(Mk 1:40-45; Lk 5:12-16)
1 Jesuh cu mualhum pen tolhsukin, mi tampi ten zui haw hi.
2 Mahten miphaakpa pa khat cu a lakah hungin a mai ah khukdinin, a kuun ceng ten, “Topa na nuam tale damtik thei ci,” ti hi.
3 Jesuh in, “Damtik nuam ing, tu pepan thiang tohin,” ti hi. Mah ceng bek ten thakhatin mahpa cu dam paih hi.
4 Jesuh in, “Ngai in! Hithu hi kuamah hilh pahsun; mahnaven thiampi lakah hawh vingveng inna, amah in zo hen. Na dam khawng zo thu mipi ten a theihnak haw tukin Moses i thupiaknak bangin biakpiaknak nei in,” ti hi.
Rom Ngalbawi Pa khat i Umlawh Damtik (Lk 7:1-10)
5 Jesuh cu Kapernaum khua a hen ten Rom ngal bawipa pa khatin tawkin bopnak ngen hi.
6 “Topa aw, ka umlawhpa nasezet na in, phia thei ngawlin innah zau leng thong,” tin hilh hi.
7 Jesuh in, “Hawh nang inna, damtik tung hi,” ti hi.
8 Ngalbawi pa in, “Topa aw,” nangmah loli ka inn tian na hennak tukin tak viang ma sing. Damnak tuk kam khatno thupia inna, dam tuk poh hi.
9 Santehnakin, keimah vang ka humlam tei ukmi bok ing a, ka khut nuai ah vang ngalkap um bok haw hi. Ka khutnuai a ngalkap pa kha khat cu ‘Hawhin;’ ka titale hawhin, ‘Hungin hi,’ ka titale hung hi; Ka umlawhpa vang cu, “Hihi bawlin ka tih ten bawl hi,” tin ti hi.
10 Mahmi cu Jesuh in, a zak ten lamdangsa zetin amah zuitu mipi tei lakah, “Thungai in hilh ing, Israel tei sung hei pen hi pa i upnak bang hi mu awng ma laih ing.
11 Thungai in hilh ing, nisuahnak le nitumnak lam pen mi tampi hungin vancung ngam puai an eihnakah Abraham, Isaak Jakob tuah khung langkhat haw tuk hi.
12 Mahnaven vancung ngam heng tukin mawi hi tin, a ngaihsutmi haw cu kahnak le hacang ngawinak mun khuathim sungah vawkin um haw tuk,” ti hi.
13 Jesuh cu ngal bawipa i lakah, “Innah pin inna, na upnak bangin bawlsak hi tuk ci” tin ti hi. Ngal bawipa i umlawhpa cu mah hun laihtakin dam bok hi.
Jesuh In Peter Sungnu Damtik (Mk 1:29-34; Lk 4:38-41)
14 Jesuh cu Peter i innah hawhin, mahlai ah Peter i sungnu nattunin zaunakah a zau leng cu mu hi.
15 Jesuh in, a khut pen a zen bek ten a nattun cu damin, mikhualte zindo thei paih hi.
16 Taklamin, khawhuai tei khalhsiatte cu Jesuh lakah hunpih haw hi. A awnkam khat bek tuah khawhuaite hawlvawkin, tinate damtik khawng hi.
17 Hitih bangin a dehnak cu profet Isaiah in, “Amah loli in, a natnak uh cu la in, a damngawlnak uhte cu amah in, pua in laksak khawng hi,” tin, a hilhmi a kimnak tukin hi.
Jesuh Nungzui Tukte (Lk 9:57-62)
18 Jesuh cu a el a, mipi amuh ten a nungzuitute cu tuinimpi mawk ngalkhat lamah hawh tukin thupia hi.
19 Daan zilhtu pa khat a lakah hungin, “Sazapa, na hawhnak mun hempoh ah nangmah zui tung,” ti hi.
20 Jesuh in, “Cingne ten kua nei in, vano ten bu nei haw naven Mihing Capa in lu ngaknak tuk hei nei ma,” ti hi.
21 A nungzuitu dang pa khatin Jesuh lakah, “Topa kikleh hih nang inna, ka pa vui hihta nang,” ti hi.
22 Jesuh in, “Keimah zui saw in hi, mithi cu mithi ten vui haw tahen,” tin don hi.
Jesuh In Huihpi Daitik (Mk 4:35-41; Lk 8:22-25)
23 Jesuh cu a nungzuitu ten zui in, hawmkuang sungah tum haw hi.
24 Ngaihsut khak ngawlpi in huihpi theu in, a hawmkuang haw cu tuicawkpi in, sepin, a vawk kawkawi hangin nim tukin um hi. Mahnaven Jesuh cu hihbu hi.
25 Nungzuitu ten phongin, “Topa,! keimuh nunpanin! “Thi awn toh si ung!” tin ti haw hi.
26 Jesuh in, “Ita lau li uh cim? Na upnak uh neu leita laih thong si,” ti hi. Mahten tho in, huihpi le tuicawkpi cu cawl tukin thupia hi, thakhatin tuicawkpi cu dai hi.
27 Mi hempoh ten lamdangsa in, “Hi pa hi iti bang mihing him? Huihpi le tuihualpi cawmin, a thu ngai haw si!” tin ti haw hi.
Jesuh In Khawhuai Khalhsiat Pa Nih Damtik (Mk 5:1-20; Lk 8:26-39)
28 Jesuh cu tuipi ngalkhat lam Gadara a tihmi ngamah hengin, mahlai a, khankua sung pen a tulmi mi pa nih ten tawk haw hi. Hi pa nihte cu khawhuai tei zelhmi haw hi. A lauhuai ngangai mi a hih haw hangin mah lampi cu kuamah in tawn ngam haw ma hi.
29 Thakhat au haw in, “Pathian Capa, kohtei lakah i bawl tuk nge cim? A hunkim laih ngawlin keimuh bawlsia tukin maw na hun,” tin ti haw hi.
30 Mahlai pen a khawlazet ngawlah an a ei limi vok hon khat um haw hi.
31 Khawhuai ten Jesuh lakah ngenin, “Na hawlvawk tuk ahi tale hilai a vok tei sungah khin tumtikin,” tin ngen haw hi.
32 Jesuh in, “Tumta un,” ti hi. Khawhuaite cu mahmi pa nih tei sung pen tulin vok tei sungah tum haw hi. Vokte cu mahlai liangkham pen dawksukin tuinim sungah cak khawng haw hi.
33 Vok khaltute cu khua sungah taitumin, mah thute le khawhuai zelhmi pa nih tei hum a, thil a piangmi cu cangkim zetin son haw hi.
34 Mah hangin khuasung mi hempoh cu Jesuh tawk tukin hawh haw in, amuh haw ten a ngam haw pen mundangah hawh tukin hehpih kun haw hi.
To listen this verse in audio in Ngawn...