To listen that verse in audio click to Ngawn..
Ke Zawng Pa Dam
31 Ni khatin, Peter le Johan cu thunget hun taklam nazi pa thum ten Biakinn ah hawh haw hi.
2 Kongka Mawi a tihmi hawah pianpih a, kezawng pa um leng hi. Nisial Biakinn ah a hawhtu tei lak pen tangka ngen tukin mah kongka mawi ah koih mek haw hi.
3 Peter le Johan tei tum khi amuh ten pa kha khat pia hem un, tin ngen hi.
4 A zoh cangcian haw ten Peter in, “Keimuh zo hemin!” tin ti hi.
5 I poh ngah nave nang maw tin muansannak tuah zo hi.
6 Mahten Peter in, “Sum piak tuk nei ma naveng ka neihmi cu pia ing hi, Nazareth khua mi Jesuh Khrih minin tho inna, hawhin,” ti hi.
7 Mahten a taklam khut pen lenin dokto hi. Thakhat thu in, a ke le ke mit cu khohleh hi.
8 A mahno dawkin, dingto a, hawhthei in, Peter le Johan tuah Biakinn sungah tum bok a, hawhkawi in, a dawkin Pathian thangphat hi.
9 Mahti bangin a hawh theih le Pathian a thangphat theih cu mipi ten mu haw hi.
10 Kongka Mawi a, sum ngenin, a um lelengtu tih a theih haw ten a hum a thil a piangmi hangin lamdangsa in, am bialbual haw hi.
Biakinn Sungah Peter Thuhilh
11 Mahpa cu Solomon maisap tihmi ah Peter le Johan tei lakah um leleng bok tih amuh haw ten mipi ten lamdangsa in, amu lakah zuan haw hi.
12 Peter in amuh ten amuh tei lakah, “Ka phunpih Israel mite, itakaw hi thu ah lamdangsa in, keimuh lehlam mitphelep ngawl na zoh leng uh? Hi pa i hawh theihnak hi keimu huham le deihdanin, a nung theitu ka hihnak uh i hangin a piangmi hengin maw na ngaihsut uh?
13 Abraham, Isaak le Jakob tei Pathian, a pu le pa tei Pathian in ama sunloihnak cu a Capa Jesuh lakah pia zo hi. Mahnaven noh ten amah cu thuneitu tei khut sungah pia uh ci. Pilat in hah tung hi tin thu a sonsami cawmin, Pilat i maicang loli pen el zo uh ci.
14 Jesuh cu mi thiangtho le miphazet hi naven noh ten kik uh ci; mah i humah Pilat lakah laithattu saw hah tukin ngen uh ci.
15 Noh ten nunnakah mi a puitu pa khi that uh ci, mahnaven Pathian in thihnak pen tholehtikin, keimuh hi mah a theihpihtu ung hi.
16 Hih Jesuh min i huham hangin kezawngpa in, ngilnak ngah thei hi. Na muh uhmi le na theih uhmi a min muannak hangin bawlmi hi. Na venghawng uhin na muh khawng uh bangin Jesuh muannakin hi pa cu damtik hi.
17 “Mah hangin ka u le naute, nangmuh le na hotu uhten Jesuh i humah na bawl uhmi hi na theih ngawl uh hang bawl uh ci tih cu thei ing.
18 Ni dang laih cawngin Pathian in, a tenmi Khrih cu haksatnak thuak tuk hi, tin profet tei sung pen phuang zo hi; mahmi cu atu-in kim hi.
19 Sikkik unna, Pathian nelah kikleh un hi. Mahti bang ahi tale na sualnak uh ngaidam tuk hi. Mahti bangin na ti uh tale,
20 Topa i lak pen hawvang ngilnak hun heng tuk a, nangmu ca a tensami Khrih cu nohtei lakah pia tuk hi.
21 Pathian in tanglaih a, profet thiangtho tei sung pen a sonsa bangin, ihempoh a thakin bawl hun a kim laklawh Jesuh cu vancungah um tuk hi.
22 Itahim titale Moses in, ‘Topa na Pathian uhin keimah a tiik bangin nangmu miphun ahi mi profet pa khatin nangmu lakah tiik tuk hi. Ama hilhmi hempoh cu na zui khawng uh kul hi.
23 Mah profet thu a zui nuam ngawltu cu Pathian i miphun sung pen hawlvawk hi tuk a, siatsuahnak tawk tuk hi,’ tin ti hi.
24 Thuthan tuk a neitu profet hempoh, profet Samuel le ama nung a hungmi profet hempoh hei in, atu a piangmi hi theitik khawng zo haw hi.
25 Profet tei sung pen Pathian i thutepmi cu nangmuh tei ca in hituk a, Pathian in, na pu le pa tei lakah a bawlmi thutepnak a co boktu hi uh ci. Pathian in Abraham lakah ‘Na casuan tei sung pen leihum a, mihing hempoh cu muicu thupha pia tung,’ ti hi.
26 Mah hangin Pathian in, akua hei hihen ngitlohnak pen kiklehin, thupha a piak theihnak tukin a masabelah a Salpa a tenmi cu nangmu lakah tiik,” ti hi.