To listen that verse in audio click to Ngawn..
Khonsil Mai Ah Peter le Johan Henpih
41 Peter le Johan cu mipi tei mai ah thu a hilh lih haw laihtakin thiampi khenkhatte le biakinn cingtu hotu bawite le Sadusi khenkhatte heng haw hi.
2 Jesuh i nungzuitu pa nih ten Jesuh cu thihnak pen tholeh hi tin mipi a hilh haw mi in, mithi nungleh haw tuk hi tih khi a theihciangtik hangin thinuk haw hi.
3 Mah hangin nungzuitu pa nihte cu man haw in, a khuanu toh hangin a zingtianin thawngah khia haw hi.
4 Mahnaven a thuhilh haw mi zain le a umtu tampi um haw hi, thu umtute cu khang sesemin thawng nga bang tingto haw hi.
5 A zingten Judah hotute le Daan zilhtute cu Jerusalem ah tawkdun khawm haw hi.
6 Mahlai ah Thiampi Sang Annas tawk haw; mahten Kaiafas, Johan, Alexander le Thiampi Sang i unaupihte tuah tawkdun khawm haw hi.
7 Nungzuitute cu amu mai ah dingtikin, “Hi thil piangmi hi itin kaw na bawl uh? Akua i huhamin kaw na bawl uh?” tin dong haw hi.
8 Peter cu Hawvang Thiangtho tuah dimin, amuh tei lakah, “Mipi hotu le upate
9 tuni in hi kezawngpa i damnak thu le a humah a piangmi thu dong na hi uh tale,
10 na theih tuk uhmi le Israel mi hempoh tei theih khawng tukmi ah nangmu mai ah a dingtu pa i damciangnak cu Nazareth mi, thinglamteh humah na thah uhmi le thihnak pen Pathian i thawhlehtikmi, Jesuh i huham hangin hi,” tin ti hi.
11 Jesuh i thu ah Lai Thiangtho in, ‘Inn satu tei vawkmi suang cu suang thupibelin cang zo,’ ti hi.
12 Ama sung bekah nunpatnak um hi; Pathian i piakmi nunpatnak sialngawl leihum hempoh ah min dang kuamah umma,” ti hi.
13 Khonsil upa ten Peter le Johan cu cihnak nei ngawl mi thawthong hi haw naven itih zahin ngalpha haw him tih amuh haw ten lamdangsa mahtak haw hi. Mahten amuhte cu Jesuh i ngualcam a hihlam theileh haw hi.
14 Mahnaven a damtik haw mipa cu Peter le Johan elah a din leleng hangin a ot theih hawnak tuk thu umma hi.
15 Mah hangin a thusonnak khan pen pualamah tultik haw in, amuh nguakcang khansungah thuson haw hi.
16 Pa khat le pa khat “Itin bawl kam nung? Kuamah i bawl theih ngawl tian bawl thei haw a, Jerusalem khuasung mi hempoh ten thei khawng zo a hih haw hangin kuamah i el theihmi kha lehma toh hi.
17 Mahnaven hi thu hi mipi tei lakah zalhkeh tuk ngawlin Jesuh minin kuamah i lakah thusonleh toh pahsuh un, tin ti nung,” tin son haw hi.
18 Mahten sam kikleh haw in, Jesuh i minin kuamah thuzilhleh toh pahsuh unna, kuamah i lakah thuson hihim tukma toh uh ci, tin cangcian zetin kham haw hi.
19 Mahnaven Peter le Johan ten, “Nangmu thu zui maw! Pathian i thu zui, i mi man saw hum? Nangmuh in khenkhuai saw un hi.
20 Itahim titale keimuh loli in, ka muh uhmi le ka zak uhmi cu phuang ngawlin um thei ma ung,” tin ti haw hi.
21 Mah hangin khonsil upa ten dantat takmi sualnak amuh haw ngawl hangin nase sesemin ngallinnak a piak celh haw ten hah haw hi. Mi hempohin amu lak pen a piangmi mu haw in, Pathian a thangphat haw hangin nungzuitu dantat tuk cu cangthei tukma hi tih khi mu haw hi.
22 Nalamdang, damnak bawlsak ahi mipa cu kum sawm li hum mi hi.
Ngalhannak Tuk Thungen
23 Peter le Johan cu a luat haw bek ten a ngualcam tei lakah kiklehin thiampi le upa tei thuhilhmi cu sonpih haw hi.
24 Mahmi cu thu umtu ten a zak haw ten munkhatno in, Pathian nelah thungenin, “Topa van le lei, tuipi le a sung a ummi hempoh Semsuahtu!
25 Na Hawvang Thiangtho mangin, na salpa David sung pen thuhilh ci a;
‘Itahim Gentail mite thinuk mahtakin, a um lih haw?
Itahim mihing ten a nemcuam tuk ngawlmi a vaihawm lih haw?
26 Topa le Khrih langpang tukin, leihum kumpite tuangtimin,
uktu bawite tuah munkhatah a tawhdun khawm haw,’ tin ti ci.
27 Itahim titale Herod le Pontius Pilat ten na tenmi na salpa Thiangtho Jesuh langpang tukin khuapi sungah Gentail mite le Israel mite tuah tawkdun khawm ngangai haw hi.
28 Na huham le na tuptahnakin, a hengleh tukmi na ngaihsutsa mi kimtik khawng tukin tawkdun khawm haw hi.
29 Topa, atu kohtei lakah lau haw hen tin thupnak a bawl lih haw mite hi nangmah in theihpih zal inna, na sal ten na thu cu ngalpha zetin ka hilh theihnak tukin bawm zazalin hi.
30 Damnak tukin na baan phalh inna, na sal Thiangtho Jesuh i minin nalamdang le thasiahhuai nate bawl theihnak tuk thupia zazalin hi,” tin thungen haw hi.
31 Thu a nget celh bek haw ten mah a tawhdun khawmnak haw inn cu hing a, Hawvang Thiangtho tuah dimin, Pathian i thu cu ngalpha zetin phuang haw hi.
Thu Umtute Neihmi Kawmdun
32 Thu umtute cu lungmu le ngaihsutnak luallemzetno in umlangkhat haw hi. Kuamah in, a neihmi thilte cu ka bulta hi, tin ti haw ma hi; a neih haw hempoh khi pa khat le pa khat mang kawmdun haw hi.
33 Topa Jesuh i thawhlehnak thu cu nungzuitu ten a nase zetmi huham tuah tettikhan haw a, Pathian in, a venghawng haw humah thupha muicu buak hi.
34 A pawl sung haw pen kuamah a tingsam peng um haw ma hi. Lo neitu le inn a neitu ten a lo, a inn haw cu zuakin, a ngahmi haw tangka cu,
35 nungzuitu tei khutah ap haw hi. Mah tangka cu a kulnak bangin sem pepel haw hi.
36 Mahti bangin Saipras tuikulh pen a suaktu Levi mi Josef in,
37 a lo zuakin a ngahmi tangka cu nungzuitu tei khutah ap hi. Josef cu nungzuitu ten Barnabas tin ti haw hi. Barnabas tih cu, “Thazaang pia thiamtu,” tihnak hi.