Khanglai Sawm Tehkipnak
1 “Mah hun ten Vancung Uknak cu mohuaitu tangvalpa muak tukin mei inn tuah a hawhtu khanglai sawm khatte tuah bangten tuk hi.
2 Khanglai sawm khat sung pen pa nga lam cu silin, a dang pa nga lam cu cip haw hi.
3 A silmi khanglai ten mei inn keng haw naven zinan keng haw ma hi.
4 A cipmi khanglai ten, a mei inn haw cu zinan a dimin thunhamin keng haw hi.
5 Mohuaitu tangvalpa cu a khuanu deuh hangin khanglaite cu hihbu hih haw hi.
6 “Zanngil laihtakin, ‘Mohuaitu tangvalpa cu heng hi! Tho unna, muak un hi,’ tin au thawm thang hi.
7 Khanglai sawm khatte cu khangto in, a mei inn haw tek cu vak haw hi.
8 Mahten khanglai sil ten khanglai cip tei lakah, ‘Ka mei inn uh mit li toh hi, na zinan uh hoi bok un,’ tin ngen haw hi.
9 Khanglai cip ten, ‘Cangthei tukma hi, nangmu ca kencem ma ung. Dawlah hawh unna, leilehta un,’ tin ti haw hi.
10 Mah hangin khanglai sil pa nga lamte cu zinan lei tukin dawlah hawh haw; a hawhlan haw in mohuaitu tangvalpa cu heng hi. Ngallingzet sa in, a ummi khanglai pa ngate cu tangvalpa tuah Mopuai an vaknak sungah tumin kong cu khak haw hi.
11 Mahnung ten khanglai pa nga lam cu hengin, ‘Bawipa, bawipa! Kong honin hi,’ tin au haw hi.
12 “Hon tuk mang hi, nohte thei kha mang, tin moneitu tangvalpa in don hi,” tin hilh hi.
13 Jesuh in, “Mahti bangin a ni le hun na theih uh ngawl hangin ngalling zetin ngak un,” tin, a dawltabelin ti hi.
Umlawh Pa Thum Tehkipnak (Lk 19:11-27)
14 “Mah hun ten Vancung Uknak cu hitih bangin hituk hi. Mipa pa khat cu khualzintuk ngaisungin, a hawh laih ngawlin a umlawhte samin, a na cingtik hi.
15 Amu tihtheih tawkzawn tenin; pa khatpa lakah tangka thawng nga pia hi, a dang pa khat lakah thawng nih pia in, a dang pa khat lakah thawng khat pia hi. Mah nungten amah cu khualzinta hi.
16 Tangka thawng nga ngahtu umlawhpa cu sumbawlnak mangin, a met thawng nga ngah hi.
17 Mahti bang bokin thawng nih a ngahtu pa vangin, a met thawng nih ngah bok hi.
18 Mahnaven tangka thawng khat a ngahtu pa cu hawhin khuk a cawh celh ten a bawipa i tangka cu phum hi.
19 “Hun ngeipi nungten a bawipa haw cu pinin, a tangka mandan haw ciangtik tukin son khawm haw hi.
20 Sum thawng nga ngahtu pa cu hungin, ‘Bawipa sum thawng nga na piak cu a met thawng nga tuah atu-in, na pia ing,’ tin ti hi.
21 A bawipa in, ‘Umlawh pha, muantakzet ci! A dawmno i humah muantak na hih hangin tampi cingtu in bawl tung hi. Hung inna, ka lungdamnak puai sungah tel bokin,’ tin ti hi.
22 Mahten thawng nih a piakmi pa cu tumin, ‘Kei na piakmi cu thawng nih ven hilai hah a met ka ngahmi a dang thawng nih vang um hi,’ tin ti hi.
23 A bawipa in, ‘Pha hei, umlawh pha le muantak hi ci. A dawmno humah muantak na hih hangin tampi cingtu tukin koih tung hi. Hung inna, ka lungdamnak sungah tel bokin,’ tin ti hi.
24 Mahten thawng khat a ngahtu pa cu tumin, ‘Bawipa, nang cu mi ngeikhei pa hi ci tih thei ing; na cin ngawlmi atin, na theh ngawlnakah ante cawm ci.
25 Mahti bang a hih hangin a lau in, na tangka cu lei sungah phum ing. Zo in! Hilai hah um leng hi,’ tin ti hi.
26 Mahten a bawipa in, ‘Nang umlawh pha ngawl thazawngpa!’ Anci ka cin ngawlnakta at in le ka vawh ngawlnak ata, ka cop lam thei ngangai cim?
27 Mahti bang ahi ngangai tale ita ka tangka cu ka hunleh ten a khang tuah ka ngah theihnak tukin sumpai khawlnak bankah ita koih ma cim?
28 Hitih bang a hih hangin hi pa i lak a tangka cu la unna, thawng sawm a neitu pa i lakah pia un hi.
29 Itahim titale tampi a neitute cu piakbet hi haw tuk a, a valin nei haw tuk hi. Mahnaven imah a nei ngawltu pa i lak pen a neihcalam cawmin laksak hi tuk hi.
30 Hi nemcuamnak nei ngawl umlawhpa cu pualam khuathimnakah vawk unna, mahlai ah kap le hacang ngawi in um tahen,” tin ti hi. Thukhennak Dawlbel
31 “Mihing Capa cu Kumpipa bangin vancungmi hempoh tuah a hun ten Kumpi khunnak humah khung tuk hi.
32 Miphun hempoh cu a mai ah khawm khawng haw tuk hi. Mahten tuucing pa in tuu le keel a khen bangin mi hempoh cu khen tuk hi.
33 Miphate cu a taklamah koihin, mipha ngawlte cu a veilamah koih tuk hi.
34 Mahten Kumpipa in, a taklam a mipha tei lakah, ‘Hung un ka pa i thupha piakmite! Hung unna, leihum semsuah pepan nangmu ca lepsami ngamnop luah un hi.
35 Itahim titale ka ngilkial ten an pia uh ci; ka dangdum ten, intuk tui pia uh ci, mikhual ka hih laihtakin, na inn uhah zintungtik uh ci;
36 Puan ka neih ngawl ten ka silh tuk puan pia uh ci; ka nat laihin tuamlawm uh ci a; thawng ka tak laihin veh uh ci,’ tin tituk hi.
37 Midik ten, ‘Bawipa ituk laihin kaw na ngilkial laih mu in, an ka piak awng uh; na dangdum laih mu in tui ka piak uh?
38 Ituk laihin kaw mikhual na hihlaih mu in, keimu innah zin ka tuntik awng uh; puan nei ngawlin puan ka piak uh?
39 Itukin kaw na nat mu in le thawng na tak laih ka veh uh?’ tin ti haw tuk hi.
40 Kumpipa in, ‘Thungai in hilh ing; hi ka unaupih a nautabel humah na bawl uhmi hi keima humah a bawl hi uh ci,’ tin tituk hi.