To listen that verse in audio click to Ngawn..
Ananias le Safira
51 Ananias a tih haw mi pa le a zi Safira ten a neihmi na zuakin,
2 a zi i lungkimnak tuah sum a khenkhat cu amu ca koihin, a khenkhat lam cu nungzuitu tei khutah pia haw hi.
3 Peter in, “Ananias, itakaw Satan in neh a, na thil zuaknak pen na ngahmi sum cu a khenkhat lam imin, Hawvang Thiangtho na zol?
4 Na van cu na zuak laih ngawlin nangmata hi; na zuak ceng hei ten na ngahmi tangka cu nangmata leleng hi. Mahnaven ita hi tih bangin bawl tukin na lungmu hihimin, na ngaihsut? Mihing zol ma vecin, Pathian zol ci,” ti hi.
5 Mah thu cu Ananias in, a zak bek ten lumin thi hi; mah thu a theitu hempoh ten lau in, thinsu linglawng khawng haw hi.
6 Tangvalte hungin, a luang a cun ceng haw ten pualamah puatulin vui haw hi.
7 Nazi pa thum nungten i cang him tih thei ngawlin a zi cu tum bok hi.
8 Peter in, “Hi sum hi na van zuak uhmi pen na ngah uhmi sum venghawng toh maw? Hilh hemin!” tin dong hi. Safira in, “Mah e, ka ngah uhmi a venghawng hi,” tin don hi.
9 Peter in, “Itakaw na pasal tuah na pa nih uhin, Topa i Hawvang zol tukin na lungkim ngel uh? Na pasal a phumtu tangvalte kongka bulah um haw laih hi; nangmah vang cu zawng tul bok haw tuk ven,” ti hi.
10 Thakhatin amah vang cu Peter i kebulah lumin, thi bok hi. Tangvalte cu tum haw a, thi zo tih amuh haw ten a pualamah zawng tulin, a pasal i khan elah vui bok haw hi.
11 Pawlpi le mah thu a zatu hempoh ten lau leita haw hi.
Nalamdang Tampi Bawlnak
12 Mipi tei lakah nungzuitu ten nalamdang tampi bawl haw hi. Umtu hempoh cu Solomon maisap a tihmi ah tawkdun khawm haw hi.
13 Amuh cu midang ten pahcawizet haw naven, a pualam mite kuamah tel ngam haw ma hi.
14 Mahnaven numei hihen, pano hihen Topa i thu a umtute cu tam sesemin amu lakah tum haw hi.
15 Nungzuitu tei thil bawlmi amuh haw ten tina tampi cu khua sung lampi ah zawngin, Peter i hawh ten pa nih, pa thum bek a limno pohin, a lip khak tukin tin zaunak le lawhdei phahin, sial pepel haw hi.
16 Mahten mi honpi cu Jerusalem khua el pen hungin, tina hihen, khawhuai tei khalhsiatmi hihen, zawng haw a dam khawng haw hi.
Nungzuitu Ten Bawlsiatnak Thuak
17 Thiampi Sang le a ngualcam hempoh le mahlai elkim a ummi Sadusi ten nungzuitute a iksik leita haw hangin thil pa kha khat bawltum haw hi.
18 Nungzuitute khi manin, mipi thawnginnah khia haw hi.
19 Mah zanin, Topa i vancungmi in kongkate cu hongin, nungzuitute a suahtul nungten amu lakah,
20 “Hawhta unna, Biakinn sungah dingin mipi tei lakah hi nun thaknak thu hi cangkim zetin hilh un,” ti hi.
21 A hilhnak bangin nungzuitu ten bawl haw a, zingtungno in Biakinn sungah thuzilh pan haw hi. Thiampi Sang le a ngualcam ten khonsil thusonnak thupizet nei tukin Judah mi upa hempoh samkhawm haw hi. Nungzuitute cu thawnginn pen amu mai ah pui tukin mi hah haw hi.
22 Mahnaven bawi upate cu thawnginn a hen haw ten thawnginn sungah nungzuitute cu muleh haw ngawl toh hangin kiklehin khawnselte hilh haw hi.
23 “Thawnginn ka hen uhten tawh komno in kalhleng hi, a cingtute vang kongka phano in cingleng haw naven thawnginn kong ka hon uhten a sungah kua mah um haw ma,” tin ti haw hi.
24 Mahmi cu thiampi upa le Biakinn cingtu bawi ten a zak haw ten lamdangsa in, nungzuitute hi i cang haw nantim tin ngaihsut hakin um li haw hi.
25 Mahten mi pa khat cu tumin, “Ngai hem un! Thawngah na khiak uhte khi Biakinn ah thuzilh li haw si,” ti tum hi.
26 Mah hangin Biakinn cingtu bawi le a khutnuai a mihingte cu hawh haw a, nungzuitute cu pui kikleh haw hi. Pui haw naven hung zazal un tin, pui lo ngam haw ma hi, itahim titale miten suang tuah sep haw kawn tih khi lau haw hi.
27 Nungzuitute cu tumpih haw in, khonsil mai ah dingtik haw a, Thiampi Sang in thudong hi.
28 “Hi pa i minin thuzilh toh pahsuh un tin nase zetin hilh zo si ung, thei kha ma uh cim, bangleng si uh ci. Na zilh uhmi thu cu Jerusalem dimtik zo uh ci, a thihnak thu ah vang keimuh nawn nuam uh ci,” ti hi.
29 Peter le a dang nungzuitu ten, “Mihing tei thu sangin Pathian i thu ngai saw tuk ung hi.
30 Nangmuh ten Jesuh cu thinglamteh humah that naven uhcin, a pu le pa tei Pathian in thihnak pen tholehtik zo hi.
31 Pathian in tholehtikin, Israel miten sualsihnak hun nei in, a sualnak haw ngaihdam a hihnak tukin Pathian in lampuitu le nunpantu tukin a taklamah khungtik zo hi.
32 Hi thil hempoh a theihpihtu tetti cu keimuh hi ung hi; keimuh bek hei hi ngawlin, Pathian in ama thu a zuitu tei lakah laksawngin, a piaksa mi Hawvang Thiangtho vang cu thu theihpihtu hi bok hi,” tin ti haw hi.
33 Mahtin a tih haw cu khonsil sungtel ten a zak haw ten thinuk mahtak haw in, nungzuitute cu that khawng nuam ngangai haw hi.
34 Mahnaven amu lak pen Farasi mi, a min Gamaliel, mi hempoh tei upatmi Daan zilhtu pa cu khonsil tei mai ah dingin, nungzuitute cu demlaihno sung a pualamah tul hihtik tukin thupia hi.
35 Mahten Khonsil upa tei lakah, “Ka phunpih Israel mite aw, hi tei hum a, thil na bawl uhmi ah ngalling un hi.
36 Nung laih khin, Theudas a tih haw mi pa in, keimah hi mi thawthong hi kha mang, tin ti in, mi za li laihin zui haw hi. Mahnaven amah cu that haw in, a zuitute cu vakkeh khawng haw a, mahten a nadehnak vang cu bo bok hi.
37 Mah nungten mipumsial laihin Galilee mi Judah tul lehleu in, mi tampi ten zui dudut haw hi; mahnaven thah hi bokin, a zuitute cu vakkeh khawng lehleu bok haw hi.
38 Tu a thu ah vangin ciang zetin hilh ing hi, hi tei humah i mamah bawl pahsuh un. Zamdenta poh un! A tuptah haw mi le a bawlmi haw hi mihing tei tuptahnak thongmi ahi tale pha thongleh tuk poh hi.
39 Mahnaven Pathian bawlmi ahi tale neh thei cuang tukma uh ci. Pathian lehlam dodaltu in cang tuk ve uhcin,” ti hi. Mah hangin khonsil upa ten Gamaliel i ngaihsutnak piakmi cu zui haw hi.
40 Nungzuitute samleh haw a, vatnekin, Jesuh min tuah thusonleh tuk ngawltohin thu a piak nung haw ten hah haw hi.
41 Nungzuitute cu khonsil upa tei lak pen a tul haw ten lungdamzet haw hi; Itahim titale Jesuh min hangin minsiatnak thuak tukin Pathian i teksa hi tin ngaisung haw a hih hangin lungdam mahtak haw hi.
42 Mahten a nisialin Khrih i Thuthangpha cu Biakinn ah hihen innah hihen tawp ngawl zilhin, phuang pepel haw hi.