haw hei in tawngkha nuam haw ma hi.
5 Mitei muh tuk bekin ihempoh bawl haw hi. A lu le baan hawah a khih haw mi i humah Lai Thiangtho a ngat haw mi lupawng le a baanvialte zo hem un! Itih zahin ngeng him! A puancepm haw a saudan zo hem un!
6 Puai bawlnak munah hihen Biakinn ah hihen a phabelnak munah a khun nuam haw hangin khunnak hamsa mek haw hi.
7 Bazal tuan mipi tamnak mun pen mitei upat piak tuk nuamin le, ‘Sazapa,’ tin sam tuk nuamzet haw hi.
8 Mahnaven noh ten, ‘Sazapa’ tin, a sam haw tuk nuam pahsuh un! Itahim titale nohte cu unau noh ten hi uh ci, ‘Sazapa’ tin na sam tuk uh Khrih pa khat bek nei uh ci.
9 Mahten leihumah ‘Ka pa’ tin a kuamah sam pahsuh un, itahim titale vancungah a um na Pa bek uh cu Pa tin sam tuk nei uh ci.
10 Kuamah in ‘Puitu’ tin sam tuk nuam pahsuh un, itahim titale Khrih tihmi puitu pa khat bek nei uh ci.
11 Nohtei lak pen a ngengbel a nuamtu in nangmu lakah sila a hih masak kul hi.
12 Kua hei hihen amah le mah thupi sa duncop mite cu nuainep co tuk hi, mah le mah a niamkhiat mite cu khaisan co haw tuk hi.
Jesuh In Ultung Copte Nautat (Mk 12:40; Lk 11:39-42, 44, 52, 20:47)
13 “Daan zilhtu le Farasi mite! noh ca in lauhuaizet hi. Noh mi ultung theite, vancung Uknak kongka cu mitei tum theih tuk ngawlin khakin nohte tale tum nuam sih ngawl; midang a tum nuam tei ca in, hon nuam ma uh ci.
14 Daan zilhtute le Farasi mite! thusia cote uh ci. Noh mi ultung theite! Meivongte khi meivong a hih haw hangin zawnsakin, a inn haw tian sut uh ci; mahten mipi muhin ngeizet thungen uh ci. Hitih bangin na hih uh tak bawlsiatnak nasezet thuak tuk uh ci.
15 “Daan zilhtu le Farasi mite! thusia cote uh ci. Noh mi ultung theite, mi pa khat i lungmu thektik tukin hawmkuang tuah ngam tampi ah vak uh ci. Mi pa khat na ngah uhten hellah cak tukin nangmuh sangin a let nihin thuak tukin bawl uh ci.
16 “Huaitu mitcawte! ‘Noh tei ca itih zahin lauhuai him? Mi pa khatin Biakinn min salin, thu a tiam tale imah kho ma hi, mahnaven biakinn sung a sui saw salin thu a tiam tale a tepmi kho hi,’ tin mite zilh uh ci.
17 Mitcawte! Misilte! Ikaw a thupi deuh? Sui maw, ahimata sui khi sui thiangtho tukin a bawltu Biakinn saw kaw?
18 Mah i humah, ‘Mi pa khatin biaklandawh min salin, thu a tiam tale a thutiam mi kho ma hi; mahnaven biaklandawh hum a ummi zehsa min salin siat a cam tale na siatcam mi kho hi,’ tin zilh uh ci.
19 Khua mu thei ma lawlawm si uh ci! Ikaw a thupi saw? Zehsa maw zehsa a thiangthotiktu biaklandawh him?
20 Mah hangin mi pa khatin biaklandawh salin thutiam a bawl ten biaklandawh le biaklandawh hum a, ummi zehsa hempoh tuah tiamdun hi.
21 Biakinn salin thu a tep ten biakinn le biakinn sung a ummi Pathian minin tiamdun hi.
22 Mahten vancung salin, a tiamdun tale Pathian khunnak le a hum a khungtu i minin tiamdun hi.
23 “Daan zilhtu le Farasi mite! Thusia cote uh ci. Noh mi ultungte! Pathian nelah putinan, lemmui le thingte seh sawm seh khat pia uh ci; mahnaven Daan sung a thupi zetmi diknak, hehpihnak le thumannak cu zui ngawlin imah simsial ma uh ci. Seh sawm seh khat cu na piak tuk uh hihim hi. Mahnaven Daan sungah a ummi a dangte vang zulzau pahsuh un hi.
24 Hotu mitcawte! Na in uhmi khuat sung a, tho neuno dik vawk nave uhcin, kalauk lehlam thon tumsial si uh ci.
25 “Daan zilhtu le Farasi mite! Thusia cote uh ci! Noh mi ultungte! Na khuat le na pakan uhte a pualam bek ciang lenglungin, som nave uhcin, a sunglam cu mitei thil na lon uhmi le hampumnak pen na ngah uhmi tuah dim hi.
6 Farasi mitcawte! Na khuat uh a sunglam som masa unna, mahten a pualam vang ciang bok tuk hi.
27 “Daan zilhtu le Farasi mite! Thusia cote uh ci. Noh mi ultungte! Nohte cu a ngo noihmi mithi khan bang uh ci; a pualam cu mawizet nave uhcin, a sungah nguh, a uih a muatmi tuah dim hi.
28 Mahti bangin na pualam uh zoh ten mi hempoh ca in miphazet bang naven uhcin na sunglam uh cu ultunnak le sualnak namkim tuah dim uh ci.
Jesuh In Dantatnak Tuk Hilhham (Lk 11:47-51)
29 “Daan zilhtu le Farasi mite! Thusia cote uh ci! Profet tei vuinak tuk khan pha zetin bawl uh ci, mipha tei khan phut cu mawitikzet uh ci.
30 Noh ten, a pupa tei khanah a nung uh bokta ahin, na a bawl haw mite hi bawl tukma hung, profette hei that hihim tukma naven ung, tin ti uh ci
31 Mahti bang ahi tale profette a thattu tei casuan ung hi tih a langtiktu hi uh ci.
32 Mah hangin na pupa tei a patsa haw mi na cu nangmuh ten bawl khawng un hi!
33 Noh ngul le ngul tei ca! Itin kaw hell sung pen luat tuk hung tin, na ngaihsut ngam uh?
34 Thungai in hilh ing; nangmu lakah profet le micip zilhtute hawhtik tung; mi khenkhat cu that tuk uh ci, mi khenkhat cu thinglamtehah that tuk uh ci, mi khenkhat cu pumkhawminnte pen vaatin, khua khat pen khua khatah hawlvawk pepel tuk uh ci.
35 Mahti bang a hih hangin sualnak a nei ngawl ten thihnak na thuaktiknak uh hangin dantatnak cu nangmu humah heng khawng tuk hi. Sual nei ngawl Abel pepanin, Biakinn le biaklandawh laklawhah na thah uhmi Berakhiah i capa Zekhariah tian, a thisan a suah haw man cu nangmu humah heng khawng tuk hi.
36 Thungai in hilh ing hi: hi mite na thah uh hangin dantatnak cu atu khan mihing tei humah heng khawng tuk,” ti hi.
Jesuh In Jerusalem It (Lk 13:34-35)
37 “Jerusalem, Jerusalem! Na lakah Pathian in, a tiikmi profette thatin, suang tuah sep ci. Akpi i aknote a ha nuai ah a uap bangin na mite uap nuam li naveng nuam ma ci!
38 Mah hangin na Biakinn cu thacang tuk a, veng diudeu tuk hi.
39 Hilhham ing hi: ‘Topa i minin, a hungmi cu Pathian in thupha pia tahen,’ tin na tih theih laklawh tian cu tu pepan keimah muleh hihim tukma toh uh ci,” tin ti hi.