Pilat Lakah Jesuh Hawhpih Haw (Mk 15:1; Lk 23:1-2; Jn 18:28-32)
1 Zingtungno in thiampi upa hempoh le Judah upa ten Jesuh cu thah tukin soncat haw hi.
2 Thikkhau in, a khih nung haw ten Rom acozah bawi ngamuktu Pilat khut sungah pia haw hi.
Judah i Thihnak (Nung 1:18-19)
3 Mizuaktu Judah in Jesuh cu a thusoncat zo haw toh tih thu a theih ten sikleh zetin tangka sawm thum cu thiampi upa le Judah upa tei lakah sanleh hi.
4 “Sualnak nei ngawlpa cu thihnak tian heng tukin ka zuak hangin sual leita ing,” ti hi. Amuh ten, “Kohte tuah imah kaikuahdun kha lehma toh ung? Na deihnak bangin bawlta vele,” tin ti zam haw hi.
5 Judah in tangka sawm thum cu Biakinn sungah vawktumin tul hi. Mahten hawh tul vawkin amah le mah ngui awkin thi hi.
6 Thiampi upa ten mah tangka cu khulin, “Hi tangka hi thisan tangka a hih hangin Biakinn tangka koihnakah koih tukin, a Daan uhin phal ma hi,” tin ti haw hi.
7 A thu cu sonkhawm haw in, zapi lungkimnak tuah mah tangka cu beel bawlpa i lo leinakin mang haw a, mah lo ngam cu ngamdang mite vuinak khanmualin mang haw hi.
8 Mah lo ngam cu tuni tianin “Thisan Lo,” tin sam haw laih hi.
9 Mahten profet Jeremiah i sonhamnak bangin kim hi. Profet Jeremiah in, “Israel miten mahpa leinak tuk lungkimin, a soncat haw mi tangka sawm thum cu la haw a,
10 Topa i thupiaknak bangin beel bawlpa i lo leinakin mang haw,” ti hi.
Pilat In Jesuh Thudong (Mk 15:2-5; Lk 23:3-5; Jn 18:33-38)
11 Jesuh cu Rom acozah ngamuktu bawi pa i mai ah dingin, ngamuktu bawipa in, “Judah mitei kumpipa hi a cim maw?” tin dong hi. Jesuh in, “Na tihnak bangin hi ing,” tin don hi.
12 Mahnaven thiampi upa le Judah upa dang tei a sualnot haw mi cu imah donleh ma hi.
13 Mah hangin Pilat in, “Sual a not haw mi hempoh hi thei ma cim?” tin ti hi.
14 Mahnaven Jesuh in kam khatno hei don nuam ngawl hangin ngamuktu bawipa cu amthong hi.
Jesuh Cu Thah Tukin Soncat Haw (Mk 15:6-15; Lk 23:13-25; Jn 18:39-19:16)
15 Kaltan Puai sial ten ngamuktu bawi in, mipi ten suah hen tin, a ngetmi haw thawngta pa khat suahmek hi.
16 Mahlai takin akua nabang i theihmi thawngta pa khat umin, a min cu Barabbas hi.
17 Mipite a tawhdun khawm haw ten ngamuktu bawi Pilat in akua kaw ka hah tuk? Barabbas maw. “Khrih tihmi Jesuh saw kaw?” tin dong hi.
18 Judah upa tei iksiknak hangin Jesuh cu a khut sungah hen haw tih thu Pilat in ciang zetin thei hi.
19 Pilat cu thukhennak innpi sungah a khun laihtakin, a zi in, “Sualnak nei ngawl pa i humah imah bawl pahsun. Itahim titale zantak ka mangah amah hangin thuaknak tampi tawk ing hi,” tin thucah hi.
20 Thiampi upa le a dang upa ten mipite so in, mipi ten Barabbas saw hahin, Jesuh cu thah tukin Pilat lakah ngen haw hi.
21 Mahnaven Pilat in, “Hi mi pa nihte hi akua saw ka hah an awi uh cim?” tin mipite dong lehleu hi. Mipi ten, “Barabbas,” tin don haw hi.
22 “Mahti bang ahi tale Khrih tihmi Jesuh hi itin bawl kam nang?” tin Pilat in dong hi. “Thinglamteh humah thatin hi,” tin don khawng haw hi.
23 Mahnaven Pilat in, “I sualnak kaw a bawl!” ti hi. Mahten, “Thinglamteh humah khenin hi,” tin au theihzahin au haw hi.
24 Pilat in mahtih bang a dotlih cu nemcuamnak um ngawlin mipi ten buainak lehlam piang pangtik haw kawn tih amuh hangin tui la vutin, mipi mai pen a khutsomin, “Sualnak nei ngawl pa i thisanah kei tel kha mang hi! Nangmu bawlmi hi,” tin ti hi.
25 Mihonpi ten, “Hi pa i thisan cu keimuh le ka casuan tei humah heng tahen,” tin don haw hi.
26 Mahten Pilat in amu ca in Barabbas cu hahin; Jesuh cu a vah demtik ceng ten thinglamtehah thah tukin a khut hawah pia hi.
Ngalkap Ten Jesuh Zawnsak Haw (Mk 15:16-20; Jn 19:2-3)
27 Pilat i ngalkap ten Jesuh cu ngamuktu bawipa i innah hawhpih haw in, mipite cu a elah khawm haw hi.
28 A puante cu duhsakin puansan silhtik haw hi.
29 Mahten ling tuah bawlmi lukhu cu a lu ah khutikin; a taklam khutah ngolh cawitik haw hi. A mai ah khukdinin zotsaknak tuah “Judah Kumpipa a nunkhua sau tahen,” tin ti haw hi.
30 Cilsiakin, ngolhte la in, a lu pen vat haw hi.
31 Mahtin a zotsak celh haw ten a puan cu duukin, ama puan leng silh lehtik ceng ten thinglamteh humah thah tukin hawhpih haw hi.
Thinglamteh Humah Jesuh Khen Haw (Mk 15:21-32; Lk 23:26-43; Jn 19:17-27)
32 Mahtin a hawhlih haw laihin, Sairin khua mi Simon cu tawk haw a, ngalkap ten Jesuh i thinglamteh puatik lo haw hi.
33 Golgotha tihmi munah heng haw hi. Golgotha tih cu, “Lu-nguh mun,” tihnak hi.
34 Mahlai ah sabittui le tui khazet noihmi pia haw a, tep naven, in nuam ma hi.
35 Thinglamteh humah Jesuh khetceng haw ten, a puan cu awngbali sawkin sem haw hi. 36 Mahnung ten khungin, cing haw hi.
37 Sual a notnak haw nganin, a lu humah tak haw hi. “Hi pa hi Judah Kumpi Jesuh hi,” tin ngan haw hi.
38 Mahten mipha ngawl damiah pa nihte cu Jesuh tuah thinglamteh humah pa khat cu a taklamah le a dang pa khat cu a veilamah khen bok haw hi.
39 A el a, suk le to ah a hawhtute hei in ancim phace ti thahin, a lu haw sat ngaw ngok haw a,
40 “Biakinn pi pheletin ni thum sung saleh thei tung tita sisi! Pathian Capa na hi tale nangmah le nangmah pan inna, thinglamteh hum pen tolh vele!” tin zawnsak haw hi.
41 Mahti bangin thiampi upate, Daan zilhtu le Judah upa ten zawnsakin,
42 “Midangte cu pan thei naven amah le mah cu pandun thei ma! Israel kumpipa hi ma maw? tu loli in thinglamteh hum pen a tolh tale sang tuk ung hi!
43 Pathian muangin, Pathian Capa ing tita ngam! Pathian in luan maw tih zo hih pah nung?” tin nautat zetin ti haw hi.
44 Amah tuah a khetcih haw damiahte hei in, mahtih bangin nautat bok haw hi.
Jesuh Thihnak (Mk 15:33-41; Lk 23:44-49; Jn 19:28-30)
45 Sunlaih tak nazi sawm le pa nih pen pan taklam nazi pa thum sung cu ngam hempoh ah thimzing tung hi.
46 Taklam nazi pa thum ten Jesuh cu ngingzet au in, “Eli, Eli, lema, sabakthani?” tin au hi, a sullam cu, “Ka Pathian, Ka Pathian, ita kei taisan cim?” tihnak hi.
47 Mahlai ah a dingmi khenkhat ten a zak haw ten, “Elijah sam hi,” tin ti haw hi.
48 Amu lak pen pa khat pa cu tai vingvengin tui a hup thei zetmi puan la in, sabittui sungah a nip ceng ten ngolh humah kencihin Jesuh cu intik awn hi.
49 Mahnaven midang ten, “Um hih hemin, amah pan tukin Elijah hung maw hung ma hum tih zo hih nung,” tin ti haw hi.
50 Jesuh cu nase zetin au lehin catsukta hi.
51 Mahten Biakinn puanzak cu a lulam pen a nuailam tian khen nihin balsuk hi. Leihum hempoh ah hiinhing khawngin, suangpi keh khawng hi.
52 Khante hongin, a thisa Pathian i mi thiangte tholeh haw hi.
53 Jesuh cu khansung pen a thawhleh nungten a khan haw pen tulin khua Thiangtho sungah tumin mi tampi tei mai ah lang haw hi.
54 Ngalbawipa pa khat le Jesuh cingtu ngalkap ten hiinhing le thildang a piangmi hempoh amuh haw ten thinsu in, “Hi pa hi Pathian Capa tatak hi,” tin ti haw hi.
55 Galilee ngam pen Jesuh a zuitu le a bawm li mektu numei tampi um haw in, a khawla thim pen cuan haw hi.
56 Mah numei tei lakah Mary Magdalin, James le Josef tei nu Mary le Zebedi i zi vang tel bok hi.
Jesuh Vuinak (Mk 15:42-47; Lk 23:50-56; Jn 19:38-42)
57 Taklam toh ten Arimathea khua pen mihaupa pa khat heng hi. A min cu Josef hi a, Jesuh i nungzuitu pa khat hi bok hi.
58 Pilat a tawh ten Jesuh i luang cu ngen hi. Jesuh i luang cu Josef lakah piak tukin Pilat in thupia hi.
59 Josef in Jesuh i luang cu la in, puan thak ngo nemno tuah tuam ceng ten,
60 ama khan tukin suangkua a cawhmi khan thak sungah vui hi.
61 Mahceng ten suang peekpi tuah khan cu khakin, pinsanta hi. Mary Magdalin le a dang Mary cu mahlai ah khan lam hekin khung haw hi. Khaan Cingtute
62 A zing, Sabbath ni-in thiampi upa le Farasi ten Pilat cu tawkin,
63 “Bawipa, hih zolthu sontu pa in, a nunlaihin, ‘Ni thum nungten tholeh tung,’ tita hi.
64 Mah hangin ni thum ni tian phano in cingtikin hi; mah ahimata a nungzuitu ten a luang ngu in, mipi tei lakah thihnak pen tholeh zo hi, tin zol haw tuk hi. Hih dawlta zolnak cu a masa zolnak sangin nase saw tuk hi,” tin ti haw hi.
65 Pilat in, “A cingtu Rom ngalkapte koih unna, khan cu a him thei tawkin cing un,” tin thupia hi.
66 Mah hangin hawh haw in, khan cu a him theitawpin cing haw hi; khan khahnak suang peekpi khi tacik khenin, a pualam pen phano in cingtik haw hi.