To listen that verse in audio click to Ngawn..
NUNGZUITU
Tei Nadehnak
(The Acts of the Apostles) 1
1 Ka ihmi Theofilas aw:
Ka laibu masa sungah Jesuh i nadeh a pat pepan vancungah laktoh a hih ni tian,
2 a na bawlmi hempoh le a thuzilhmi hempoh cangkim zetin ngan ing. Vancungah laktoh a hih laih ngawlin a tenmi a nungzuitute cu Hawvang Thiangtho huham tuah thuphano in, a zilh celh ten vanah laktohin umta hi.
3 A thih nungten ni sawm li sung amu lakah vei tampi langin nungleh zo hi tih kuamah i el theih hihim tuk ngawlin phun tampi in langtik hi.
4 Amuh ten amah cu mitcang loli tuah mu haw in, Pathian Uknak thu cu amu lakah hilh hi. Mahten munkhatah a tawhdun khawm haw laihin, amu lakah hi bangin thupia hi; “Jerusalem pen imah lai ah hawh pahsuh un. Ka pa in laksawng pia tuk hi tin ka sonsa mi saw khi ngak un hi.
5 Johan in tui tuah tuiphumnak pia hi; mahnaven a ngei ngawlin Hawvang Thiangtho tuah dimtikmi hi tuk uh ci” tin ti hi.
6 Nungzuite cu Jesuh tuah a tawhdun haw ten, “Topa, atu-in Israel tei lakah Uknak cu pialeh ni cim?” tin dong haw hi.
7 Jesuh in amu lakah “Mah hun tuk i ni le ha cu ka pa i thu hi, nohtei theih kulmi kha ma hi.
8 Mahnaven nangmu lakah Hawvang Thiangtho a hen ten ngilnak huham tuah dim tuk uh ci, mahten Jerusalem khua, Judah ngam, Samaria ngam hempoh le leihum khua hempoh ah keima tetti hi tuk uh ci,” ti hi.
9 Mahtin a hilh celh ten Jesuh cu amuh cilcel haw in vanah laktohin umta a, meingo in, limin, muleh thei haw ma toh hi.
10 Mahtin a kai tohnak vanlam a zoh lih haw laihtakin puan ngo silhin, mi pa nih cu thakhatin, a elah ding haw in,
11 “Galilee mite aw, itahim vanlam cuanin, na din diamduam leng uh? Nangmu lak pen vanah a kai mi Jesuh cu van a kai toh laih na muh uh bangkekin hungsukleh tuk hi,” tin ti haw hi.
Judah Ai-awhtu Tennak (Mt 27:3-10)
12 Jesuh i nungzuitute cu Olif Mual pen peng lang hawng khawla mi Jerusalem ah kikleh haw hi.
13 Khuapi sungah hawh haw a, amu umnak khanah tum haw hi. Peter, Johan, James le Andru, Filip le Thomas, Bartholomew le Matthai, Alfias capa James, nampantu Simon le James i capa Judah na hi haw hi.
14 Munkhatah thungen khawm tukin tawkdun khawm mek haw in, numeite, Jesuh i nu Mary le Jesuh i nau vang tel bok haw hi.
15 Ni dawmlaih ngei nungten thu umtute cu tawkdun khawmin, mihing za le sawm nih bang kim haw hi. Peter cu dingto in,
16 “U le naute, Hawvang Thiangtho in David muk le kam mangin a sonsa mi, Jesuh that tukin a lamhuaitu Judah i thu cu Lai Thiangtho sungah a ngat haw bangin a kim kul hi.
17 Judah cu eimu nadehnakah telbok tukin tenmi a hih hangin eimu sungah sungtel bok na hi,” tin ti hi.
18 Judah cu thil sual a bawlmanin, a ngahmi sum tuah lo pa khat lei a, mah lo sungah bahin, thi hi; A pum kehin, a sungngil hempoh tul khawng hi.
19 Mah thu cu Jerusalem ah a ummi hempoh ten zain, amu awnin mah lo cu Akeldama tin sam haw hi; a sullam cu “Thisan lo” tihnak hi.
20 Peter in, “Itahim titale Saam laibu sungah, ‘A inn cu thacang henna, a sungah kuamah um haw ma hen,’ tin ngatsami um hi. Mahten mundangah, ‘Midang ten a nadeh cu la haw hen,’ tin um bok hi.”
21-22 “Mah hangin Topa Jesuh i thawhlehnak thutheitu tetti pa kha khatin, na telpih uh kul hi. Amah cu Topa Jesuh khual a zin pepel sung hempoh sung cu keimu lakah telbokin, Johan i tuiphumnak piaknak thu a hilhnak pepan keimu lak pen Jesuh vanah laktoh a hih ni tian keimu lakah a telbokmi tuk,” ti hi.
23 Mah hangin mi pa nih Josef, Barsabbas tih vangin sammi, ahimata Justas tih hei sammi le Matthias tei min pia haw hi.
24 Mahten thungen haw in, “Topa, nangin mitei lungmu sung thei khawng ci; hi pa nih tei lak pen akua saw teng cim tih langtikin hi;
25 Amah tuah a khawthu mi munah a hawhsantu Judah i ai-awhtu tuk na tenmi cu langciangtikin hi,” tin ti haw hi.
26 Mahten amu pa nih lak pen akua saw in nungzuitu nadek saw tuk him tih theihnak tukin aisannak bawl haw in, Matthias in ngah hi. Matthias cu nungzuitu sawm le pa khat tei lakah betcihleh haw hi.