To listen that verse in audio click to Ngawn..
Jesuh Thawhlehnak (Mk 16:1-10; Lk 24:1-12; Jn 20:1-10)
1 Sabbath ceng Nipi ni, zingtungno in, Mary Magdalin le a dang Mary cu khan zo tukin hawh haw hi.
2 Thakhatin nase zetin hiinhing hi. Topa i vancungmi pa khat cu vanhum pen tolhsukin, khan kong khahnak suang peekpi cu nawmvawkin, a humah khung hi.
3 A mel cu khuaphelep bang hi in, a puante cu vuk bangin ngo hi.
4 Khan cingtute cu a lau leita in, cantawtokin mithi bangin haw hi.
5 Vancungmi in numei tei lakah, “Lau pahsuh un; Thinglamteh humah a thah haw, Jesuh zei uh ci tih thei ing.
6 Hilai ah umleh ma toh hi, a hilh hamsa bangin thihnak pen thawhlehtik hi zo hi. A vuinak mun zo un hi.
7 Manlangin hawh unna, a nungzuitu tei lakah, ‘Thihnak pen tholeh zo hi, nangmu masuan Galilee ah hawh tuk a, mahlai ah mu tuk uh ci!’ tin hilhta un. Ka hilhmi hi phawkngil pahsuh un,” ti hi.
8 Mah hangin manlang zetin khan pen pin haw a, lau thah sih, lungdam thahsihin nungzuitute a hilh tukin tai haw hi.
9 Ngaihsut ngawlpi in, Jesuh cu tawk haw in, “Na lak uhah lemdaihnak um tahen,” ti hi. Amah cu zuanin, a ke pen a pom celh haw ten bia haw hi.
10 Jesuh in amu lakah, “Lau pahsuh un, ka unaute khi Galilee ah hawh tukin hilh unna, mahlai ah keimah tawk tuk uh ci!” tin ti hi. Khancingtu Tei Thuthatnak
11 Numeite a hawh lih haw laih takin, khancingtu ngalkap khenkhat cu khuapi sungah hawh haw a, thiampi tei lakah thil a piangmi hempoh hilh khawng haw hi.
12 Thiampi upa le Judah mi upate tawkdun khawmin, thu ngaisung khawm haw hi. Ngalkapte nawhthuh tangka tampi pia in,
13 zanlaih tak ka hihbuhlan uhin, a nungzuitute hung haw in, a luang ngu haw hi, tin ti un hi.
14 Mahmi cu ngamuktu bawi in, a thei vangin na lau tuk uh imah umma poh hi. Sualnak nei haw ma hi tin keimuh in hilhsak tuk poh ung,” tin ti haw hi.
15 Khancingtu ngalkap ten tangka cu la haw in, amu hilhnak bangin bawl haw hi. Mah thu cu Judah miten tuni tianin son li haw laih hi.
Jesuh Cu Nungzuitu Tei Lakah Lang (Mk 16:14-18; Lk 24:36-49; Jn 20:19-23; Nung 1:6-8)
16 Nungzuitu sawm le pa khatte cu Jesuh i hilh bangin Galilee mual humah hawh haw hi.
17 Amah cu mu in, bia haw naven a khenkhat ten sang haw ma hi.
18 Jesuh in amu lakah zuanin, “Lei le Van i thuneihnak hempoh cu ka lakah piak hi khawng zo hi.
19 Mah hangin miphun hempoh tei lakah hawh unna, keima nungzuitute suaktikta un. Pa, Capa le Hawvang Thiangtho minin tuiphumnak pia un hi.
20 Ka thupiakmi hempoh zui tukin hilh unna, hun tawp ni tian nohtei lakah um leleng tung,” ti hi.