Hotu Ten Jesuh Thah Tum Haw (Mk 14:1-2; Lk 22:1-2; Jn 11:45-53)
1 Jesuh in hih thute a zilh ceng ten a nungzuitu tei lakah,
2 “Na theih uh bangin tunung ni nih ten Kaltan Puai hi tuk a, Mihing Capa cu thinglamteh humah khet cih tukin piak hi tuk hi,” tin ti hi.
3 Mahten thiampi upate le upa dangte cu Thiampi Sang Kaiafas innah, tawkdun khawm haw a,
4 Jesuh khi a kuhno manin that tukin thu vaisiam kuh haw hi.
5 “Puai sungin that tukma ung, mipi buai kha haw tuk,” tin ti haw hi.
Jesuh Cu Bethani Ah Zimui Leih Haw (Mk 14:3-9; Jn 12:1-8)
6 Jesuh cu Bethani khua a, phaaknat a thuaktu cu Simon innah umin,
7 an a eih laih takin numei nu pa khat cu Jesuh lakah hungin, manhak zetmi alabaster zimui thawl khat a kenmi cu Jesuh i lu ah leih hi.
8 Mahmi cu nungzuitu ten amuh haw ten a thinuk haw in, “Pammaizet si maw!
9 Hi zimui cu tangka tampi tuah zuakin, a man tuah mi ca-ngahte piak saw tuk si,” tin ti haw hi.
10 Jesuh in mahtin a tihmi haw a zak ten, “Itahim hi numeinu na dondak khak lih uh? Keima ca in, a bawlmi hi thilpha le a mawi zetmi hi.
11 Mi ca-ngahte cu nangmu lakah um leleng haw tuk naven kei cu noh tei lakah um leleng tuk mang hi.
12 Ka hum a, zimui tui a leihmi hi ka luang vuinak tukin a tuangtim ham hi.
13 Thu ngangai hilh ing; Thuthangpha a hilhnak haw leihum khua le ngam hempoh le vanhaang nuai ah hi nu i bawlmi hi amah phawhngilh tuk ngawlnakin son leleng tukmi hi,” tin ti hi.
Judah In Jesuh Zuak Nuam (Mk 14:10-11; Lk 22:3-6)
14 Jesuh nungzuitu lak pen Judah Iskariot a tihmi haw cu thiampi upa tei lakah hawhin,
15 “Nangmu lakah Jesuh ka pia ahin ikaw na piak tuk uh?” tin dong hi. Amuh ten tangka sawm thum sialin, Judah cu pia haw hi.
16 Mah ni pepan Jesuh ap theihnak tukin Judah in hunpha khawihcang hi.
Kaltan Puai An Eihnak (Mk 14:12-21; Lk 22:7-13, 22-23; Jn 13:21-30)
17 Naman hel ngawl Cangho Puai masabel ni-in, nungzuitute cu Jesuh lakah hungin, “Ilai munah tuk him Kaltan Puai an eih khawmnak ka bawlsak tuk uh?” tin dong haw hi.
18 Jesuh in, “Khuapi sung a, mi pa khat pa i innah hawh unna, ‘Sazapa in; ka hun kim zo hi; ka nungzuitute tuah na innah Kaltan Puai mang tuk ung hi,’ tin ti un,” ti hi.
19 Jesuh i hilhnak bangin a nungzuitu ten Kaltan Puai takeih cu tuangtim haw hi.
20 Taklam ten Jesuh le a nungzuitute cu an ei tukin khungkhawm haw hi.
21 Takeih a eih lih haw laihtakin Jesuh in, “Thungai in hilh ing; nangmu lak pen pa khatin keimah zuak tuk uh ci,” ti hi.
22 Nungzuitute cu thasiazet haw in, pa khat nung pa khatin, “Topa, keimah ing maw?” tin dong tek haw hi.
23 Jesuh in, “Keimah tuah kuang pa khat sungah cangho a sawktu in keimah zuak tuk hi.
24 Lai Thiangtho in, a hilh hamsa bangin, Mihing Capa cu thi tuk naven Mihing Capa a zuaktu pa i ca in itih zahin lauhuai him? Mahmi pa cu a nu i pum sung pen tul ngawl sawta ahin pha saw tuk naven!” tin ti hi.
25 Mi zuaktu Judah in, “Sazapa, na tih nuammi cu keimah ing maw?” tin dong hi. Jesuh in, “Na tihnak bangin hi ci,” ti hi.
Topa i Takeih (Mk 14:22-26; Lk 22:14-20; 1Kor 11:23-25)
26 An a eih haw laih takin Jesuh in cangho cu la in, lungdam thu a hilh celh ten bothemin, a nungzuitu tei lakah pia hi. “La unna, ei un; hihi ka taksa hi,” ti hi.
27 Mah nungten khuat cu la in, Pathian nelah lungdam thu a hilh ceng ten amu lakah pia hi. “Na venghawng uhin, in un;
28 Hihi ka thisan hi a, Pathian i thutepnak a khotiktu le mi tampi tei sual ngaihthiamnak tukin a luang tulmi ka thisan hi.
29 Thungai in hilh ing; ka Pa i Uknak sungah nangmuh tuah sabit thak ka inleh laklawh cu hi sabit inleh tukma toh ing,” ti hi.
30 Mahten lasa in Olif Mualah hawh haw hi.
Peter i Nialnak Tuk Hilhham (Mk 14:27-31; Lk 22:31-34; Jn 13:36-38)
31 Jesuh in, “Tuzan loli ah na venghawng uhin keimah taisan khawng tuk uh ci; itahim titale Lai Thiangtho in, ‘Pathian tuucingpa cu that tung a, tuuhonte cu taikeh haw tuk hi,’ tin ti hi.
32 Mahnaven thihnak pen thawhlehtik ka hih hun ten nangmu masuan Galilee ah hawh tung,” tin ti hi.
33 Jesuh nelah Peter in, “Midang ten a taisan khawng haw hei in, kei in taisan tuk mang,” ti hi.
34 Jesuh in Peter lakah, “Thungai in hilh ing; tuzan ak a khuang laih ngawlin, ‘Amah cu thei awng mang hi,’ tin vei thum tian nial tuk ci,” ti hi.
35 Peter in, “Nangmah tuah thi langkhat tuk ka hi vangin nial viang tuk mang,” ti hi. Nungzuitu dangte vangin mahtih bangin ti tek haw hi.
Gethsemane Huanah Jesuh Thungen (Mk 14:32-42; Lk 22:39-46)
36 Jesuh cu a nungzuitute tuah Gethsemane a tihmi haw huanah hawhin, “Hilai ah khin thu ka nget sungin hilai ah na khung un,” ti hi.
37 Peter le Zebedi capa pa nihte hawhpihin, a thasia in, a lungkhamzet hi.
38 Mahten amu lakah, “Ka lungmu hi thasiatnak tuah dim leita in, a tamkeh tuk bangin um hi. Hilai ah um unna, hihbu ngawlin ngak un,” ti hi.
39 A khawla deuhah hawh a, lei ah bokin, “Ka pa a cangthei tuk bang ahi tale hi thuaknak khuathai pen luattikin hi! Mahnaven keima deihnak bang hi ngawlin, nangma deihnak bangin hi saw tahen,” tin thungen hi.
40 A nungzuitu pa thum tei lakah a kihleh ten a pa thum haw in, a hihbuh haw amuh ten Peter lakah, “Itin kaw hihbu ngawlin nazi pa khatno lawlawm ngak thei ma uh cim?
41 Sualsohnak sungah cak kha tuk ngawlin hihbu ngawlin thungen un hi. Lungmu in nuam em naven taksa cu a thanem hi?” tin ti hi.
42 Jesuh cu thungen hawh lehleu hi. “Ka pa hi thuaknak khuat pen luat theih ngawlin ka in, a kul tale nangma deihnak bangin hi tahen,” ti hi.
43 Nungzuitu pa thum tei lakah a kikleh ten hihbu leleu leng haw; a mit hei hak zo haw ma hi.
44 A hawhsanleh nungten a nget bang lengin, a vei thumnak thungen hi.
45 A nungzuitu pa thum tei lakah kiklehin, “Hihbu in cawl leng laih uh cim? Zo un! Mihing Capa cu misual tei khut sungah a hentiknak haw hun heng zo hi.
46 Tho unna, hawh tuk hung. Zo un, keimah zuaktu pa cu hi laihah heng zo hi,” ti hi.
Jesuh A Matnak Haw (Mk 14:43-50; Lk 24:47-53; Jn 18:3-12)
47 Jesuh cu a otlih laihtakin, nungzuitu sawm le pa nih sungah a telbokmi Judah cu heng hi. Thiampi upate le Judah upa dang tei hahmi mihonpi cu ngalnam le tembeek tuah heng haw hi.
48 Mi zuaktu pa in mipi tei lakah theihtupnak tuk hilhhamsa in, “Ka nap mipa cu na mat nuam uhmi pa hi tuk hi,” ti hi.
49 Judah in Jesuh cu zuan nawnawmin, “Sazapa, na humah lemdaihnak um tahen,” tin ti thahin nam hi.
50 Jesuh in, “Ngualcampa na tuptahmi cu bawl nawm saw in,” ti hi. Mahten heng haw in, Jesuh cu a mat ceng haw ten khim zetin khih haw hi.
51 Jesuh tuah a ummi lak pen pa khat pa in, a naam dawkin, Thiampi Sang i umlawhpa i beng cu satvawk hi.
52 Jesuh in, “Na naam cu a kawng sungah thiat lehin hi. Naam a mangtu cu naam lengin thileh bok tuk hi.
53 Ka Pa i lakah bopnak ka ngen tale thakhatin vancungmi ngalkap hona sawm le hon nih hah thei tih thei ma uh cim?
54 Mahnaven mahti bang ahi tale Lai Thiangtho in hi tuk hi tin, a hilhsa mi cu itin kaw a kim theih tuk?” tin ti hi.
55 Jesuh in mihonpi tei lakah, “Kei hi nguca hi ing maw, ngalnam le tembeek tuah man tukin na hun lih uh? Nisial Biakinn ah khungin, thu ka zilh lih laih khin kuamah in man ma si uh si.
56 Mahnaven profet tei Lai Thiangtho sungah a ngatmi haw a kim theihnak tukin hitih bangin bawl hi uh ci,” ti hi. A nungzuitu ten Jesuh cu zamsanin, taisan khawng hawta hi.
Jesuh, Khonsil Tei Mai Ah (Mk 14:53-65; Lk 22:54-55, 63-71; Jn 18:13-14, 19-24)
57 A mantu ten Jesuh cu Thiampi Sang Kaiafas innah hawhpih haw a, mahlaiah Daan zilhtu le Judah upate cu tawkdun khawm haw hi.
58 Peter in, a khawla thim pen zui in Thiampi Sang inntual tian zui hi. Inntualah tumin itih bangin thute piang tuk him tih thei nuamin, ngalviltu tei lakah khung hi.
59 Thiampi upate le Khonsil upa ten Jesuh cu a thah theihnak haw tukin a venghawng haw in sual zei haw hi.
60 Zolthu bawlcawmin, a sual zeitu tampi tul haw naven a sualnak mu thei cuang haw ma hi. A tawpnak ten mi pa nih tulin,
61 “Hi pa in, ‘Pathian Biakinn hi phelet tung a, ni thum sungin saleh thei tung,’ tin ti haw hi.”
62 Thiampi Sang cu dingto in Jesuh cu, “Hitih bangin sual a not haw hi a donnak thei ma cim?” tin dong hi.
63 Mahnaven Jesuh cu mengleng hi. Thiampi Sang in awn lehleu in, “A nungmi Pathian min salin, thukamin hilhin hi. Pathian Capa Khrih hi maw hi ma nge cim hilh hemin,” ti hi.
64 Jesuh in, “Nangma sonnak bangin hi! Mahnaven nangmah hilh khawng tung hi: tu pepan Mihing Capa cu Cungnungbel i taklamah khungin, mu tuk uh ci, vancung meingo hum pen a hunleh tuk vang mu tuk uh ci,” ti hi.
65 Mahbek le Thiampi Sang in, a puan cu botkekin, “Mahmi cu Pathian nautat hi, thu theihpihtu a dang kul lehma toh hung. Pathian a nautat dan cu atu za zo uh ci.
66 Itin ngaisung kam uh ci?” tin dong hi. Amuh ten, “Sual hi thah tuk hi,” tin ti haw hi.
67 Mahten a mai ah cilsiakin beng haw hi. Mahten,
68 “Nang Khrih aw, profette bangin hilh vele! Akua him a bengtu” tin ti haw hi.
Peter In Jesuh Nial (Mk 14:66-72; Lk 22:56-62; Jn 18:15-18, 25-27)
69 Peter cu pualam inntualah a khun ten thiampi inn a, umlawh numei pa khat hungin, “Nang vang hi Galilee mi Jesuh tuah a phialdun mi pa ci,” tin ti hi.
70 Mahnaven Peter in mipi mai pen, “Na otmi cu i thu him tih thei kha mang hi,” tin nial den hi.
71 Mahten Peter cu kongka lamah hawh hi. Umlawh numei a dangin mu in, “Hi pa hi Nazareth mi Jesuh tuah a ummi pa hi,” tin mahlai ah a ummi pano tei lakah hilh hi.
72 Peter in nial leleu in, “Thusia tiamin hilh ing hi: mahpa cu ka theihmi hi kha ma hi,” tin ti leleu hi.
73 Mahnungno ten mahlai ah a dingmi ten Peter cu, “Nial toh pahsun, na awn kam pen lang hi,” tin ti haw hi.
74 Mahten Peter in, “Thusia tiamin thutak hilh ing. Thu man ngawl ka hilh ahi tale Pathian in dantat hen! Hi pa khi thei kha hihim mang,” ti hi. Mahceng bek ten ak khuangin,
75 Peter in Jesuh i hilh hamsa bangin, “Ak a khuan laih ngawlin thei kha mang tin vei thum tian nial tuk ci,” a ti