To listen this verse in audio in Ngawn...
1 “Biaknak lam pen thilpha na bawl uhmi cu miten mu haw nahen tin mi zapi mai ah bawl tuk ngawlin ngalling un. Mahti bangin na bawl uh tale vancung a um na Pa uh i lak pen thaman ngah tukma uh ci.
2 “Mah hangin mi tingsam tei lakah thil pa kha khat na piak uhten mi ultung tei biakpiaknak mun le zapi mai a, a bawl haw bangin tuangkhawng pahsuh un. Amuhte cu mipi tei pah tukin bawl haw hi. Thungai in hilh ing, a ngah haw tukmi ngah khawng zo haw hi.
3 Mahnaven nohten mi tingsamte na bawm uh tale na ngualcam phabelte hei i theih tuk ngawlin bawl un hi.
4 Nangmuh pa khat bek i theihin bawl unna, na bawl uhmi a mutu na Pa uhin thaman pia tuk hi.
Thunget Zilhnak (Lk 11:2-4)
5 “Thu na nget uhten mi ultungte bangin ngen pahsuh un. Mi hempoh ten mu haw na hen tin biakpiaknak mun le mipi muhnak lampi ah dingin thungen nuamzet haw hi. Thungai in hilh ing, a ngah haw tukmi ngah khawng zo haw toh hi.
6 Mahnaven nohte cu thu na nget uhten nangmu inn khan sungno ah tum unna, kong na khah nung uhten na muh uh ngawlmi na Pa uh i lakah ngen un hi. Mahti bangin na bawl uhmi a mutu na Pa uhin thaman pia tuk hi.
7 “Thu na nget uhten Pathian thei ngawl tei sullam nei ngawl awnkam tampi mang pahsuh un. Amuh ten ngeipi thu a nget haw cu a pathian in thei cuang tukin ngaisung haw hi.
8 Amuhte bangin ngen pahsuh un. Na kul uhmi cu na nget laih ngawlin na Pa uhin thei ham khawng zo toh hi.
9 Mah hangin hi bangin thungen un:
Vanhum a um kohtei Pa;
Na min upatnak um tahen;
10 Na Uknak hengbel hen;
Vanhum a, na deihnak a kim bangin,
Leihumah kimtik bokin hi.
11 Nisial nunnak an pia in.
12 Midang sualnak ka zah uh bangin,
keimuh tei sualnak zah bokin.
13 Sualsohnakah tel tuk ngawlin,
siatnak lak pepanin.
Na uknak, thawm ngengnak
huham le sunloih upatnak cu
na humah catngawl
kho leleng tahen. Amen.
14 “Nangmu hum a sualnak a bawltu na ngaidam uh tale vancungah a ummi na Pa uhin nangmu sualnak ngaidam bok tuk hi.
15 Mahnaven midang sualnak na ngaidam uh ma tale na sualnak uh cu na Pa uhin ngaidam bok tukma hi.
An Cannak Thuzilhnak
16 “An na can uhten mi ultungte bangin thasiatnak mitmai tuah um pahsuh un. Mi khenkhat ten an a can haw khi midang ten mu haw nahen tin, a mitmai haw pen langtik haw hi. Thungai in hilh ing, a ngah haw tukmi ngah khawng zo haw hi.
17 Nohte cu an na can uhten na mai uh phiat unna, na sam uh phano in kiat un hi.
18 Mah hangin an na can lam uh miten thei haw tukma hi, mit a muh ngawlmi na Pa bek uhin thei tuk a, na bawl uhmi a mutu na Pa uhin thaman pia tuk hi.
Vancungah Khawl Un
(Lk 12:33-34)
19 “Salkai le nget i eih theihnak, nguca ten keuletin, a nguk theihnak haw, hi lei humah na sum le pai uhte khawl pahsuh un.
20 Salkai le nget i eih theih ngawl, nguca ten keuletin, a nguk theih haw ngawlnak vancungah na sum le pai khawl saw un hi.
21 Itahim titale na sum le pai umnakah na lungmu uh vang um bok tuk hi. Taksa Pumpi i Vaknak
(Lk 11:34-36)
22 Mit cu taksa pumpi ca in, mei inn bang hi. Na mit uh a vak tale na pumpicing uhin vak khawng tuk hi.
23 Mahnaven na mit uh a pha ma tale na pumpi uh cu thimnak sungah um tuk hi. Mahti bang a hih hangin nangmu sung a, khuavaknak cu thimnakin, a dim kha tale itihzah a lauhuaimi thimnak hi tuk him?
Pathian le Sumpai
(Lk 16:13; 12:22-31)
24 Mi pa khat cu bawi pa nih i sila hi thei tukma hi. Pa khat deih tuk a, pa khat cu hua tuk hi. Pa khat lakah muantak zetin um tuk a, pa khatlam cu zawnsak tuk hi. Pathian na le sumpai na dek kawm thei tukma uh ci.
25 Mahti bang a hih hangin hi bangin hilh ing. Na nunnak tukin a kulmi tui le an na pumpi ca in puansilh nikcen thu ah ngaisung le lungmu tamin um pahsuh un. Thungai titale nunnak cu an sangin thupi saw ma maw? A pumpi uh hi nikcen puansilh sangin thupi saw ma maw?
26 Van a leeng vanote khi zo un; amuh ten anci ciing haw ma hi; an hei cawm haw ma, an khawlnak tuk beem hei nei haw ma hi. Mahnaven vancung na Pa uhin cawm khawng hi. Vanote sangin sunglawi saw ma uh cim maw?
27 Na thinkhamnak uh hangin nunnak hun cu dawmno beek sautik thei uh cim? 28 “Mahten nikcen puansilh thu ah ita thinkham li uh cim? Hampalak a paakte zo un, nadek haw ma, pat hei kai ngawlin, thiam vang tak haw ma hi.
29 Mahnaven atu-in hilh ing, Kumpi Solomon hei in, hitihzah khin hau naven a hauhnak le a nikcen puan silhin hi pak tei mawinak hei bang zo ma laih hi.
30 Tuni poto in, zingten a paileh thong tukmi, mei sungah haal tukmi hampate hei a thuamtu cu Pathian hi. Mahte sangin nohte cu thuam saw tukma maw? Na upnak uh dawm leita lawlawm si maw!
31 “Mah hangin ‘Eih le intuk le nikcen puansilh ilai pen ngah kam nang,’ tih lungmutam nuam pahsuh un hi.
32 Hite hi cu thu umngawl lawki mitei helhkam lelengmi hi. Vancung a ummi na Pa uhin na kuldan uhmi cu thei leng hi.
33 Mah sangin Pathian Uknak le a dikcangnak zei masa saw unna, a dang hempoh cu piathuah tuk hi.
34 Mah hangin zingte ca in lungmutam nuam pahsuh un; zingte ca tuk a sammi nate cu zingten tihmi in amah le mah thinkham cawm tuk poh hi. Tuni a haksatnak cu tuni ca tukin phabek hi”.